Ka July 20, 2017, Kgotlatshekelo ya Kgaolo ya Sovietskiy kwa Oryol e ile ya oketsa nako e Dennis Christensen a tshwanetseng go e leta mo kgolegelong fa a emetse go seka ka November 23, 2017. Rre Christensen yo o tlholegang kwa Denmark e bile e le Mosupi wa ga Jehofa, o tshwerwe ka May 25 fa mapodise a lephata le le kgethegileng la FSB le a mangwe a ne a tlhasela phuthego e e neng e kopane ka kagiso kwa Oryol.

Babueledi ba ga Rre Christensen ba ile ba tsenya kopo ya gore Rre Christensen a gololwe e bile ba ne ba rulagantse go duela gore a ntshiwe mo kgolegelong. Kgotlatshekelo e ile ya gana go golola Rre Christensen le fa go se na rekoto ya gore o kile a tlola molao kgotsa a dirisa dikgoka mo nakong e e fetileng.

Kgotlatshekelo e okeditse malatsi a ga Rre Christensen mo kgolegelong mme e dirile jalo morago ga tshwetso e e dirilweng ke kgotlatshekelo ya boikuelo ka July 17. Tshwetso eo e ne e dumalana le katlholo e e dirilweng ke Kgotlatshekelo ya Makgaolakgang ya go tswala mekgatlho yotlhe ya Basupi ba ga Jehofa mo Russia. Puso ya Russia e na le dingwaga di feta lesome e ntse e bogisa Basupi e re ba kotsi mo setšhabeng mme tshwetso ya kgotlatshekelo ya makgaolakgang e ba neile tetla ya go thibela tiro ya Basupi.

Kate M. Byrnes, yo o thusang moemedi wa mokgatlho o o emelang ditshwanelo tsa batho kwa Yuropa o ne a re: “Re akabaditswe ke tshwetso e e dirilweng ke Kgotlatshekelo ya Makgaolakgang ka July 17 e e dumalanang le kgang ya gore tiro ya Basupi ba ga Jehofa e thibelwe le gore Ofisi ya Lekala ya Basupi ba ga Jehofa le mekgatlho ya one e le 395 di tswalwe ka gonne go twe di kotsi mo setšhabeng. Go utlwisa botlhoko tota gore Basupi ba ga Jehofa ba feta 175 000 kwa Russia ba ka sekisediwa fela gore ba batla go obamela [Modimo wa bone]. Kgang ya go dirisa molao wa dilo tse di kotsi mo setšhabeng go tlhorontsha maloko a madumedi a a nang le kagiso kwa Russia e a tshwenya.”