1 Dikgosi 17:1-24

17  Mme Elija+ wa Motisheba yo o tswang mo banning ba Gileade+ a raya Ahabe a re: “Jaaka Jehofa Modimo wa Iseraele yo ke emeng+ fa pele ga gagwe a tshedile,+ mo dingwageng tseno ga go na go nna le monyo le fa e le pula,+ fa e se fela ka taelo ya lefoko la me!”+  Jaanong lefoko+ la ga Jehofa la tla kwa go ene, le re:  “Tloga fano, mme o fetole tsela ya gago o ye ntlheng ya botlhaba mme o iphitlhe+ kwa mokgatšheng o o phothoselang wa Kerithe o o kwa botlhaba jwa Joredane.  Mme go tla diragala gore o nwe+ mo mokgatšheng o o phothoselang, mme ruri ke tla laela magakabe+ gore a go tlamele ka dijo teng koo.”+  Ka yone nako eo a tsamaya a dira go ya kafa lefokong la ga Jehofa,+ ka jalo a tsamaya a ya go nna fa mokgatšheng o o phothoselang wa Kerithe o o kwa botlhaba jwa Joredane.  Mme magakabe a ne a mo tlisetsa senkgwe le nama mo mosong le senkgwe le nama mo maitseboeng, mme a nna a nwa+ mo mokgatšheng o o phothoselang.  Mme ga diragala kwa bokhutlong jwa malatsi a a rileng gore mokgatšha o o phothoselang o kgale,+ ka gonne go ne go sa na pula epe e kgolo mo lefatsheng.  Jaanong lefoko la ga Jehofa la tla kwa go ene, le re:+  “Nanoga, ya kwa Sarepate,+ e e leng ya Sidona, mme o nne teng. Bona! Ruri ke tla laela mosadi teng, motlholagadi, gore a go tlamele ka dijo.” 10  Ka jalo a nanoga a ya kwa Sarepate mme a tla mo kgorong ya motse; mme bona! mosadi, motlholagadi, o ne a le foo a rwalela dikgong. Ka jalo a tlhaeletsa kwa go ene a re: “Tsweetswee, ntlela metsinyana ka sejana gore ke nwe.”+ 11  E rile a tswa a ya go tla le one, a tlhaeletsa kwa go ene a re: “Tsweetswee, ntlela senkgwenyana+ ka seatla sa gago.” 12  Foo a re: “Jaaka Jehofa Modimo wa gago a tshela,+ ga ke na kuku e kgolokwe,+ fa e se fela bupi jo bo lekanang seatla+ mo nkgong e kgolo le leokwane le lennye+ mo nkgong e nnye; mme ke rwalela dikgong di le mmalwanyana, mme ke tshwanetse go tsena ke ye go direla nna le morwaake sengwe, re tla se ja re bo re swa.”+ 13  Go tswa foo Elija a mo raya a re: “O se ka wa boifa.+ Tsena, dira go ya ka lefoko la gago. Ntirela kuku e kgolokwe pele+ ka se se leng teng foo, mme o e ntlisetse, mme o ka nna wa direla wena le morwao sengwe morago ga moo. 14  Gonne Jehofa Modimo wa Iseraele o buile jaana, ‘Nkgo e kgolo ya bupi ga e na go kgaritlhega, le nkgo e nnye ya leokwane ga e na go kgaritlhega go fitlha letsatsi le Jehofa a nesang pula e kgolo mo godimo ga lefatshe ka lone.’”+ 15  Ka jalo a tsamaya mme a dira go ya ka lefoko la ga Elija; a tswelela go ja, mosadi mmogo le ene le ba ntlo ya gagwe, malatsi a le mantsi.+ 16  Nkgo e kgolo ya bupi ga e a ka ya kgaritlhega, le nkgo e nnye ya leokwane ga e a ka ya kgaritlhega,+ go ya ka lefoko la ga Jehofa le a neng a le buile ka Elija. 17  Mme ga diragala gore morago ga dilo tseno morwa wa mosadi yono, mong wa ntlo, a bobola, mme pobolo ya gagwe ya nna botlhoko thata mo e leng gore go ne go se na moya o o setseng mo go ene.+ 18  Foo a raya Elija a re: “Ke tshwanetse go dira eng ka wena,+ monna wa Modimo wa boammaaruri? O tlile kwa go nna go nkgakolola+ boleo jwa me le go bolaya morwaake.” 19  Mme a mo raya a re: “Nnaya morwao.” Go tswa foo a mo tsaya mo sehubeng sa mosadi a mo isa kwa ntlwaneng e e kwa borulelong,+ kwa a neng a nna teng, a mmaya mo sekanamelong sa gagwe.+ 20  Mme a simolola go bitsa Jehofa a re: “Tlhe Jehofa Modimo+ wa me, a gape o tshwanetse go tlisa kutlobotlhoko mo motlholagading yo ke agileng le ene ke le moeng ka go bolaya morwawe?” 21  Mme a namalala mo godimo ga ngwana+ gararo a bo a bitsa Jehofa a re: “Tlhe Jehofa Modimo wa me, tsweetswee, dira gore moya+ wa ngwana yono o boele mo teng ga gagwe.” 22  La bofelo Jehofa a reetsa lentswe la ga Elija,+ mme moya wa ngwana wa boela mo teng ga gagwe mme a tshela.+ 23  Jaanong Elija a tsaya ngwana a mo folosa kwa ntlwaneng e e kwa borulelong a mo tsenya mo ntlong mme a mo naya mmaagwe; mme Elija go tswa foo a re: “Bona, morwao o a tshela.”+ 24  Foo mosadi yono a raya Elija a re: “Jaanong, eleruri, ke a itse gore o monna wa Modimo+ le gore lefoko la ga Jehofa le le mo molomong wa gago le boammaaruri.”+

Dintlha Tse di Kwa Tlase