2 Ditiragalo 13:1-22

13  Abija o ne a simolola go busa Juda+ mo ngwageng wa bolesome le borobedi wa ga Kgosi Jeroboame.  O ne a busa mo Jerusalema dingwaga di le tharo, mme leina la ga mmaagwe e ne e le Mikaia+ morwadia Uriele wa Gibea.+ Mme ga nna le ntwa fa gare ga ga Abija le Jeroboame.+  Ka jalo Abija a tsena mo ntweng le mophato wa sesole wa banna ba ba thata ba ntwa+ ba le dikete di le makgolo a le manè, banna ba ba tlhophilweng. Mme Jeroboame ka boene a tlhomagana kafa thulaganyong ya tlhabano kgatlhanong le ene ka banna ba ba tlhophilweng ba le dikete di le makgolo a le robedi, banna ba ba pelokgale ba ba thata.+  Jaanong Abija a ema mo godimo ga Thaba ya Semaraime, e e mo kgaolong e e dithaba ya Eferaime,+ mme a re: “Nkutlwa wena Jeroboame le Iseraele yotlhe.  A ga lo a tshwanela go itse gore Jehofa Modimo wa Iseraele ka boene o neile Dafide+ bogosi mo Iseraele ka bosakhutleng,+ ene le bomorwawe,+ ka kgolagano ya letswai?+  Mme Jeroboame+ morwa Nebate, motlhanka+ wa ga Solomone morwa Dafide, a nanoga mme a tsuologela+ morena+ wa gagwe.  Mme banna ba ba ditshwakga,+ batho ba ba se nang molemo wa sepe,+ ba nna ba phuthegela fa go ene. La bofelo ba itshupa ba feta Rehoboame morwa Solomone ka maatla, fa Rehoboame+ ene a ne a le mmotlana e bile a le boboi+ mme a se ka a emelelana le bone.  “Mme jaanong lo akanya go emelelana le bogosi jwa ga Jehofa mo seatleng sa bomorwa Dafide,+ lo le boidiidi jo bogolo+ e bile lo na le dinamane tsa gouta tse Jeroboame a neng a di lo direla go nna medimo.+  A ga lo a leleka baperesiti ba ga Jehofa,+ bomorwa Arone, le Balefi, mme a ga lo nnele go itirela baperesiti jaaka ditšhaba tsa mafatshe?+ Fa e le motho ope yo o neng a tla mme a thatafatsa seatla sa gagwe ka powana le diphelefu di le supa, o ne a nna moperesiti wa se e seng medimo.+ 10  Fa e le rona, Jehofa ke Modimo+ wa rona, ga re a mo tlogela; mme baperesiti ba direla Jehofa, bomorwa Arone, le Balefi mo tirong.+ 11  Mme ba kuisetsa Jehofa mosi wa ditshupelo tse di fisiwang moso mongwe le mongwe le maitseboa+ mangwe le mangwe le maswalo a a nkgisitsweng monate;+ mme senkgwe se se tlhatlagantsweng se mo godimo ga tafole ya gouta e e itshekileng,+ mme go na le setlhomo sa lobone+ sa gouta le dipone tsa teng go bonesa maitseboa mangwe le mangwe;+ ka gonne re boloka boikarabelo+ mo go Jehofa Modimo wa rona, mme lona ka bolona lo mo tlogetse.+ 12  Mme bona! yo o nang le rona kwa tlhogong ke Modimo wa boammaaruri+ a na le baperesiti+ ba gagwe le diterompeta tse di ntshang sesupo+ tsa go tlhaba mokgosi wa tlhabano kgatlhanong le lona. Lona bomorwa Iseraele, lo se ka lwa tlhabana le Jehofa Modimo wa borraalonamogologolwane,+ gonne ga lo kitla lo atlega.”+ 13  Mme fa e le Jeroboame ene, a romela balaledi gore ba dikologe ba tle kwa morago ga bone, mo e leng gore ba ne ba le fa pele ga Juda mme balaledi ba le kwa morago ga bone.+ 14  E rile ba Juda ba retologa, bona, tlhabano ya bo e le kafa pele le kafa morago.+ Mme ba simolola go goela kwa go Jehofa,+ fa baperesiti bone ba ne ba leletsa diterompeta kwa godimo. 15  Mme banna ba Juda ba tlhaba mokgosi wa ntwa.+ Mme ga diragala gore, fa banna ba Juda ba tlhaba mokgosi wa ntwa, foo Modimo wa boammaaruri ka boene a fenya+ Jeroboame le Iseraele yotlhe fa pele ga ga Abija+ le Juda. 16  Mme bomorwa Iseraele ba tshaba fa pele ga Juda, mme Modimo a ba tsenya mo seatleng+ sa bone. 17  Abija le batho ba gagwe ba ba kgemetha ka polao e kgolo; mme ba ba bolailweng ba Iseraele ba nna ba wa, banna ba le dikete di le makgolo a le matlhano ba ba tlhophilweng. 18  Ka jalo bomorwa Iseraele ba kokobediwa ka nako eo, mme bomorwa Juda ba itshupa ba ba feta ka maatla ka gonne ba ne ba ikaegile+ ka Jehofa Modimo wa borraabonemogologolwane. 19  Mme Abija a nna a lelekisa Jeroboame mme a thopa metse mo go ene, Bethele+ le metse e e kafa tlase ga gagwe, le Jeshana le metse e e kafa tlase ga gagwe, le Eferaine le metse e e kafa tlase ga gagwe.+ 20  Mme Jeroboame a se ka a tlhola a nna le maatla+ ape a a oketsegileng mo metlheng ya ga Abija; mme Jehofa a mo itaya,+ mo a neng a swa. 21  Mme Abija a tswelela a inonotsha.+ Fa nako e ntse e tsamaya a itseela basadi ba le lesome le bonè,+ mme a nna le bana ba basimane+ ba le masome a mabedi le bobedi le bana ba basetsana ba le lesome le borataro. 22  Mme ditiragalo tse dingwe tsotlhe tsa ga Abija, le e leng ditsela tsa gagwe le mafoko a gagwe, di kwadilwe mo phuthololong ya ga moporofeti Ido.+

Dintlha Tse di Kwa Tlase