Fetela kwa tshedimosetsong

JUNE 13, 2017
MALAWI

Bana ba Babedi ba Basupi ba ga Jehofa ba Boela Kwa Sekolong

Bana ba Babedi ba Basupi ba ga Jehofa ba Boela Kwa Sekolong

LILONGWE, Malawi—Ka May 3, 2017, bana ba babedi ba Basupi ba ga Jehofa e bong Aaron Mankhamba wa dingwaga tse 18 le Hastings Mtambalika wa dingwaga tse 15, ba ile ba boela kwa sekolong morago ga gore ba lelekiwe kwa Sekolong sa Khombe ka gonne ba ne ba gana go opela pina ya setšhaba. Ba ile ba lelekiwa kwa sekolong ka February 13, 2017. Ba ile ba letlelelwa go boela sekolong fa batsadi ba bone le babueledi ba Basupi ba ga Jehofa ba sena go bua le baemedi ba sekolo.

Baemedi ba ofisi ya Basupi ba ga Jehofa ba ile ba thusiwa ke makwalo a mabedi a puso ya Malawi e kileng ya a kwala. Lekwalo la ntlha ke la 1997 le mo go lone puso ya Malawi e neng e letla Basupi ba ga Jehofa gore ba se ka ba opela pina ya setšhaba. Le lengwe ke la 2017 mme mo go lone puso e laela barutabana gore ba tlotle bodumedi jwa baithuti.

Hastings a re ba boetse sekolong ka nako e e siameng ka gonne ditlhatlhobo tsa bofelo tsa ngwaga di ne di setse di atametse: “Re ne re tshwenyegile tota gore ga re na go kgona go kwala ditlhatlhobo tseno. Tshono eno e tla gangwe fela mo ngwageng.” Fa basha bano ba ne ba sa kgona go kwala ditlhatlhobo tseno, ba ne ba se kitla ba kgona go fetela kwa mophatong o o latelang.

Augustine Semo yo e leng mmueledi wa Basupi ba ga Jehofa kwa Malawi a re: “Baithuti bano ba itumeletse gore ba ile ba kgona go emela se ba se dumelang e bile re leboga botsamaisi jwa sekolo ka tshwetso e bo ileng jwa e dira ya go tlotla tshwanelo ya bana bano le go ba letla gore ba boele sekolong.”

Babegadikgang ba ka Ikgolaganya le:

Kwa Ntlokgolong: David A. Semonian wa mo Ofising ya Tshedimosetso mo nomorong ya +1-845-524-3000

Kwa Malawi: Augustine Semo mo nomorong ya +265-1-762-111