2 Samuele 19:1-43

19  go ne ga begelwa Joabe go twe: “Bona! Kgosi e a lela, e hutsafaletse Abesalome.”+  Ka jalo poloko mo letsatsing leo ya nna motlha wa go hutsafala ga batho botlhe, ka gonne batho ba ne ba utlwa mo letsatsing leo go twe: “Kgosi e utlwile botlhoko ka ntlha ya morwa wa yone.”  Mme batho ba simolola go ngongwaela ka letsatsi leo ba tsena mo motseng,+ fela jaaka batho ba ne ba tle ba ngongwaele fa ba tlhabilwe ke ditlhong ka gonne ba tshabile kwa tlhabanong.  Mme kgosi ya ipipa sefatlhego, mme kgosi ya tswelela e lela ka lentswe le le kwa godimo e re: “Abesalome morwaaka! Abesalome morwaaka, morwaaka!”+  La bofelo Joabe a tsena kwa kgosing kwa ntlong mme a re: “Gompieno o tlhabisitse sefatlhego sa batlhanka ba gago botlhe ditlhong, bone ba ba falotsang moya wa gago gompieno+ le moya wa bomorwao+ le bomorwadio+ le moya wa basadi ba gago+ le moya wa bagadingwana ba gago,+  ka go rata ba ba go tlhoileng le ka go tlhoa ba ba go ratang; gonne gompieno o begile gore balaodi le batlhanka ga ba sepe mo go wena, ka gonne ke itse sentle gore fa Abesalome a ne a tshela mme rona ba bangwe rotlhe re sule gompieno, ruri go ne go tla bo go siame mo matlhong a gago.  Mme jaanong nanoga, tswa o ye go bua ka tlhamalalo le pelo+ ya batlhanka ba gago, ka gonne, ke ikana ka Jehofa, gore fa o sa tswe, ga go na ope yo o tla lalang le wena bosigong jono;+ mme seno se tla nna bosula mo go wena go feta sotlhe se se go utlwisitseng botlhoko go tloga kwa bosheng jwa gago go fitlha jaanong.”  Ka gone kgosi ya nanoga ya nna mo kgorong,+ mme ba begela batho botlhe, ba re: “Kgosi ke ele e ntse kwa kgorong.” Mme batho botlhe ba simolola go tla fa pele ga kgosi. Mme Baiseraele bone, mongwe le mongwe o ne a tshabetse kwa legaeng la gagwe.+  Mme batho botlhe ba ganetsana mo ditsong tsotlhe tsa Iseraele, ba re: “Kgosi ke yone e neng ya re golola mo seatleng sa baba ba rona,+ e bile ke yone e neng ya re falotsa mo seatleng sa Bafilisitia; mme jaanong e tshabile mo lefatsheng la ga Abesalome.+ 10  Mme Abesalome ene, yo re mo tloditseng gore a re okamele,+ o sule mo tlhabanong.+ Jaanong ke ka ntlha yang fa lo sa dire sepe gore lo buse+ kgosi?” 11  Mme Kgosi Dafide ene, o ne a romela kwa go Sadoke+ le Abiathare+ baperesiti, a re: “Buang le banna ba bagolwane ba Juda,+ lo re, ‘Ke ka ntlha yang fa lo tshwanetse go nna ba bofelo go busetsa kgosi kwa ntlong ya yone, fa lefoko la Iseraele yotlhe le tlile mo kgosing kwa ntlong ya yone? 12  Lo bomorwarre; lo lerapo la me le nama ya me.+ Ka jalo ke ka ntlha yang fa lo tshwanetse go nna ba bofelo go busa kgosi?’ 13  Mme lo reye Amasa lo re,+ ‘A ga o lerapo la me le nama ya me? E kete Modimo a ka ntirela jalo a ba a oketsa+ fa o ka se nne molaodi wa masole fa pele ga me ka metlha mo boemong jwa ga Joabe.’”+ 14  Mme a oba pelo ya banna botlhe ba Juda jaaka monna a le mongwe fela,+ mo e leng gore ba ne ba romela lefoko kwa kgosing ba re: “Boa, wena le batlhanka botlhe ba gago.” 15  Mme kgosi ya simolola go boa mme ya fitlha kwa Joredane. Mme Juda, ba ne ba tla kwa Gilegala+ ba tla go kgatlhantsha kgosi, go kgabagantsha kgosi Joredane. 