1 Samuele 16:1-23

16  Kgabagare Jehofa a raya Samuele a re: “O tla hutsafalela Saulo+ ka lobaka lo lo kae, fa nna, kafa letlhakoreng le lengwe, ke mo ganne gore a se tlhole a busa e le kgosi ya Iseraele?+ Tlatsa lonaka lwa gago ka leokwane+ mme o tsamaye. Ke tla go roma kwa go Jese+ wa Mobethelehema, ka gonne ke ineile+ kgosi mo gare ga bomorwawe.”  Mme Samuele a re: “Ke ka tsamaya jang? Fela fa Saulo a utlwa ka gone ruri o tla mpolaya.”+ Mme Jehofa a tswelela a re: “O tsamaye ka kgongwana ya motlhape, mme o re, ‘Ke tletse go isetsa Jehofa setlhabelo.’+  Mme o biletse Jese kwa setlhabelong; mme nna, ke tla go itsise se o tshwanetseng go se dira,+ mme o ntloletse+ yo ke go mo tlhaolelang.”  Mme Samuele a dira se Jehofa a se buileng. Fa a tla mo Bethelehema+ banna ba bagolwane ba motse ba simolola go roroma+ fa ba kopana le ene, mme ba re: “A go tla ga gago go raya kagiso?”+  Fa ba rialo a re: “Go raya kagiso. Ke tletse go isetsa Jehofa setlhabelo. Iitshepiseng,+ mme lo tle le nna kwa setlhabelong.” Foo a itshepisa Jese le bomorwawe, mme morago ga foo a ba biletsa kwa setlhabelong.  Mme ga diragala gore, fa ba tsena mme a bona Eliabe,+ a akofa a re: “Ruri motlodiwa wa gagwe o fa pele ga ga Jehofa.”  Mme Jehofa a raya Samuele a re: “O se ka wa leba ponalo ya gagwe le boleele jwa gagwe,+ gonne ke mo ganne. Gonne [Modimo ga a bone]+ kafa motho a bonang ka gone, ka gonne motho fela o bona se se bonalang mo matlhong;+ mme Jehofa ene, o bona se pelo+ e leng sone.”  Foo Jese a bitsa Abinadabe+ mme a dira gore a fete fa pele ga ga Samuele, mme a re: “Le yono Jehofa ga a mo tlhopha.”  Go tswa foo Jese a dira gore Shammahe+ a fete, mme a re: “Le yono Jehofa ga a mo tlhopha.” 10  Ka jalo Jese a fetisa bomorwawe ba ba supa fa pele ga ga Samuele; mme Samuele a nna a raya Jese a re: “Jehofa ga a tlhopha bano.” 11  La bofelo Samuele a raya Jese a re: “A bano ke bone botlhe basimane?” Foo a re: “Go sa ntse go setse yo mmotlana thata go fitlha jaanong,+ mme bona! o fudisa dinku.”+ Fa a rialo Samuele a raya Jese a re: “A ko o rome mme o mo lere, ka gonne ga re kitla re nna gore re je go fitlha a tla fano.” 12  Ka jalo a roma mme a dira gore a tle. Jaanong o ne a le mohibidu,+ lekau le le nang le matlho a mantle e bile le na le ponalo e ntle. Foo Jehofa a re: “Nanoga, mo tlotse, gonne yo ke ene!”+ 13  Ka jalo Samuele a tsaya lonaka lwa leokwane+ mme a mo tlotsa mo gare ga bomorwarraagwe. Mme moya wa ga Jehofa wa simolola go dira mo go Dafide go tloga ka letsatsi leo go ya pele.+ Moragonyana Samuele a nanoga a ya kwa Rama.+ 14  Mme moya wa ga Jehofa ka boone wa tloga+ mo go Saulo, mme moya o o bosula+ o o tswang kwa go Jehofa wa mo tshwenya. 15  Mme batlhanka ba ga Saulo ba simolola go mo raya ba re: “Bona jaanong, moya o o bosula wa Modimo o a go tshwenya. 16  Tsweetswee, a morena wa rona a laele batlhanka ba gago fa pele ga gago gore ba batle motho yo o setswerere+ yo o letsang harepa.+ Mme go diragale gore, fa moya o o bosula wa Modimo o tla mo go wena, o tla letsa ka seatla sa gagwe, mme ruri go tla nna molemo ka wena.” 17  Ka jalo Saulo a raya batlhanka ba gagwe a re: “Tsweetswee nnayang motho yo o letsang sentle, mme lo mo tlise kwa go nna.”+ 18  Mme mongwe wa batlhokomedi a araba a re: “Bona! Ke bone kafa morwa Jese wa Mobethelehema a leng setswerere ka gone mo go letseng,+ e bile ke monna yo o seganka,+ yo o thata le monna wa ntwa+ le sebui se se botlhale+ le monna yo o bopegileng sentle,+ e bile Jehofa o na le ene.”+ 19  Foo Saulo a romela barongwa kwa go Jese a re: “A ko o romele kwa go nna Dafide morwao, yo o ntseng le letsomane.”+ 20  Ka jalo Jese a tsaya esele, senkgwe le modutwana wa beine+ le potsane a di romela ka seatla sa ga Dafide morwawe kwa go Saulo.+ 21  Ka jalo Dafide a tla mo go Saulo mme a mo direla;+ mme a mo rata thata, a ba a nna motsholadibetsa wa gagwe.+ 22  Ka gone Saulo a romela kwa go Jese, a re: “Tsweetswee, mma Dafide a tswelele a ntirela, gonne o bone kamogelo mo matlhong a me.” 23  Mme go ne go diragala gore, fa moya wa Modimo o tla mo go Saulo, Dafide o ne a tsaya harepa a bo a letsa ka seatla sa gagwe; mme Saulo o ne a gololesega a bo a ikutlwa sentle, mme moya o o bosula o ne o tloga mo go ene.+

Dintlha Tse di Kwa Tlase