Go ntse go na le Basupi ba ga Jehofa kwa Turkey fa e sa le ka 1931. Ba ile ba bogisiwa go fitlha ka bo1980. Mo dingwageng tse di ileng tsa latela, puso e ile ya letla Basupi gore ba dire ditiro tsa bodumedi mme gone e gana go ba kwadisa semolao. Seo se ile sa fetoga ka July 2007 fa dikgotlatshekelo tsa kwa Turkey di ne di ntsha katlholo ya gore Basupi ba ga Jehofa ba kwadisiwe semolao. Gone jaanong Basupi ba koo ba kgona go dira ditiro tsa bodumedi ka kgololesego.

Le fa go ntse jalo, puso ya Turkey e gataka ditshwanelo tsa batho ba digakolodi tsa bone di sa ba letleng go tsenela bosole. E setse e le lobaka jaanong Basupi ba ga Jehofa ba ntse ba bilediwa gore ba tsenele bosole, ba sekisiwa, ba laelwa go duela madi a mantsi le go tsenngwa mo kgolegelong fela ka gonne ba gana go tsenela bosole. Fa e sa le ka 2001, Kgotlatshekelo ya Yuropa ya Ditshwanelo Tsa Batho (ECHR) e ntshitse dikatlholo di le tharo tse mo go tsone e neng e dumalana le Basupi ba ba neng ba gana go tsenela bosole. Gape ka 2012, Komiti ya Ditshwanelo Tsa Batho ya UN e ile ya ntsha katlholo e nngwe gape e e buelelang Basupi. Le fa go ntse jalo, puso ya Turkey e sa ntse e sekisa makawana a Basupi a a ganang go tsenela bosole.

Ka 2003, Turkey e ne e ya fetola molao wa ditsha go thusa batho ba e seng Mamoseleme gore ba age mafelo a kobamelo. Mme gone, badiredi ba mmasepala le ba dikgotlatshekelo ba ganne go ntsha ditsha gore Basupi ba ga Jehofa ba age Diholo Tsa Bogosi tse ba tla “kopanelang mo go tsone.” Basupi ba tlhatlhetse dikgetsi di le pedi kwa ECHR malebana le kgang eno.