2 Ditiragalo 26:1-23

26  Go tswa foo batho+ botlhe ba Juda ba tsaya Usia,+ a na le dingwaga di le lesome le borataro, mme ba mo dira+ kgosi mo boemong jwa ga rraagwe e bong Amasia.+  Ke ene yo o neng a aga Elothe+ sesha mme a e busetsa Juda morago ga kgosi e sena go lala le borraayonemogologolwane.+  Usia+ o ne a na le dingwaga di le lesome le borataro fa a simolola go busa, mme a busa dingwaga di le masome a matlhano le bobedi mo Jerusalema. Leina la ga mmaagwe e ne e le Jekolia+ wa Jerusalema.  Mme a nna a dira se se siameng mo matlhong+ a ga Jehofa, go ya ka sotlhe se Amasia rraagwe a neng a se dirile.+  Mme ka metlha a sekamela mo go batleng+ Modimo mo metlheng ya ga Sekarea, motlhatlheledi wa gore go boifiwe Modimo wa boammaaruri;+ mme, mo metlheng ya go batla ga gagwe Jehofa, Modimo wa boammaaruri a mo atlegisa.+  Mme a tswa a ya go tlhabana le Bafilisitia+ mme a thuba lobota lwa Gathe+ le lobota lwa Jabene+ le lobota lwa Ashedoda,+ morago ga moo a aga metse mo karolong ya naga ya Ashedoda+ le mo gare ga Bafilisitia.  Modimo wa boammaaruri a tswelela go mo thusa+ mo Bafilisitieng le Baarabia+ ba ba neng ba nna kwa Gurebaale le Meunime.+  Mme Baamona+ ba simolola go naya Usia sehuba.+ Kgabagare go tuma+ ga gagwe ga ya go fitlha le kwa Egepeto, gonne o ne a bontsha nonofo ka selekanyo se se sa tlwaelegang.  Mo godimo ga moo, Usia a aga ditora+ kwa Jerusalema kwa Kgorong ya Kgokgotsho+ le kwa Kgorong ya Mokgatšha+ le kwa Loboteng lo lo Tshegetsang Kago, a di nonotsha. 10  Mo godimo ga moo, a aga ditora+ mo nageng, a ba a epa megobe e le mentsi (gonne go ne go na le diruiwa di le dintsi thata tse e neng ya nna tsa gagwe), le mo Shefela+ le mo nageng e e kwa godimo e e sebatla. Go ne go na le balemirui le babaakanyi ba mofine mo dithabeng le mo Karemele, gonne o ne a itshupa e le morati wa temothuo. 11  Mo godimo ga moo, Usia a nna le mophato o o tsenang mo ntweng, ba ba tswang ka tirelo ya sesole ba le mephato ya masole,+ ka palo ya go kwadisiwa+ ga bone ka seatla sa ga mokwaledi+ Jeiele le Maaseia modiredi yo o mo taolong+ ya ga Hanania wa dikgosana+ tsa kgosi. 12  Palo yotlhe ya ditlhogo tsa ba matlo a borre,+ ya banna ba ba pelokgale+ ba ba thata,+ e ne e le dikete di le pedi le makgolo a le marataro. 13  Mme mephato ya sesole e e neng e le mo taolong ya bone e ne e le banna ba le dikete di le makgolo a le mararo le bosupa le makgolo a le matlhano ba ba tsenang mo ntweng ka maatla a mophato wa sesole go thusa kgosi kgatlhanong le mmaba.+ 14  Mme Usia a tswelela a ba baakanyetsa, a baakanyetsa mophato otlhe, dithebe+ le marumo+ le ditlhoro tsa phemelo+ le meitshomelo ya phemelo+ le mara+ le maje a motsekedi.+ 15  Mo godimo ga moo, a dira dibetsa tsa ntwa mo Jerusalema, tse di tlhamilweng ke batho, gore di tle di nne mo godimo ga ditora+ le mo godimo ga dikhutlo, gore di hule marumo le maje a magolo. Ka gone go tuma+ ga gagwe ga tswela kgakala thata, gonne o ne a thusiwa ka tsela e e gakgamatsang tota go fitlha a nonofa. 16  Le fa go ntse jalo, fela fa a sena go nonofa, pelo ya gagwe ya nna mabela+ gore a bo a dire bosula,+ mo a neng a direla Jehofa Modimo wa gagwe ka go tlhoka boikanyegi mme a tla mo tempeleng ya ga Jehofa go tla go fisa maswalo mo sebesong sa maswalo.+ 17  Ka yone nako eo moperesiti Asaria a tsena morago ga gagwe a na le baperesiti ba ga Jehofa, banna ba le masome a le robedi ba ba pelokgale. 18  Foo ba emelelana le kgosi+ Usia ba mo raya ba re: “Ga se tiro+ ya gago, wena Usia, go fisetsa Jehofa maswalo, mme ke tiro ya baperesiti e bong bomorwa Arone,+ ba ba itshepisitsweng, gore ba fise maswalo. Tswa mo lefelong le le boitshepo; gonne o dirile ka go tlhoka boikanyegi, e bile Jehofa Modimo ga a go lebe e le kgalalelo+ mo go wena.” 19  Mme Usia a galefa+ go sa ntse go na le leiswana+ mo seatleng sa gagwe la go fisa maswalo, mme, fa a sa ntse a galefetse baperesiti, lepero+ la mo tswa ka tshoganyetso+ mo phatleng fa pele ga baperesiti mo ntlong ya ga Jehofa fa thoko ga sebeso sa maswalo. 20  E rile moperesiti yo mogolo Asaria le baperesiti botlhe ba retologela kwa go ene, bona, a bo a iteilwe ka lepero mo phatleng!+ Ka jalo ba mo tlosa ka bonako moo, mme le ene a itlhaganelela go tswa, ka gonne Jehofa o ne a mo iteile.+ 21  Mme kgosi Usia+ a tswelela e le molepero go fitlha mo letsatsing la loso lwa gagwe, mme a tswelela a nna mo ntlong a rebotswe mo ditirong, e le molepero;+ gonne o ne a kgaotswe mo ntlong ya ga Jehofa, fa Jothame morwawe a ne a okametse ntlo ya kgosi, a atlhola batho ba lefatshe leo. 22  Mme ditiragalo tse dingwe tsotlhe tsa ga Usia,+ tsa ntlha le tsa bofelo, Isaia+ morwa moporofeti Amosi+ o di kwadile. 23  La bofelo Usia a lala le borraagwemogologolwane; ka jalo ba mo fitlha le borraagwemogologolwane, mme e le mo nageng ya go fitlhela e e neng e le ya dikgosi,+ gonne ba ne ba re: “Ke molepero.” Mme Jothame+ morwawe a simolola go busa mo boemong jwa gagwe.

Dintlha Tse di Kwa Tlase