16  Foo Shimei+ morwa Gera+ wa Mobenjamine,+ yo o neng a tswa kwa Bahurime, a itlhaganela a ya le banna ba Juda go ya go kgatlhantsha Kgosi Dafide. 17  Mme o ne a na le banna ba le sekete ba ba tswang kwa Benjamine. (Le Siba+ motlhokomedi wa ntlo ya ga Saulo le bomorwawe ba ba lesome le botlhano+ le batlhanka ba gagwe ba ba masome a mabedi ba ne ba na le ene, mme ba fitlha ka katlego kwa Joredane kwa pele ga kgosi. 18  Mme a kgabaganya letsibogo+ a kgabagantsha ba ntlo ya kgosi le go dira se se molemo mo matlhong a yone.) Mme Shimei morwa Gera ene, o ne a wela fa fatshe fa pele ga kgosi fa e ne e tloga e kgabaganya Joredane.+ 19  Jaanong a raya kgosi a re: “A morena wa me a se ka a go mpalela e le tlolo, le gone o se ka wa gakologelwa phoso e motlhanka wa gago a neng a e dira+ mo letsatsing le morena wa me kgosi a neng a tswa kwa Jerusalema ka lone, gore kgosi e e beye mo pelong ya yone.+ 20  Gonne motlhanka wa gago o itse sentle gore ke nna ke leofileng; mme bona ke tlile gompieno ke le wa ntlha mo go botlhe ba ntlo ya ga Josefa+ gore ke tle go kgatlhantsha morena wa me kgosi.” 21  Abishai+ morwa Seruia+ a akofa a araba a re: “A Shimei ga a tshwanela go bolaelwa seno, ka gonne o hutsitse motlodiwa wa ga Jehofa?”+ 22  Mme Dafide a re: “Ke dirang ka lona,+ lona bomorwa Seruia, gore gompieno lo nne baganetsi+ ba me? A gompieno motho mongwe o tla bolawa mo Iseraele?+ Gonne a ga ke itse sentle gore gompieno ke nna kgosi ya Iseraele?” 23  Foo kgosi ya raya Shimei ya re: “Ga o kitla o swa.” Mme kgosi ya mo ikanela.+ 24  Mme Mefiboshethe+ morwa ngwana wa ga Saulo ene, o ne a tla go kgatlhantsha kgosi; mme o ne a sa ipaakanya dinao+ le fa e le go ipaakanya ditedu tsa dipounama+ le gone o ne a sa tlhatswa diaparo tsa gagwe go tloga ka letsatsi le kgosi e neng e tsamaya ka lone go fitlha ka letsatsi le e neng e boa ka kagiso ka lone. 25  Mme ga diragala gore, fa a tla mo Jerusalema a tla go kgatlhantsha kgosi, foo kgosi ya mo raya ya re: “Ke ka ntlha yang fa o ne o sa tsamaye le nna Mefiboshethe?” 26  Foo a re: “Morena wa me kgosi, motlhanka wa me+ ke ene a neng a ntsietsa. Gonne motlhanka wa gago o ne a rile, ‘Mma ke ipelesetse esele e namagadi gore ke tle ke e palame mme ke tsamaye le kgosi’, gonne motlhanka wa gago o golafetse.+ 27  Ka jalo a senya leina+ la motlhanka wa gago mo go morena wa me kgosi. Mme morena wa me kgosi o tshwana le moengele+ wa Modimo wa boammaaruri, ka jalo dira se se molemo mo matlhong a gago. 28  Gonne botlhe ba ntlo ya ga rre ba ka bo ba sa nna sepe fa e se go atlholelwa loso mo go morena wa me kgosi, mme le fa go ntse jalo o ne wa baya motlhanka wa gago mo gare ga ba ba jang mo tafoleng ya gago.+ Ka jalo ke eng se e sa ntseng e ka nna maiphako a a siameng a gore ke nne ke goele+ kwa kgosing?” 29  Le fa go ntse jalo, kgosi ya mo raya ya re: “O sa ntse o buelang mafoko a gago? Nna ka re, Wena le Siba lo tlhakanele tshimo.”