1 Dikgosi 12:1-33

12  Mme Rehoboame+ a ya kwa Shekema, gonne Iseraele yotlhe e ne e tlile kwa Shekema+ go mo dira kgosi.  Mme ga diragala gore fela fa Jeroboame+ morwa Nebate a utlwa seo fa a ne a sa ntse a le kwa Egepeto (ka gonne o ne a tshabile ka ntlha ya ga Kgosi Solomone, gore Jeroboame a tle a nne kwa Egepeto),+  ba roma gore a bidiwe. Morago ga moo Jeroboame le phuthego yotlhe ya Iseraele ba tla mme ba simolola go bua le Rehoboame, ba re:+  “Rrago ene, o ne a thatafatsa jokwe+ ya rona, jaanong wena dira gore tirelo e e thata ya ga rrago le jokwe ya gagwe e e boima e a neng a e baya mo go rona e nne motlhofo,+ mme re tla go direla.”+  Foo a ba raya a re: “Tsamayang malatsi a le mararo mme lo boele kwa go nna.”+ Ka jalo batho ba tsamaya.  Kgosi Rehoboame a simolola go gakololana le banna ba bagolwane+ ba ba neng ba ntse ba direla Solomone rraagwe fa a ne a sa ntse a tshela, a re: “Lo gakolola gore batho bano+ ba fetolwe jang?”  Ka jalo ba bua le ene, ba re: “Fa gompieno o ka itshupa o le motlhanka wa batho bano mme wa ba direla,+ o tla ba araba le go bua le bone ka mafoko a a molemo;+ mme eleruri ba tla nna batlhanka ba gago ka metlha.”+  Le fa go ntse jalo, a tlogela kgakololo ya banna ba bagolwane e ba neng ba mo gakolotse ka yone, mme a simolola go gakololana le makawana a a neng a godile le ene,+ a e neng e le one a mo direlang.+  Mme a ba raya a re: “Lo gakolola+ gore re arabe jang setšhaba seno se se buileng le nna, se re, ‘Tlhofofatsa+ jokwe e rrago a e beileng mo go rona’?” 10  Makau a a neng a godile le ene a bua le ene, a re: “O bue jaana+ le batho bano ba ba buileng le wena, ba re, ‘Rrago ene, o dirile jokwe ya rona boima, mme wena, re e tlhofofaletse’; o bue le bone jaana, ‘Monwana wa me o monnye ruri o tla nna mokima go feta dinôka+ tsa ga rre. 11  Mme jaanong rre ene o ne a lo pega jokwe e e boima; mme nna, ke tla oketsa jokwe ya lona.+ Rre ene, o ne a lo kgwathisa ka dime, mme nna, ke tla lo kgwathisa ka dime tse di nang le mafuto.’”+ 12  Mme Jeroboame le batho botlhe ba tla mo go Rehoboame mo letsatsing la boraro, fela jaaka kgosi e ne e buile, e re: “Lo boeleng mo go nna mo letsatsing la boraro.”+ 13  Mme kgosi ya simolola go araba batho ka bogale,+ le go tlogela kgakololo ya banna ba bagolwane ba ba neng ba mo gakolotse.+ 14  Mme ya tswelela go bua le bone go ya ka kgakololo ya makau,+ ya re: “Rre ene, o ne a dira jokwe ya lona boima, mme nna, ke tla oketsa jokwe ya lona. Rre ene, o ne a lo kgwathisa ka dime, mme nna, ke tla lo kgwathisa ka dime tse di nang le mafuto.”+ 15  Mme kgosi ya se ka ya reetsa batho,+ ka gonne dilo di ne di direga kafa go rateng ga ga Jehofa,+ gore a tle a diragatse lefoko la gagwe+ le Jehofa a neng a le buile le Jeroboame morwa Nebate ka Ahija+ wa Moshilo. 16  Fa Iseraele yotlhe e bona gore kgosi e ne e sa ba reetsa, foo batho ba fetola kgosi, ba re: “Re na le kabelo efe mo go Dafide?+ Gape ga go na boswa bope mo go morwa Jese. Ya kwa medimong ya gago,+ wena Iseraele. Jaanong iponele ntlo ya gago, wena Dafide!”+ Ka jalo Iseraele ya simolola go ya kwa megopeng ya gagwe. 17  Fa e le bomorwa Iseraele ba ba neng ba nna mo metseng ya Juda bone, Rehoboame a tswelela go ba busa.