2 Dikgosi 18:1-37

18  Mme ga diragala gore mo ngwageng wa boraro wa ga Hoshea+ morwa Ela kgosi ya Iseraele Hesekia+ morwa Ahase+ kgosi ya Juda a nne kgosi.  O ne a na le dingwaga di le masome a mabedi le botlhano fa a simolola go busa, mme a busa dingwaga di le masome a mabedi le borobabongwe mo Jerusalema. Mme leina la ga mmaagwe e ne e le Abi morwadia Sekarea.+  Mme a tswelela go dira se se siameng mo matlhong a ga Jehofa,+ kafa go sotlhe se Dafide rraagwemogologolwane a neng a se dirile.+  Ke ene yo o neng a tlosa mafelo a a kwa godimo+ mme a thubaganya dipilara tse di boitshepo+ le go kgaola kota e e boitshepo+ a ba a thubaganya noga+ ya kgotlho e Moshe a neng a e dirile;+ gonne go fitlha mo malatsing ao bomorwa Iseraele ba ne ba ntse ba e kuisetsa mosi wa setlhabelo,+ mme e ne e bidiwa modingwana wa noga wa kgotlho.+  O ne a ikanya Jehofa Modimo wa Iseraele; mme morago ga gagwe ga itshupa+ go se na ope yo o tshwanang le ene mo dikgosing tsotlhe tsa Juda,+ le eleng ba ba neng ba nnile teng pele ga gagwe.+  Mme a nna a ngaparela Jehofa.+ A se ka a fapoga mo go mo saleng morago, mme a tswelela a boloka ditaelo tsa gagwe tse Jehofa a neng a di laetse Moshe.+  Mme Jehofa a itshupa a na le ene.+ Gongwe le gongwe kwa a neng a tswela teng, o ne a dira ka botlhale;+ mme o ne a tsuologela kgosi ya Asiria mme a se ka a e direla.+  Ke ene yo o neng a kgemetha Bafilisitia+ go ya go fitlha kwa Gasa+ le dikarolo tsa yone tsa naga, go tswa kwa toreng+ ya balebeledi go ya go fitlha kwa motseng o o sireletsegileng.  Mme ga diragala gore mo ngwageng wa bonè wa ga Kgosi Hesekia, ke gore, ngwaga wa bosupa wa ga Hoshea+ morwa Ela kgosi ya Iseraele, Shalemanesere+ kgosi ya Asiria a tsogologela Samarea mme a simolola go e dikanyetsa.+ 10  Mme ba e thopa+ kwa bokhutlong jwa dingwaga di le tharo; mo ngwageng wa borataro wa ga Hesekia, ke gore, mo ngwageng wa borobabongwe wa ga Hoshea kgosi ya Iseraele, Samarea ya thopiwa.+ 11  Morago ga moo kgosi ya Asiria+ ya isa Iseraele botshwarwa+ kwa Asiria mme ya ba baya kwa Hala+ le kwa Habore+ kwa nokeng ya Gosane le mo metseng ya Bameda,+ 12  ka lebaka la gore ba ne ba sa reetsa+ lentswe la ga Jehofa Modimo wa bone, mme ba nna ba tlola kgolagano ya gagwe,+ le eleng sotlhe se Moshe+ motlhanka wa ga Jehofa a neng a se laetse.+ Ga ba a reetsa le fa e le go dira. 13  Mme mo ngwageng wa bolesome le bonè wa ga Kgosi Hesekia, Senakaribe+ kgosi ya Asiria+ a tsogologela metse yotlhe e e sireletsegileng ya Juda mme a e gapa. 14  Ka jalo Hesekia kgosi ya Juda a roma kwa kgosing ya Asiria kwa Lakishe, a re: “Ke leofile. Boa o se ntsogologele. Le fa e le eng se o tla se kopang mo go nna ke tla se dira.”+ Ka jalo kgosi ya Asiria ya kopa Hesekia kgosi ya Juda ditalenta tsa selefera+ di le makgolo a le mararo le ditalenta tsa gouta di le masome a mararo. 15  Ka jalo Hesekia a ntsha selefera yotlhe e e neng e fitlhelwa mo ntlong ya ga Jehofa+ le mo matlotlong a ntlo ya kgosi.+ 16  Ka nako eo Hesekia a kgaola dikgoro tsa tempele ya ga Jehofa+ le mephakwana e Hesekia kgosi ya Juda a neng a e manegile+ mme a e naya kgosi ya Asiria. 17  Mme kgosi ya Asiria+ ya roma Taretane+ le Rabesarise le Rabeshake+ go tswa Lakishe+ kwa go Kgosi Hesekia le mophato o mogolo wa sesole kwa Jerusalema, gore ba tlhatloge mme ba tle mo Jerusalema. Ka jalo ba tlhatloga mme ba tla ba ema+ fela fa moseleng wa mogobe o o fa godimo,+ o o kwa tseleng e kgolo ya naga ya motlhatswi wa matsela.+ 18  Mme ba simolola go tlhaeletsa kgosi, mme Eliakime+ morwa Hilekia, yo o neng a okametse ba ntlo, le Shebenahe+ mokwaledi le Joa morwa Asafe mokwadi ba tswela kwa go bone. 19  Ka jalo Rabeshake+ a ba raya a re: “Tsweetswee, rayang Hesekia lo re, ‘Kgosi e kgolo,+ kgosi ya Asiria, e buile jaana: “Tshepo e o e ikantseng eno ke eng?