1 Dikgosi 2:1-46

2  Mme malatsi a ga Dafide a atamela a gore a swe;+ mme a laela Solomone morwawe, a re:  “Ke tsamaya ka tsela ya lefatshe lotlhe,+ mme o nonofe+ o itshupe o le monna.+  Mme o boloke boikarabelo jwa gago mo go Jehofa Modimo wa gago ka go tsamaya mo ditseleng tsa gagwe,+ ka go boloka melao ya gagwe, ditaolo tsa gagwe le ditshwetso tsa gagwe tsa boatlhodi+ le ditshupo tsa gagwe, go ya ka se se kwadilweng mo molaong wa ga Moshe,+ gore o tle o dire ka botlhale mo go sengwe le sengwe se o se dirang le gongwe le gongwe kwa o retologelang teng;  gore Jehofa a tle a diragatse lefoko la gagwe le a le buileng malebana le nna+ a re, ‘Fa bomorwao+ ba ka tlhokomela tsela ya bone ka go tsamaya+ fa pele ga me ka boammaaruri+ ka pelo ya bone yotlhe+ le ka moya wa bone otlhe, ga go na go kgaolwa motho ope wa gago gore a se ka a nna mo setulong sa bogosi sa Iseraele.’+  “Mme wena ka bowena gape o itse sentle gore Joabe morwa Seruia o ntirileng+ ka se a se dirileng balaodi ba babedi ba masole a Iseraele,+ Abenere morwa Nere le Amasa+ morwa Jethere,+ fa a ne a ba bolaya mme a baya madi+ a ntwa mo nakong ya kagiso a bo a baya madi a ntwa mo moitlamong wa gagwe o o neng o le mo dinôkeng tsa gagwe le mo go bompaatšhane ba gagwe ba ba neng ba le mo dinaong tsa gagwe.  Mme o dire go ya ka botlhale jwa gago,+ mme o se ka wa letla meriri ya gagwe e mesweu ya fologela mo Sheole+ ka kagiso.+  “Mme o supe bopelonomi jwa lorato mo go bomorwa Barisilai+ wa Mogileade, mme ba nne mo gare ga ba ba jang mo tafoleng ya gago;+ gonne ke yone tsela e ba neng ba nkatamela+ ka yone fa ke ne ke tshaba fa pele ga ga Abesalome morwarrago.+  “Mme bona, Shimei+ morwa Gera wa Mobenjamine+ yo o tswang Bahurime o na le wena, mme ke ene yo o neng a mphutsa+ ka phutso e e botlhoko mo letsatsing la fa ke ne ke ya Mahanaime;+ mme ke ene yo o neng a tla go nkgatlhantsha kwa Joredane,+ mo e leng gore ke ne ka mo ikanela ka Jehofa, ka re, ‘Ga ke na go go bolaya ka tšhaka.’+  Jaanong o se ka wa mo tlogela a sa otlhaiwa,+ gonne o monna yo o botlhale+ e bile o itse sentle gore o tshwanetse go mo dira eng, mme o folosetse meriri ya gagwe e mesweu+ mo Sheole ka madi.”+ 10  Go tswa foo Dafide a lala le borraagwemogologolwane+ mme a fitlhwa mo Motseng wa ga Dafide.+ 11  Mme malatsi a Dafide a busitseng mo Iseraele ka one e ne e le dingwaga di le masome a manè.+ Mo Heberone+ o ne a busitse dingwaga di le supa,+ mme mo Jerusalema o ne a busitse dingwaga di le masome a mararo le boraro.+ 12  Mme Solomone ene, a nna mo setulong sa bogosi sa ga Dafide rraagwe;+ mme ka bonya ka bonya bogosi jwa gagwe jwa tlhomamisiwa thata.+ 13  Fa nako e ntse e tsamaya Adonija morwa Hagithe a tla kwa go Bathe-sheba,+ mmaagwe Solomone. Foo a re: “A go tla ga gago ke ga kagiso?” mme a araba a re: “Ke ga kagiso.”+ 14  Mme a tswelela a re: “Ke na le kgang le wena.” Ka jalo a re: “Bua.”+ 15  Mme a tswelela a re: “Wena o itse sentle gore bogosi bo tshwanetse e ka bo e nnile jwa me, le gore Iseraele yotlhe e ne e lebisitse sefatlhego sa yone mo go nna gore ke nne kgosi;+ mme bogosi bo ne jwa fetoga ya nna jwa ga morwarre, ka gonne go ne go tswa kwa go Jehofa gore e nne jwa gagwe.