1 Samuele 27:1-12

27  Le fa go ntse jalo, Dafide a bua mo pelong ya gagwe a re: “Jaanong ke tla nyelediwa ke seatla sa ga Saulo letsatsi lengwe. Ga go na sepe se se botoka ka nna fa e se gore ke falolele+ kwa lefatsheng la Bafilisitia;+ mme Saulo o tla itlhoboga go tlhola a mpatla mo karolong yotlhe ya naga ya Iseraele,+ mme ruri ke tla falola mo seatleng sa gagwe.”  Ka jalo Dafide a nanoga mme ene le banna ba le makgolo a le marataro+ ba ba neng ba na le ene ba fetela kwa go Akishe+ morwa Maoke, kgosi ya Gathe.  Mme Dafide a tswelela go nna le Akishe kwa Gathe, ene le banna ba gagwe, mongwe le mongwe le ba ntlo ya gagwe,+ Dafide le basadi ba gagwe ba babedi, Ahinoame+ mosadi wa Mojesereele le Abigaile,+ mosadi wa ga Nabale, mosadi wa Mokaremele.  Fa nako e ntse e tsamaya ga begelwa Saulo gore Dafide o ne a tshabetse kwa Gathe, ka jalo a se ka a tlhola a ya go mmatla+ gape.  Foo Dafide a raya Akishe a re: “Jaanong, fa ke bone kamogelo mo matlhong a gago, a ba nneye lefelo mo go mongwe wa metse e e kwa lefelong la selegae, gore ke nne gone; gonne ke ka ntlha yang fa motlhanka wa gago a tshwanetse go nna mo motseng wa segosi le wena?”  Ka jalo Akishe a mo naya Sikelage+ mo letsatsing leo. Ke gone ka moo Sikelage a neng a nna wa dikgosi tsa Juda go tla go fitlha mo letsatsing leno.  Mme palo ya malatsi a Dafide a neng a a nna mo lefelong la selegae la Filisitia e ne ya nna ngwaga le dikgwedi di le nnè.+  Mme Dafide a nanoga le banna ba gagwe gore ba tlhasele Bageshure+ le Bagirise le Baamaleke;+ gonne ba ne ba nna mo lefatsheng le le neng le tloga kwa Telame+ le ya go fitlha kwa Shure+ le go ya kwa lefatsheng la Egepeto.  Mme Dafide a kgemetha lefatshe, mme a se ka a boloka monna le fa e le mosadi a tshela;+ mme a tsaya matsomane le metlhape le diesele le dikamela le diaparo, mme morago ga moo a boa a tla mo go Akishe. 10  Foo Akishe a re: “Lo tlhasetse kae gompieno?” Fa a rialo Dafide a re:+ “Kwa borwa jwa Juda+ le kwa borwa jwa Bajerameele+ le kwa borwa jwa Bakene.”+ 11  Monna le mosadi, Dafide o ne a sa boloke ope a tshela go ba tlisa mo Gathe, a re: “Gore ba se ka ba bolela ka rona, ba re: ‘Dafide o ne a dira ka tsela eno.’”+ (Mme tsela eno e ne e le one mokgwa wa gagwe ka malatsi otlhe a a neng a a nna kwa lefelong la selegae la Bafilisitia.) 12  Ka gone Akishe a dumela+ Dafide, a ipolelela a re: “Kwantle ga pelaelo o fetogile sebodu mo bathong ba gagabo Iseraele;+ mme o tla tshwanelwa ke go nna motlhanka wa me ka bosakhutleng.”

Dintlha Tse di Kwa Tlase