+ 20  O rile (mme ke lefoko la dipounama), ‘Go na le leano+ le thata ya ntwa.’ Jaanong o tshepile mang, go bo o ntsuologetse?+ 21  Jaanong, bona! o ikantse setshegetso sa lotlhaka lono lo lo phitsegileng,+ Egepeto,+ lo fa motho a itshegeletsa ka lone, lo tla tsenang mo legofing la gagwe lo bo lo le tlhaba. Ke yone tsela e Faro+ kgosi ya Egepeto a ntseng ka yone mo go botlhe ba ba mo ikanyang. 22  Mme fa lo ka nthaya lwa re, ‘Re ikantse+ Jehofa+ Modimo wa rona,’ a ga se ene yo Hesekia+ a tlositseng mafelo a gagwe a a kwa godimo+ le dibeso tsa gagwe, a ntse a raya Juda le Jerusalema a re, ‘Lo tshwanetse go ikoba fa pele ga sebeso seno kwa Jerusalema’?”’+ 23  Jaanong, tsweetswee dirang peelano+ le morena wa me kgosi ya Asiria, mme mma ke lo neye dipitse di le dikete di le pedi go bona gore a lo kgona go pega bapalami mo go tsone.+ 24  Jaanong o ka busetsa jang sefatlhego sa molaodi a le mongwe wa batlhanka ba babotlana go ba feta botlhe ba morena wa me+ morago, fa wena, o ikantse Egepeto ka ntlha ya dikara+ le ka ntlha ya bapalami ba dipitse?+ 25  Jaanong a ga se ka taolo e e tswang kwa go Jehofa gore ke bo ke tsogologetse lefelo leno go le senya? Jehofa ka boene o ntheile+ a re, ‘Tsogologela lefatshe leno, mme o le senye.’” 26  Foo Eliakime+ morwa Hilekia le Shebenahe+ le Joa+ ba raya Rabeshake+ ba re: “Bua le batlhanka ba gago, tsweetswee, ka puo ya Sesiria,+ gonne re reeditse; mme o se ka wa bua le rona ka puo ya Bajuda+ batho ba ba mo loboteng ba utlwa.” 27  Mme Rabeshake a ba raya a re: “A morena wa me o nthomile kwa moreneng wa gago le kwa go wena gore ke bue mafoko ano? A ga a nthoma kwa banneng ba ba ntseng mo godimo ga lobota, gore ba tle ba je mantle a bone+ le go nwa motlhapo wa bone ba na le lona?”+ 28  Mme Rabeshake a nna a ema a tlhaeletsa ka lentswe le le kwa godimo ka puo ya Bajuda;+ mme a tswelela a bua a re: “Utlwang lefoko la kgosi e kgolo,+ kgosi ya Asiria. 29  Kgosi e buile jaana, ‘Lo se ka lwa letla Hesekia a lo tsietsa, gonne ga a kgone go lo golola mo seatleng sa me.+ 30  Mme lo se ka lwa letla Hesekia a lo dira gore lo ikanye Jehofa,+ a re: “Ruri Jehofa o tla re golola,+ mme motse ono ga o na go tsenngwa mo seatleng sa kgosi ya Asiria.”+ 31  Lo se ka lwa reetsa Hesekia; gonne kgosi ya Asiria e buile jaana: “Ineeleng mo go nna, mme lo tswele kwa go nna, mme mongwe le mongwe a je mo mofineng wa gagwe le mongwe le mongwe mo setlhareng sa gagwe sa mofeige+ gape mongwe le mongwe a nwe metsi a mogobe wa gagwe,+ 32  go fitlha ke tla ke bo ke lo isa kwa lefatsheng le le tshwanang le lefatshe la lona,+ lefatshe la dijo tsa ditlhaka le beine e ntšha, lefatshe la senkgwe+ le masimo a mofine,+ lefatshe la ditlhare tsa motlhware wa leokwane le tswina ya dinotshe;+ mme lo nne lo tshele gore lo se ka lwa swa. Lo se ka lwa reetsa Hesekia, gonne o a lo gogela, a re, ‘Jehofa ka boene o tla re golola.’+ 33  A medimo ya ditšhaba e gololetse+ mongwe le mongwe lefatshe la gagwe mo seatleng sa kgosi ya Asiria?+ 34  E kae medimo ya Hamathe+ le Arepade?+ E kae medimo ya Sefarefaime,+ Hena+ le Ifaha?+ A e golotse Samarea mo seatleng sa me?+ 35  Ke efe mo medimong yotlhe ya mafatshe e e golotseng lefatshe la yone mo seatleng sa me,+ gore Jehofa a golole Jerusalema mo seatleng sa me?”’”+ 36  Mme batho ba didimala+ ba se ka ba mo araba+ ka lefoko lepe, gonne taolo ya kgosi e ne e re: “Lo se ka lwa mo araba.”+ 37  Mme Eliakime+ morwa Hilekia, yo o neng a okametse ba ntlo, le Shebenahe+ mokwaledi le Joa+ morwa Asafe mokwadi ba tla kwa go Hesekia ka diaparo tsa bone di gagogantswe+ mme ba mmolelela mafoko a ga Rabeshake.

Dintlha Tse di Kwa Tlase