Baatlhodi 21:1-25

21  Jaanong banna ba Iseraele ba ne ba ikanne kwa Misepa,+ ba re: “Ga go na monna ope mo go rona yo o tla nayang Benjamine morwadie go nna mosadi.”+  Ka gone batho ba tla mo Bethele+ mme ba nna foo fa pele ga Modimo wa boammaaruri+ go fitlha maitseboa mme ba tsholetsa mantswe a bone ba lela fela thata.+  Mme ba ne ba re: “Ao tlhe Jehofa Modimo wa Iseraele, ke ka ntlha yang fa seno se diragetse mo Iseraele, gore lotso lo le longwe lo bo lo seyo gompieno jaana mo Iseraele?”+  Mme ga diragala ya re letsatsi le le latelang batho ba tsoga go sa le phakela ba aga sebeso foo le go isa ditshupelo tse di fisiwang+ le ditshupelo tsa kabalano.+  Foo bomorwa Iseraele ba re: “Ke mang mo ditsong tsotlhe tsa Iseraele yo o sa tlang mo phuthegong a tla mo go Jehofa, gonne go na le ikano e kgolo+ e e diragetseng malebana le motho ope yo o sa tlang kwa go Jehofa kwa Misepa, e e reng, ‘Ruri a a bolawe.’”+  Mme bomorwa Iseraele ba simolola go ikwatlhaya ka ntlha ya ga Benjamine morwarraabone. Jalo ba re: “Gompieno lotso lo le longwe lo kgaotswe mo Iseraele.  Re tla dira eng ka ba ba setseng malebana le basadi, ka e le fa re ikanne+ ka Jehofa gore re ka se ba neye bape ba bomorwadiarona go nna basadi?”+  Mme ba tswelela ba re: “Ke lotso lofe mo ditsong tsa Iseraele lo lo sa tlang kwa go Jehofa kwa Misepa?”+ Mme bonang! ga bo go se na ope yo o tlileng phuthegong mo bothibelelong a tswa kwa Jabeshe-gileade.+  E rile batho ba balwa, bonang! ga bo go se na motho ope moo yo o tswang kwa banning ba Jabeshe-gileade. 10  Ka gone kopano ya romela banna ba ba diganka thata ba le dikete di le lesome le bobedi teng mme ya ba laela ya re: “Tsamayang mme lo kgemethe banni ba Jabeshe-gileade ka bogale jwa tšhaka, le bone basadi le ba bannye tota.+ 11  Mme se lo tshwanetseng lwa se dira ke se: Monna mongwe le mongwe le mosadi mongwe le mongwe yo o kileng a lala le monna lo mo senye.”+ 12  Le fa go ntse jalo, mo banning ba Jabeshe-gileade+ ba fitlhela basetsana, makgarebane,+ ba le makgolo a le manè ba ba neng ba ise ba tlhakanele dikobo le monna ka go lala le monna. Jalo ba ba tlisa mo bothibelelong jwa Shilo,+ e e mo lefatsheng la Kanana. 13  Mme kopano yotlhe jaanong ya romela go ya go bua le bomorwa Benjamine ba ba neng ba le mo lefikeng le legolo la Rimone+ mme ba ba solofetsa kagiso. 14  Ka jalo Benjamine a boa ka nako eo. Foo ba ba neela basadi ba ba neng ba ba bolokile ba tshela mo basading ba Jabeshe-gileade;+ mme ba se ka ba fitlhela bao ba ba lekaneng.+ 15  Mme batho ba ikwatlhaela Benjamine+ ka gonne Jehofa a ne a lotlhantse ditso tsa Iseraele. 16  Ka gone banna ba bagolwane ba kopano ba re: “Re tla dira eng ka banna ba ba setseng malebana le basadi, ka gonne basadi ba nyeleditswe kwa Benjamine?” 17  Foo ba re: “Ba ba falotseng ba Benjamine+ ba tshwanetse ba nna le thuo, gore lotso lo se ka lwa phimolwa mo Iseraele. 18  Mme rona, ga re a letlelelwa go ba naya basadi mo go bomorwadiarona, ka gonne bomorwa Iseraele ba ikanne, ba re, ‘A go hutsege ene yo o nayang Benjamine+ mosadi.’” 19  La bofelo ba re: “Bonang! Go na le moletlo wa ga Jehofa ngwaga le ngwaga kwa Shilo,+ e e leng ntlheng ya bokone jwa Bethele, go ela kwa botlhaba jwa tsela e kgolo e e tlhatlogang go tswa kwa Bethele e ya kwa Shekema+ le go ela kwa borwa jwa Lebona.” 20  Ka jalo ba laela bomorwa Benjamine, ba re: “Tsamayang, mme lo lalele mo masimong a mofine. 21  Mme lo lebe, mme e re fa bomorwadia Shilo ba tswa ba tla go bina+ ba le sediko, lo tswe mo masimong a mofine mme mongwe le mongwe a itseele ka dikgoka mosadi go tswa mo go bomorwadia Shilo, mme lo ye kwa lefatsheng la Benjamine. 22  Mme go tla diragala gore fa borraabone kgotsa bomorwarraabone ba ka tla go sekaseka kgetsi ya molao kgatlhanong le rona, le rona re tla ba raya re re, ‘Re utlweleng botlhoko ka ntlha ya bone, ka gonne mongwe le mongwe wa rona ga a itseela mosadi ka ntwa,+ gonne ga se lona lo ba ba neileng ka nako e lo neng lo tla nna molato ka yone.’”+ 23  Ka jalo bomorwa Benjamine ba dira fela jalo, mme ba tsaya basadi ba ba lekaneng palo ya bone+ mo basading ba ba neng ba ntse ba bina,+ ba ba neng ba ba phamola; morago ga moo ba tswa ba tsamaya ba boela kwa bosweng jwa bone mme ba aga metse+ ba bo ba nna mo go yone. 24  Mme bomorwa Iseraele ba simolola go phatlalala go tswa koo ka nako eo, mongwe le mongwe a ya kwa lotsong lwa gagwe le kwa lelapeng la gagwe; mme ba tswa koo, mongwe le mongwe a ya kwa bosweng jwa gagwe.+ 25  Mo malatsing ao go ne go se na kgosi mo Iseraele.+ Mongwe le mongwe o ne a tlwaetse go dira se se neng se siame mo matlhong a gagwe.+

Dintlha Tse di Kwa Tlase