+ 16  Jaanong ke go lopa topo e le nngwe. O se ka wa faposa+ sefatlhego sa me.” Ka jalo a mo raya a re: “Bua.” 17  Mme a tswelela a re: “Tsweetswee, bolelela kgosi Solomone (gonne a ka se fapose sefatlhego sa gago) gore a nneye Abishage+ wa Moshunema+ go nna mosadi wa me.” 18  Bathe-sheba a araba a re: “Go siame! Nna ka bonna ke tla go buelela kwa kgosing.” 19  Ka jalo Bathe-sheba a tla kwa go Kgosi Solomone go buelela Adonija+ mo go ene. Kgosi ya akofa ya ema+ go ya go mo kgatlhantsha mme ya mo ikobela.+ Go tswa foo ya nna mo setulong sa yone sa bogosi mme ya dira gore mmaagwe kgosi a beelwe setulo sa bogosi, gore a tle a nne kafa mojeng wa gagwe.+ 20  Mme a re: “Ke na le topo e le nngwe e nnye e ke e dirang mo go wena. O se ka wa faposa sefatlhego sa me.” Ka jalo kgosi ya mo raya ya re: “E dire mma; gonne ga ke na go faposa sefatlhego sa gago.” 21  Mme a tswelela a re: “Mma Abishage wa Moshunema a newe Adonija morwarrago go nna mosadi wa gagwe.” 22  Fa a rialo Kgosi Solomone a araba a raya mmaagwe a re: “Ke ka ntlha yang fa o kopela Adonija Abishage wa Moshunema? Mo kopele le bogosi+ (ka gonne ke morwarre yo mogolo mo go nna),+ ene le moperesiti Abiathare+ le Joabe+ morwa Seruia.”+ 23  Foo Kgosi Solomone a ikana ka Jehofa, a re: “E kete Modimo o ka ntirela jalo, wa ba wa oketsa,+ fa Adonija a ne a sa bue selo seno+ kgatlhanong le moya wa gagwe. 24  Mme jaanong, jaaka Jehofa a tshedile+ yo o ntlhomamisitseng thata+ e bile a mpoloka ke ntse mo setulong sa bogosi sa ga Dafide rre+ le yo o ntiretseng ntlo+ fela jaaka a buile,+ gompieno Adonija o tla bolawa.”+ 25  Ka yone nako eo Kgosi Solomone a roma Benaia+ morwa Jehoiada; mme a mo wela godimo, mo a neng a swa.+ 26  Mme kgosi ya raya Abiathare+ moperesiti ya re: “Ya kwa Anathothe+ kwa masimong a gago! Gonne o tshwanelwa ke loso;+ mme mo letsatsing leno ga ke na go go bolaya, ka gonne o ne wa tshola letlole la Morena Molaodimogolo Jehofa+ fa pele ga ga Dafide rre,+ le ka gonne o bogisegile nako yotlhe e rre a bogisegileng+ ka yone.” 27  Ka jalo Solomone a leleka Abiathare gore a se ka a nna moperesiti wa ga Jehofa, go diragatsa lefoko la ga Jehofa le a neng a le buile kgatlhanong le ntlo ya ga Eli+ kwa Shilo.+ 28  Mme pego ya goroga kwa go Joabe+—gonne Joabe ka boene o ne a sekametse mo go saleng Adonija+ morago, le mororo a ne a sa sekamela mo go saleng+ Abesalome morago—oabe a tshabela kwa mogopeng+ wa ga Jehofa mme a simolola go ngangatlela dinaka tsa sebeso.+ 29  Foo Kgosi Solomone a bolelelwa go twe: “Joabe o tshabetse kwa mogopeng wa ga Jehofa, mme o ntse teng fa thoko ga sebeso.” Ka jalo Solomone a roma Benaia morwa Jehoiada, a re: “Tsamaya, o ye go mo wela godimo!”+ 30  Ka jalo Benaia a tla mo mogopeng wa ga Jehofa mme a mo raya a re: “Kgosi e buile jaana, ‘Tswa!’” Mme a re: “Nnyaa! Gonne fano+ ke teng fa ke tla swelang teng.” Fa a rialo Benaia a busetsa lefoko kwa kgosing, a re: “Joabe o buile jaana, mme o nkarabile jaana.” 31  Go tswa foo kgosi ya mo raya ya re: “Dira fela jaaka a buile mme o mo wele godimo; o mo fitlhe mme o ntshe mo go nna le mo ntlong ya ga rre madi+ a Joabe a a tsholotseng go sa tshwanela.