Fetela kwa tshedimosetsong

JULY 18, 2017
RUSSIA

Kgotlatshekelo ya Boikuelo ya Russia e Dumalana le Tshwetso ya go Thibela Tiro ya Basupi ba ga Jehofa

Kgotlatshekelo ya Boikuelo ya Russia e Dumalana le Tshwetso ya go Thibela Tiro ya Basupi ba ga Jehofa

Ka July 17, 2017, Kgotlatshekelo ya Makgaolakgang ya Russia e ile ya bontsha sentle gore ga e tlotle tumalano e e e dirileng le dinaga tse dingwe, ya go sireletsa kgololesego ya batho ya bodumedi ka go se phimole katlholo e e thibelang tiro ya Basupi ba ga Jehofa. Tshwetso eo e ile ya thibela kobamelo ya Basupi ba ga Jehofa mo nageng yotlhe.

Baatlhodi ba bararo ba ba sekasekang dikgetsi tsa boikuelo kwa Kgotlatshekelong ya Makgaolakgang, ba ne ba gana go reetsa kgetsi ya Basupi ba re tshwetso e e dirilweng ke Moatlhodi Yuriy Ivanenko ka April 20, e siame. Moatlhodi Ivanenko o ile a dumalana le kopo ya Lefapha la Tshiamiso ya gore “Ofisi ya Lekala la Basupi ba ga Jehofa ya mo Russia le mekgatlho ya bodumedi e e okametsweng ke ofisi eno di tswalwe [le gore] dikago tsotlhe tsa mokgatlho ono di newe Puso ya Russia.”

Babueledi ba Ofisi ya Lekala

Tshwetso eno e dira gore Basupi ba ga Jehofa ba feta 175 000 kwa Russia ba ikutlwe ba sa sireletsega. Mmueledi wa Basupi ba ga Jehofa e bong Philip Brumley, o ne a re: “Basupi ba ga Jehofa mo lefatsheng lotlhe ba tshwenyegile ka badumedimmogo kwa Russia. Tshwetso e e dirilweng ke kgotlatshekelo ya boikuelo e naya batho tetla ya gore ba tswelele ba bogisa Basupi ba ga Jehofa mo Russia le go dira gore ba sekisiwe. Ba tlhaolwa mo nageng ya bone.”

Basupi ba ga Jehofa kwa Russia ba tsentse kopo ya go ikuela kwa Kgotlatshekelong ya Yuropa ya Ditshwanelo Tsa Batho le kwa Komiting ya Ditshwanelo Tsa Batho ya Lekgotla la Ditšhaba Tse di Kopaneng. Mme fa go ntse go letilwe, Basupi mo lefatsheng lotlhe ba rapelela gore babusi ba Russia ba fetole mogopolo ka tshwetso eno le gore ba tlotle tshwanelo ya batho ya go nna le kgololesego ya bodumedi, gore Basupi ba kgone go ‘tswelela ba tshela botshelo jo bo sisibetseng le jo bo didimetseng ka boineelo jo bo tletseng jwa bomodimo’ fela jaaka go tlhalosiwa mo lokwalong lwa 1 Timotheo 2:2.