1 Samuele 19:1-24

19  La bofelo Saulo a bua le Jonathane morwawe le batlhanka ba gagwe botlhe ka-ga go bolaya+ Dafide.  Mme Jonathane, morwa Saulo, o ne a kgatlhwa thata ke Dafide.+ Ka jalo Jonathane a bolelela Dafide, a re: “Saulo rre o batla gore o bolawe. Jaanong tsweetswee o nne o itisitse mo mosong, mme o nne mo sephiring o nne o iphitlhile.+  Mme nna, ke tla tswa mme ke eme fa thoko ga ga rre kwa tshimong kwa o tla bong o le teng, mme nna ke tla go buelela mo go rre, ruri ke tla bona se se tla diragalang, mme ke tla tlhomamisa gore ke a go bolelela.”+  Ka jalo Jonathane a bua molemo+ kaga Dafide kwa go Saulo rraagwe mme a mo raya a re: “A kgosi e se ka ya leofela+ motlhanka wa yone Dafide, gonne ga a go leofela le ditiro tsa gagwe di ntse di le molemo thata mo go wena.+  O ne a tsenya moya wa gagwe mo seatleng sa gagwe+ mme a itaya Mofilisitia a mo latlhela fa fatshe,+ mo Jehofa o neng a tlisetsa Iseraele yotlhe poloko e kgolo.+ O ne wa go bona mme o ne wa ipela. Jaanong ke ka ntlha yang fa o tshwanetse go leofela madi a a se nang molato ka go dira gore Dafide a bolaelwe+ lefela?”+  Foo Saulo a utlwa lentswe la ga Jonathane, mme Saulo a ikana: “Jaaka Jehofa a tshedile,+ ga a kitla a bolawa.”  Morago ga moo Jonathane a bitsa Dafide mme Jonathane a mmolelela mafoko ano otlhe. Foo Jonathane a tlisa Dafide kwa go Saulo, mme a tswelela a le fa pele ga gagwe fela jaaka pele.+  Fa nako e ntse e tsamaya ga tsoga ntwa gape mme Dafide a betsega a ya go tlhabana le Bafilisitia a ba kgemetha ka polao e kgolo,+ mme ba tshaba fa pele ga gagwe.+  Mme moya o o bosula+ wa ga Jehofa wa nna mo go Saulo fa a ne a ntse mo ntlong ya gagwe lerumo le le mo seatleng sa gagwe, fa Dafide a ne a letsa mmino ka seatla sa gagwe. 10  Ka gone Saulo a batla go tlhabelela Dafide mo loboteng+ ka lerumo, mme a tila+ fa pele ga ga Saulo, mo a neng a tlhaba lobota ka lerumo. Mme Dafide ene a tshaba gore a tle a falole mo bosigong joo.+ 11  Moragonyana Saulo a romela barongwa+ kwa ntlong ya ga Dafide gore ba e dise ba bo ba mmolaye mo mosong;+ mme Mikale mosadi wa gagwe a bolelela Dafide, a re: “Fa o sa falotse moya wa gago mo bosigong jono, ka moso o tla bo o le monna yo o bolailweng.” 12  Ka yone nako eo Mikale a dira gore Dafide a fologe ka fensetere, gore a tsamaye a tshabe mme a falole.+ 13  Go tswa foo Mikale a tsaya setshwantsho sa modingwana wa terafime+ a se baya mo sekanamelong, le letlowa la maodi a dipodi a le baya fa go nnang tlhogo ya gagwe gone, mme morago ga moo a se bipa ka seaparo. 14  Jaanong Saulo a romela barongwa go ya go tsaya Dafide, mme mosadi a re: “O a bobola.”+ 15  Ka jalo Saulo a romela barongwa go ya go bona Dafide, a re: “Mo tliseng kwa go nna a le mo sekanamelong sa gagwe ke tle ke dire gore a bolawe.”+ 16  E rile barongwa ba tsena, bonang, setshwantsho sa modingwana wa terafime se ne se le mo sekanamelong le letlowa la maodi a dipodi le le fa go nnang tlhogo ya gagwe gone. 17  Foo Saulo a raya Mikale a re: “Ke ka ntlha yang fa o ne o ntsietsa+ jaana, mo o neng wa tsamaisa mmaba wa me+ gore a falole?” Mme Mikale a raya Saulo a re: “Ene ka nosi o ne a nthaya a re, ‘Ntsamaise! Ke tla bo ke go bolaelang?’” 18  Mme Dafide ene, a tshaba+ a ba a falola mme a goroga kwa go Samuele kwa Rama.+ Mme a mmolelela sotlhe se Saulo a neng a se mo dirile. Foo ene le Samuele ba tsamaya, mme ba nna kwa Naiothe.+ 19  Fa nako e ntse e tsamaya pego e ne ya tla kwa go Saulo, e re: “Bona! Dafide o kwa Naiothe kwa Rama.” 20  Saulo a akofa a romela barongwa gore ba ye go tsaya Dafide. E rile ba bona ba bagolwane ba baporofeti ba porofeta, le Samuele a eme mo boemong jwa gagwe a ba okametse, moya+ wa Modimo wa nna mo batlhankeng ba ga Saulo, mme le bone ba simolola go itshwara jaaka baporofeti.+ 21  E rile ba bolelela Saulo ka gone, ka yone nako eo a romela barongwa ba bangwe, mme le bone ba simolola go itshwara jaaka baporofeti. Ka jalo Saulo a romela barongwa gape, setlhopha sa boraro, mme le bone ba simolola go itshwara jaaka baporofeti. 22  La bofelo le ene a ya kwa Rama. E rile a fitlha kwa mogobeng o mogolo o o kwa Seku, a simolola go botsa a re: “Samuele le Dafide ba kae?” Ba araba ba re: “Kwa Naiothe+ kwa Rama.” 23  Mme a tsamaya go tloga foo go ya Naiothe kwa Rama, mme moya+ wa Modimo wa nna mo go ene, ee, ene, mme a nna a tsamaya a ba a tswelela a itshwere jaaka moporofeti go fitlha a goroga kwa Naiothe kwa Rama. 24  Mme a apola diaparo tsa gagwe mme le ene a itshwara jaaka moporofeti fa pele ga ga Samuele, mme a namalala fa fatshe a sa ikatega letsatsi leo lotlhe le bosigo+ joo jotlhe. Ke gone ka moo ba neng ba re: “A Saulo le ene ke mongwe wa baporofeti?”+

Dintlha Tse di Kwa Tlase