+ 32  Mme eleruri Jehofa o tla busetsa madi a gagwe mo tlhogong ya gagwe,+ ka gonne o ne a wela banna ba le babedi godimo ba ba siameng le ba ba botoka go mo gaisa,+ mme a ba bolaya ka tšhaka fa rre Dafide a sa ka a itse ka gone,+ e leng, Abenere+ morwa Nere molaodi wa masole a Iseraele+ le Amasa+ morwa Jethere molaodi wa masole a Juda.+ 33  Mme madi a bone a tshwanetse go boela mo tlhogong ya ga Joabe le mo tlhogong ya bana ba gagwe ka bosakhutleng;+ mme Dafide+ le bana ba gagwe le ntlo ya gagwe le setulo sa gagwe sa bogosi ba tla nna le kagiso ka bosakhutleng e e tswang kwa go Jehofa.”+ 34  Go tswa foo Benaia morwa Jehoiada a tlhatloga+ mme a mo wela godimo a mmolaya;+ mme a fitlhwa mo ntlong ya gagwe mo nageng. 35  Foo kgosi ya baya Benaia+ morwa Jehoiada mo boemong jwa gagwe gore a okamele masole;+ mme kgosi ya baya moperesiti Sadoke mo boemong jwa ga Abiathare.+ 36  La bofelo kgosi ya roma gore go bidiwe Shimei+ mme ya mo raya ya re: “Ikagele ntlo kwa Jerusalema, mme o nne koo o se ka wa tswa koo o ya kwa lefelong leno le lele. 37  Mme go tla diragala gore mo letsatsing le o tswang ka lone mme o kgabaganya mokgatšha o o phothoselang wa Kiderona,+ o itse ka tlhomamo gore ruri o tla swa.+ Molato wa madi a gago o tla nna mo tlhogong ya gago.”+ 38  Fa a rialo Shimei a raya kgosi a re: “Lefoko leo le molemo. Fela jaaka morena wa me kgosi a buile motlhanka wa gago o tla dira jalo.” Mme Shimei a nna mo Jerusalema malatsi a le mantsi. 39  Mme ga diragala kwa bokhutlong jwa dingwaga di le tharo gore batlhanka ba babedi+ ba ga Shimei ba tshabele kwa go Akishe+ morwa Maaka kgosi ya Gathe;+ mme batho ba bolelela Shimei, ba re: “Bona! Batlhanka ba gago ba kwa Gathe.” 40  Ka yone nako eo Shimei a nanoga a belesa esele ya gagwe mme a ya kwa Gathe kwa go Akishe go ya go batla batlhanka ba gagwe; mme morago ga moo Shimei a tsamaya mme a tlisa batlhanka ba gagwe go tswa kwa Gathe. 41  Foo Solomone a bolelelwa go twe: “Shimei o dule mo Jerusalema a ya Gathe mme o boile.” 42  Foo kgosi ya roma gore go bidiwe+ Shimei mme ya mo raya ya re: “A ke ne ka se ka ka go ikanisa ka Jehofa gore ke go tlhagise,+ ke re, ‘Mo letsatsing le o tswelang kwa ntle ka lone mme o ya fano le fale o itse ka tlhomamo gore ruri o tla swa,’ mme a ga o a nthaya wa re, ‘Lefoko le ke le utlwileng le molemo’?+ 43  Ke ka ntlha yang fa o sa ka wa boloka ikano ya ga Jehofa+ le taolo e ke e go neileng ka tsela e e masisi?”+ 44  Mme kgosi ya raya Shimei ya re: “Wena ruri o itse botlhoko jotlhe jo pelo ya gago e bo itseng sentle jo o neng wa bo direla Dafide rre;+ mme Jehofa ruri o tla busetsa botlhoko jo o bo dirileng mo tlhogong ya gago.+ 45  Mme Kgosi Solomone o tla segofadiwa,+ le setulo sa ga Dafide sa bogosi se tla itshupa se tlhomamisitswe thata fa pele ga ga Jehofa ka bosaengkae.”+ 46  Fa a sena go rialo kgosi ya laela Benaia morwa Jehoiada, yo o neng a tswa mme a mo wela godimo, mo a neng a swa.+ Mme bogosi bo ne jwa tlhomamisiwa thata mo seatleng sa ga Solomone.+

Dintlha Tse di Kwa Tlase