+ 30  Foo Mefiboshethe a raya kgosi a re: “A a e tseye yotlhe,+ e re ka jaanong morena wa me kgosi a tlile mo ntlong ya gagwe ka kagiso.” 31  Mme Barisilai+ wa Mogileade a fologa go tswa kwa Rogelime gore a tle a fetele kwa Joredane le kgosi gore a e buledise go ya kwa Joredane. 32  Mme Barisilai o ne a tsofetse thata, a le dingwaga di le masome a robedi;+ mme ene o ne a tlamela kgosi ka dijo fa a ne a nna kwa Mahanaime,+ gonne e ne e le monna yo mogolo thata.+ 33  Ka jalo kgosi ya raya Barisilai ya re: “Wena kgabaganya le nna, mme ruri ke tla go tlamela ka dijo o na le nna kwa Jerusalema.”+ 34  Mme Barisilai a raya kgosi a re: “Malatsi a dingwaga tsa botshelo jwa me a ntse jang, gore ke bo nka tlhatlogela kwa Jerusalema le kgosi? 35  Ke na le dingwaga di le masome a robedi gompieno.+ A nka lemoga molemo le bosula, kgotsa a motlhanka wa gago a ka utlwa se ke neng ka se ja le se ke neng ka se nwa,+ kgotsa a ke sa ntse ke ka reetsa+ lentswe la baopedi ba banna le ba basadi? + Ka jalo ke ka ntlha yang fa motlhanka wa gago a ka tlhola a nna mokgweleo+ mo go morena wa me kgosi? 36  Gonne motlhanka wa gago o kgonne go tsamaisa kgosi sekgalanyana fela go fitlha mo Joredane, mme kgosi e tla bo e ntuelelang ka maduo+ ano? 37  Mma motlhanka wa gago a boe tsweetswee, mme mma ke swele+ mo motseng wa me o o gaufi le lefelo la go fitlhela la ga rre le mmè.+ Mme Kimahame+ motlhanka wa gago ke yo. A a kgabaganye le morena wa me kgosi; mme o dire ka ene se se molemo mo matlhong a gago.” 38  Ka jalo kgosi ya re: “Kimahame o tla kgabaganya le nna, mme ke tla dira ka ene se se molemo mo matlhong a gago; mme sotlhe se o ka tlhophang go se lopa mo go nna ke tla se go direla.” 39  Jaanong batho botlhe ba simolola go kgabaganya Joredane, le kgosi ka boyone ya kgabaganya; mme kgosi ya atla+ Barisilai ya mo segofatsa,+ mme morago ga moo a boela kwa lefelong la gagabo. 40  Fa kgosi e kgabaganyetsa kwa Gilegala,+ Kimahame ka boene a kgabaganya le yone, le batho botlhe ba Juda, le sephatlo sa batho ba Iseraele, gore ba kgabagantshe kgosi. 41  Mme bonang! banna botlhe ba Iseraele ba ne ba tla kwa kgosing, mme ba raya kgosi ba re: “Ke ka ntlha yang fa+ banna ba Juda bomorwarraarona ba ne ba go utswa gore ba tlise kgosi le ba ntlo ya yone le banna botlhe ba ga Dafide ba na le ene go kgabaganya Joredane?”+ 42  Foo banna botlhe ba Juda ba araba banna ba Iseraele ba re: “Ka gonne kgosi e amana thata le rona;+ mme ke ka ntlha yang fa lo galefetse selo se? A re jele ka ditshenyegelo tsa kgosi ka tsela epe, kgotsa a go na le mpho e re e tliseditsweng?” 43  Le fa go ntse jalo, banna ba Iseraele ba araba banna ba Juda ba re: “Re na le dikabelo di le lesome mo kgosing,+ mo e leng gore tota le mo go Dafide re a lo feta. Mme he, ke ka ntlha yang fa lo ne lo re tshwara ka lenyatso, mme ke ka ntlha yang fa kgang ya rona e ne e sa nne yone ya ntlha+ gore re buse kgosi ya rona?” Mme lefoko la banna ba Juda le ne le le botlhoko thata go feta lefoko la banna ba Iseraele.

Dintlha Tse di Kwa Tlase