+ 18  Morago ga moo Kgosi Rehoboame a roma Adorame,+ yo o neng a okametse ba ba neng ba pateleditswe go tsenela tiro e e boima,+ mme Iseraele yotlhe ya mo kgobotletsa ka maje,+ mme a swa. Kgosi Rehoboame ka boene a kgona go palama kara a tshabela kwa Jerusalema. 19  Baiseraele ba nna ba tlhanogela+ ntlo ya ga Dafide go tla go fitlha mo letsatsing leno.+ 20  Mme ga diragala gore fela fa Iseraele yotlhe e utlwa gore Jeroboame o ne a boile, ba akofa ba roma gore a bilediwe kwa kopanong mme ba mo dira kgosi ya Iseraele yotlhe.+ Ga go na bape ba ba neng ba nna balatedi ba ntlo ya ga Dafide kwantle ga lotso lwa Juda lo le losi.+ 21  E rile Rehoboame a goroga kwa Jerusalema,+ ka yone nako eo a phutha botlhe ba ntlo ya Juda le lotso lwa ga Benjamine,+ banna ba ba tlhophilweng ka kelotlhoko ba le dikete di le lekgolo le masome a le robedi ba ba nonofileng gore ba ye ntweng, gore ba tlhabane le ntlo ya Iseraele, ba tle ba busetse bogosi mo go Rehoboame morwa Solomone. 22  Foo lefoko la Modimo wa boammaaruri la tla mo go Shemaia+ monna wa Modimo+ wa boammaaruri, le re: 23  “Raya Rehoboame morwa Solomone kgosi ya Juda le ntlo yotlhe ya Juda le Benjamine le batho ba bangwe botlhe o re, 24  ‘Jehofa o buile jaana: “Lo se ka lwa tlhatloga lwa ya go tlhabana le bomorwarraalona bomorwa Iseraele.+ A mongwe le mongwe wa lona a boele kwa ntlong ya gagwe, gonne selo seno se diregile ka go rata ga me.”’”+ Ka jalo ba utlwa lefoko la ga Jehofa,+ mme ba boela gae go ya ka lefoko la ga Jehofa.+ 25  Mme Jeroboame a aga Shekema+ mo kgaolong e e dithaba ya Eferaime mme a nna mo go yone. Go tswa foo a tswa teng mme a aga Penuele.+ 26  Jeroboame a simolola go bua jaana mo pelong ya gagwe:+ “Jaanong bogosi bo tla boela kwa ntlong ya ga Dafide.+ 27  Fa batho bano ba tswelela go ya go ntsha ditlhabelo mo ntlong ya ga Jehofa kwa Jerusalema,+ pelo ya batho bano ruri e tla boela kwa moreneng wa bone, Rehoboame kgosi ya Juda; mme eleruri ba tla mpolaya+ ba bo ba boela kwa go Rehoboame kgosi ya Juda.” 28  Ka gone kgosi ya batla kgakololo+ e bo e dira dinamane tse pedi+ tsa gouta mme ya raya batho ya re: “Go thata mo go lona gore lo tlhatlogele kwa Jerusalema. Modimo wa gago ke yo,+ wena Iseraele, yo o go ntshitseng kwa lefatsheng la Egepeto.”+ 29  Foo a baya e nngwe mo Bethele,+ mme e nngwe a e baya kwa Dana.+ 30  Mme selo seno sa baka boleo,+ le batho ba simolola go ya fa pele ga e e kwa Dana. 31  Mme a simolola go dira ntlo ya mafelo a a kwa godimo+ le go dira baperesiti mo bathong ka kakaretso, ba e neng e se ba bomorwa Lefi.+ 32  Mme Jeroboame a dira moletlo mo kgweding ya borobedi mo letsatsing la bolesome le botlhano la kgwedi, jaaka moletlo o o neng o le mo Juda,+ gore a tle a dire ditshupelo mo sebesong se a neng a se dirile mo Bethele,+ go ntshetsa dinamane tse a neng a di dirile setlhabelo; mme a tlhoma baperesiti ba mafelo a a kwa godimo a a neng a a dirile kwa Bethele gore ba direle. 33  Mme a simolola go dira ditshupelo mo sebesong se a neng a se dirile mo Bethele mo letsatsing la bolesome le botlhano mo kgweding ya borobedi, mo kgweding e a neng a e itlhametse a le nosi;+ mme a direla bomorwa Iseraele moletlo le go dira ditshupelo mo sebesong gore a kuise mosi+ wa setlhabelo.

Dintlha Tse di Kwa Tlase