1 Dikgosi 4:1-34

4  Mme Kgosi Solomone a tswelela e le kgosi mo Iseraele+ yotlhe.  Mme tseno ke dikgosana+ tse a neng a na le tsone: Asaria morwa Sadoke,+ moperesiti;  Elihorefe le Ahija, bomorwa Shisha, bakwaledi;+ Jehoshafate+ morwa Ahilude, mokwadi;  Benaia+ morwa Jehoiada o ne a okametse masole,+ mme Sadoke le Abiathare+ e ne e le baperesiti;  Asaria morwa Nathane+ o ne a okametse bathusi, mme Sabude morwa Nathane e ne e le moperesiti, tsala+ ya kgosi;  Ahishare o ne a okametse ba ntlo, mme Adonirame+ morwa Abada, a okametse ba ba pateleditsweng go tsenela tiro+ e e boima.  Solomone o ne a na le bathusi ba le lesome le bobedi mo Iseraele yotlhe, mme ba ne ba tlamela kgosi le ba ntlo ya gagwe ka dijo. E ne e tla nna boikarabelo jwa mongwe le mongwe gore a ntshe dijo kgwedi e le nngwe mo ngwageng.+  Mme ano e ne e le maina a bone: Morwa Hure, mo kgaolong e e dithaba ya Eferaime;+  morwa Dekere, kwa Makasa le kwa Shaalabime+ le Bethe-shemeshe+ le Elone-bethe-hanane; 10  morwa Hesede, kwa Arubothe (o ne a na le Sokho le lefatshe lotlhe la Hefere);+ 11  morwa Abinadabe, mokoloko otlhe wa dithaba tsa Dora+ (Tafathe, morwadia Solomone, ya nna mosadi wa gagwe); 12  Baane morwa Ahilude, kwa Taanake+ le Megido+ le kwa Bethe-sheane+ yotlhe, e e fa thoko ga Sarethane+ fa tlase ga Jesereele,+ go simolola kwa Bethe-sheane go ya Abele-mehola+ go fitlha kwa kgaolong ya Jokemeame;+ 13  morwa Gebere, mo Ramothe-gileade+ (o ne a na le metse ya megope ya ga Jaire+ morwa Manase, e e mo Gileade;+ o ne a na le kgaolo ya Aregobe,+ e e kwa Bashana:+ metse e megolo e le masome a marataro e e nang le dipota le mephakalego ya kgotlho); 14  Ahinadabe morwa Ido, kwa Mahanaime;+ 15  Ahimaase, kwa Nafetali+ (le ene, o ne a tsaya Basemathe, morwadia Solomone, go nna mosadi);+ 16  Baana morwa Hushai, kwa Ashera+ le Bealothe; 17  Jehoshafate morwa Parua, kwa Isakare;+ 18  Shimei+ morwa Ela, kwa Benjamine;+ 19  Gebere morwa Uri, kwa lefatsheng la Gileade,+ lefatshe la ga Sihone+ kgosi ya Baamore,+ le la ga Oge+ kgosi ya Bashana,+ mme go ne go na le mothusi a le mongwe yo o okametseng bathusi ba bangwe botlhe ba ba neng ba le mo nageng eo. 20  Juda le Iseraele ba ne ba le bantsi, jaaka moshawa o o fa lewatleng ka ntlha ya bontsintsi jwa bone,+ ba ja ba nwa e bile ba ipela.+ 21  Fa e le Solomone ene, o ne a itshupa e le mmusi mo magosing otlhe go simolola kwa Nokeng+ go ya kwa lefatsheng la Bafilisitia le go ya kwa molelwaneng wa Egepeto. Ba ne ba tlisa dimpho gape ba direla Solomone ka malatsi otlhe a botshelo jwa gagwe.+ 22  Mme dijo tsa ga Solomone tsa letsatsi le letsatsi e ne e le dilekanyo tsa koro+ di le masome a mararo tsa bupi jo bo boleta le dilekanyo tsa koro di le masome a marataro tsa bupi, 23  dikgomo di le lesome tse di nonneng le dikgomo di le masome a mabedi tse di fudisitsweng le dinku di le lekgolo, kwantle ga dikgama+ tse ditonanyana le ditshephe+ le dikgama le digweetsane tse di nontshitsweng. 24  Gonne o ne a laola sengwe le sengwe se se ka kwano ga Noka,+ go tswa Tifesa go ya Gasa,+ le dikgosi tsotlhe tse di ka kwano ga Noka;+ mme a nna le kagiso+ mo kgaolong nngwe le nngwe ya gagwe, gotlhe fela. 25  Mme batho ba Juda+ le ba Iseraele ba tswelela go nna ka polokesego,+ mongwe le mongwe ka fa tlase ga mofine wa gagwe le ka fa tlase ga setlhare sa gagwe sa mofeige,+ go tswa Dana go ya Beere-sheba,+ malatsi otlhe a ga Solomone. 26  Mme Solomone a nna le masakana a le dikete di le masome a manè a dipitse+ tsa dikara tsa gagwe+ le bapalami ba dipitse ba le dikete di le lesome le bobedi. 27  Mme bathusi bano+ ba ne ba tlamela Kgosi Solomone ka dijo le mongwe le mongwe yo o atamelang tafole ya ga Kgosi Solomone, mongwe le mongwe mo kgweding ya gagwe. Ga ba a tlogela sepe se tlhaela. 28  Mme ba nna ba tlisa barele le lotlhaka lwa dipitse le lwa ditlhopha tsa dipitse+ gongwe le gongwe, mongwe le mongwe go ya kafa a tlhomilweng ka gone.+ 29  Mme Modimo a tswelela a naya Solomone botlhale+ le tlhaloganyo+ ka selekanyo se segolo thata le pelo e e bulegileng,+ jaaka moshawa o o fa losing lwa lewatle.+ 30  Mme botlhale jwa ga Solomone bo ne bo le bogolo+ go gaisa botlhale jwa botlhe ba Botlhaba+ le go gaisa botlhale jotlhe jwa Egepeto.+ 31  Mme o ne a le botlhale go gaisa motho ope o sele, go gaisa Ethane+ wa Moesera le Hemane+ le Kalekole+ le Dareda bomorwa Mahole; mme go tuma ga gagwe go ne go le mo ditšhabeng tsotlhe tse di mo tikologong yotlhe.+ 32  Mme o ne a kgona go bua diane+ di le dikete di le tharo, mme dipina tsa gagwe+ di ne tsa nna sekete le botlhano. 33  O ne a na le go bua ka ditlhare, go simolola ka mosedara o o kwa Lebanona+ go fitlha ka mosiama+ o o tlhogang mo loboteng; mme o ne a na le go bua ka diphologolo+ le ka dibopiwa tse di fofang+ le ka dilo+ tse di tsamayang le ka ditlhapi.+ 34  Mme ba nna ba tswa mo ditšhabeng tsotlhe go tla go utlwa botlhale jwa ga Solomone,+ le e leng go tswa kwa dikgosing tsotlhe tsa lefatshe tse di neng di utlwile ka botlhale jwa gagwe.+

Dintlha Tse di Kwa Tlase