2 Petere 2:1-22

2  Le fa go ntse jalo, gape go ne ga nna le baporofeti ba maaka mo bathong, fela jaaka gape go tla nna le barutisi ba maaka mo go lona.+ Bone bano ka go kukunela ba tla tlisa mo teng makoko a a senyang gape ba tla itatola le e leng mong wa bone yo o ba rekileng,+ ba itlisetsa tshenyego e e bofefo.  Mo godimo ga moo, ba le bantsi ba tla latela+ ditiro tsa bone tsa boitshwaro+ jo bo repileng, mme ka ntlha ya bano tsela ya boammaaruri e tla buiwa ka go kgojwa.+  Gape, ka keletso ya bopelotshetlha, ba tla lo dirisa ka tsela e e sa tshwanelang ka mafoko+ a tsietso. Mme bone, katlholo ya go tswa bogologolong+ ga e tsamaye ka bonya, le tshenyego ya bone ga e otsele.+  Eleruri fa Modimo a se kile a ithiba go otlhaya baengele+ ba ba neng ba leofa, mme, ka go ba latlhela mo teng ga Tatarase,+ o ne a ba tsenya mo dikhuting tsa lefifi le le kwenneng gore ba beelwe katlholo;+  e bile o ne a se ka a ithiba go otlhaya lefatshe+ la bogologolo, mme a boloka Noa, moreri wa tshiamo,+ a babalesegile le ba bangwe+ ba le supa fa a ne a tlisa morwalela+ mo lefatsheng la baikepi;  mme ka go dira metse ya Sodoma le Gomora melora fela o ne a ba bona molato,+ a tlhomela baikepi sekao sa dilo tse di tla tlang;+  mme o ne a golola Lote+ yo o siameng, yo o neng a tshwenyegile thata ka go itlhapedisa mo boitshwarong+ jo bo repileng ga batho ba ba tlhokomologang molao—  gonne monna yo o siameng yoo, ka se a neng a se bona le se a neng a se utlwa fa a ne a nna gareng ga bone letsatsi le letsatsi o ne a tlhokofatsa moya wa gagwe o o siameng ka ntlha ya ditiro tsa bone tsa go tlhoka molao—  Jehofa o itse kafa a ka gololang batho ba boineelo jwa bomodimo mo tekong+ ka gone, mme a beele batho ba ba sa siamang letsatsi la katlholo gore ba kgaolwe,+ 10  le fa go ntse jalo, segolobogolo ba ba tswelelang ba sala nama morago ka keletso ya go e leswafatsa+ le ba ba lebelang borena+ kwa tlase. E re ka ba le pelokgale, ba rata gore go dirwe ka tsela ya bone fela, ga ba tshosiwe ke ba ba galalelang mme ba bua ka tsela ya go kgoba,+ 11  fa baengele bone, le mororo ba le bagolwane ka nonofo le maatla, ba sa ba latofatse ka mafoko+ a go kgoba, ba sa dire jalo ka go bo ba tlotla Jehofa.+ 12  Mme banna bano, jaaka diphologolo tse di sa akanyeng tse ka tlholego di tsaletsweng go tshwarwa le go senngwa, mo dilong tse ba se nang kitso ka tsone e bile ba bua ka tsone ka go kgoba,+ ba tla bo ba senngwe mo tseleng ya bone ya tshenyego, 13  ba iphosetsa+ e le maduo a go dira phoso.+ Ba tsaya botshelo jwa manobonobo mo nakong ya motshegare e le monate.+ Ke dilabe le batho ba ba bogole, ba itlhapedisa ka go ja monate kwantle ga boithibo mo dithutong tsa bone tse di tsietsang fa ba ntse ba ja mekete mmogo le lona.+ 14  Ba na le matlho a a tletseng boaka+ a a bileng a sa kgone go bakela boleo,+ e bile ba hepisa meya e e sa nitamang. Ba na le pelo e e thapisitsweng mo keletsong ya bopelotshetlha.+ Ke bana ba ba hutsegileng.+ 15  Ka go tlogela tselana e e tlhamaletseng, ba timeditswe. Ba latetse tselana ya ga Balaame,+ morwa Beore, yo o neng a rata maduo a go dira phoso,+ 16  mme a kgalemelelwa go tlola ga gagwe se se neng se siame.+ Pelesa e e se nang lentswe, e bua ka lentswe la motho,+ e ne ya kgoreletsa tsela+ ya botsenwa ya moporofeti yono. 17  Bano ke didiba tse di se nang metsi,+ le meuwane e e kgweediwang ke matsubutsubu a a bogale, mme ba beetswe+ bontsho jwa lefifi. 18  Gonne ba bua dipolelwana tsa boikgogomoso tse di se nang poelo, mme ka dikeletso tsa nama+ le ka mekgwa e e repileng ba hepisa+ ba ba sa tswang go falola+ mo bathong ba ba itshwarang ka tsela ya go fapoga. 19  Fa ba ntse ba ba solofetsa kgololesego,+ bone ka bobone ba tshela jaaka batlhanka ba go bola.+ Gonne le fa e le mang yo o fenngwang ke yo mongwe o dirwa motlhanka ke yono.+ 20  Eleruri fa e le gore, morago ga go falola mo dilong tse di leswafatsang tsa lefatshe+ ka kitso ya boammaaruri ya Morena le Mmoloki Jesu Keresete, ba boa ba tsenelela gape mo go tsone dilo tseno mme ba fenngwa,+ maemo a bofelo a maswe mo go bone go feta a ntlha.+ 21  Gonne go ka bo go ba nnetse botoka gore ba bo ba se kile ba itse sentle tselana ya tshiamo+ go na le gore fa ba sena go e itse sentle ba fularele taolo e e boitshepo e ba+ neng ba e newa. 22  Lefoko la seane se se boammaaruri le ba diragaletse le le reng: “Ntša+ e boetse matlhatseng a yone, le kolobe e namagadi e e neng e tlhapisitswe, e boetse kwa go bidikameng mo lorageng.”+

Dintlha Tse di Kwa Tlase