2 Dikgosi 16:1-20

16  Mo ngwageng wa bolesome le bosupa wa ga Peka morwa Remalia, Ahase+ morwa Jothame kgosi ya Juda a nna kgosi.  Ahase o ne a na le dingwaga di le masome a mabedi fa a simolola go busa, mme a busa dingwaga di le lesome le borataro mo Jerusalema; mme a se ka a dira se se siameng mo matlhong a ga Jehofa Modimo wa gagwe jaaka Dafide rraagwemogologolwane.+  Mme a tsamaya mo tseleng ya dikgosi tsa Iseraele,+ le morwawe a mo ralatsa molelo,+ go ya ka dilo tse di makgapha+ tsa ditšhaba tse Jehofa a neng a di leleka ka ntlha ya bomorwa Iseraele.  Mme a nna a ntsha setlhabelo le go kuisa musi wa setlhabelo mo mafelong a a kwa godimo+ le mo dithoteng+ le kafa tlase ga setlhare sengwe le sengwe se se golang thata.+  Ke yone nako eo Resine+ kgosi ya Siria le Peka+ morwa Remalia kgosi ya Iseraele ba neng ba tla go lwa le Jerusalema mme ba dikanyetsa Ahase, mme ba ne ba sa kgone go lwa.+  Ka nako eo Resine kgosi ya Siria a busetsa Elathe kwa Edoma, mme morago ga moo a tlosa Bajuda mo Elathe; mme Baedoma bone ba tsena mo Elathe+ ba nna teng go tla go fitlha mo letsatsing leno.  Ka jalo Ahase a roma barongwa kwa go Tigelathe-pilesere+ kgosi ya Asiria, a re: “Ke motlhanka wa gago+ le morwao. Tlhatloga o tle go mpoloka+ mo seatleng sa kgosi ya Siria le mo seatleng sa kgosi ya Iseraele, ba ba ntsogologelang.”  Ka jalo Ahase a tsaya selefera le gouta tse di neng di fitlhelwa kwa ntlong ya ga Jehofa le mo matlotlong a ntlo ya kgosi+ mme a romelela kgosi ya Asiria pipamolomo.+  Foo kgosi ya Asiria ya mo reetsa mme kgosi ya Asiria ya tlhatlogela kwa Damaseko+ ya e thopa+ mme ya isa batho ba teng botshwarwa kwa Kire,+ mme ya bolaya Resine.+ 10  Go tswa foo Kgosi Ahase+ a ya go kopana le Tigelathe-pilesere+ kgosi ya Asiria kwa Damaseko, mme a bona sebeso+ se se neng se le mo Damaseko. Ka jalo Kgosi Ahase a romelela moperesiti Urija polane ya sebeso le sebopego sa sebeso malebana le gotlhe kafa se dirilweng ka gone.+ 11  Urija+ moperesiti a aga sebeso.+ Moperesiti Urija a aga sebeso go ya ka sotlhe se Kgosi Ahase a neng a se rometse go tswa Damaseko, go fitlha ka nako ya fa Kgosi Ahase a boa kwa Damaseko. 12  E rile kgosi e boa kwa Damaseko, kgosi ya bona sebeso; mme kgosi ya simolola go atamela sebeso+ le go dira ditshupelo mo go sone.+ 13  Mme ya tswelela go kuisa tshupelo ya yone e e fisiwang+ musi+ le tshupelo ya yone ya dijo tsa ditlhaka+ le go tshela tshupelo+ ya yone ya senō le go kgatšha madi a ditlhabelo tsa kabalano tse e neng e le tsa gagwe mo sebesong. 14  Mme sebeso sa kgotlho+ se se neng se le fa pele ga ga Jehofa jaanong ya se atametsa ya se ntsha fa pele ga ntlo, fa gare ga sebeso sa yone le ntlo ya ga Jehofa,+ mme ya se baya kafa ntlheng ya bokone ya sebeso sa yone. 15  Mme Kgosi Ahase a tswelela go mo laela, ene moperesiti Urija,+ a re: “O dire tshupelo e e fisiwang ya musi wa moso+ mo sebesong se segolo, le tshupelo ya dijo tsa ditlhaka ya maitseboa+ le tshupelo e e fisiwang ya kgosi+ le tshupelo ya gagwe ya dijo tsa ditlhaka le tshupelo e e fisiwang ya batho botlhe ba lefatshe le tshupelo ya bone ya dijo tsa ditlhaka le ditshupelo tsa bone tsa senô; mme madi otlhe a tshupelo e e fisiwang le madi otlhe a setlhabelo o a kgatšhe mo go sone. Fa e le sebeso sa kgotlho sone, e tla nna sengwe se ke tshwanetseng go se akanyetsa.” 16  Mme moperesiti Urija+ a dira go ya ka sotlhe se Kgosi Ahase a neng a se laetse.+ 17  Go feta moo, Kgosi Ahase a kgaolakgaola+ matlhakore+ a dikolotsana+ mme a ntsha megotšwana mo go tsone,+ mme a folosa lewatle+ mo dipoong tsa kgotlho+ tse di neng di le kafa tlase ga lone a le baya mo bophaphathong jwa leje. 18  Mme loobo lwa sabata lo ba neng ba lo agile mo ntlong le tsela ya botseno e e kafa ntle ya kgosi a di sutisa mo ntlong ya ga Jehofa ka ntlha ya kgosi ya Asiria. 19  Fa e le ditiragalo tse dingwe tsotlhe tsa ga Ahase, se a se dirileng, a ga di a kwalwa mo bukeng+ ya ditiragalo tsa metlha ya dikgosi tsa Juda? 20  La bofelo Ahase a lala le borraagwemogologolwane mme a fitlhwa le borraagwemogologolwane mo Motseng wa ga Dafide;+ mme Hesekia+ morwawe a simolola go busa mo boemong jwa gagwe.

Dintlha Tse di Kwa Tlase