Fetela kwa tshedimosetsong

MOPITLWE 13, 2014
DIKGANG TSA LEFATSHE LOTLHE

Basupi ba ga Jehofa ba Golola Baebele e e Tlhabolotsweng ka Mokwalo o Mogolo

Basupi ba ga Jehofa ba Golola Baebele e e Tlhabolotsweng ka Mokwalo o Mogolo

NEW YORK—Mo maitekong a bone a go dira gore Baebele e fitlhelele batho ba le bantsi, Basupi ba ga Jehofa ba golola kgatiso e e tlhabolotsweng ya mokwalo o mogolo ya Thanolo ya Lefatshe le Lesha ya Dikwalo Tse di Boitshepo ka Seesemane. Go lebeletswe gore kgatiso eno e e gatisiwang kwa United States le Japane e gatisiwe la ntlha ka dikhopi di le 424 000.

Ka Diphalane 5-6, 2013, Basupi ba ile ba golola Thanolo ya Lefatshe le Lesha ya mokwalo o o tlwaelegileng kwa pokanong e e kgethegileng e e neng e gasiwa mo dinageng di le 31. Thanolo e e tlhabolotsweng ya 2013 e na le tshedimosetso e e ntsi go feta thanolo ya 1984. Ka Diphalane 7, 2013, Basupi ba ile ba dira gore thanolo eno e nne teng mo app e e ka dirisiwang mo didirisiweng tsa ileketeroniki tse di farologaneng e e bidiwang JW Library, e e setseng e tserwe ke batho mo Internet ka makgetlo a ka nna dimilione di le 1,4. Thanolo ya Lefatshe le Lesha e e tlhabolotsweng e ka fitlhelwa mo www.jw.org ka mefuta e e farologaneng ya difaele tsa ileketeroniki.

Thanolo ya Lefatshe le Lesha e e tlhabolotsweng, go akaretsa ya ileketeroniki le e e gatisitsweng, e na le ditshupiso di ka nna 60 000, go thusa babadi go tlhaloganya dipego tsa Baebele botoka. Gape e na le di-diagram tsa mebalabala, dimmapa tsa dinaga tse di mo Baebeleng le ditšhate tse di bontshang botshelo jwa batho mo motlheng wa Baebele. Dintlha tse di oketsegileng di tlhalosa melaometheo ya go ranola Baebele le hisitori ya kafa Baebele e neng ya kwalwa le go bolokwa ka gone.

Thanolo ya Lefatshe le Lesha ya 1984 e ne e setse e na le leina la Modimo makgetlo a ka nna 7 000. Le fa go ntse jalo, thanolo e e tlhabolotsweng ya 2013 e akaretsa dipatlisiso tse di dirilweng bosheng tse di bontshang gore leina la Modimo le tlhagelela fa kae mo mekwalong ya seatla ya bogologolo ya Baebele. Ka ntlha ya dipatlisiso tse di dirilweng mo Memenong ya Lewatle le le Suleng le mo mekwalong e mengwe ya seatla ya bogologolo, leina la Modimo le tlhaga makgetlo a mangwe a le marataro mo go Thanolo ya Lefatshe le Lesha e e tlhabolotsweng. Le fitlhelwa mo go Baatlhodi 19:18; 1 Samuele 2:25; 6:3; 10:26; 23:14, 16. Dintlha tse di oketsegileng di tlhalosa kafa leina la Modimo le dirisitsweng ka gone ka Sehebera le ka Segerika sa bogologolo le mo le tlhagang gone mo dithanolong tsa Baebele ka dipuo di le mmalwa.

Basupi ba na le lobaka lo loleele ba ntse ba gatisa, ba anamisa le go ranola Thanolo ya Lefatshe le Lesha, e e tlotlwang ke bakanoki ka tsela e e nepileng ka yone. Thanolo eno e e feletseng e ne ya gololwa la ntlha ka Seesemane ka 1961. Ka 1963, The New York Times e ne ya bega ka kitsiso e e dirilweng kwa kopanong ya Basupi kwa Yankee Stadium, ya gore Thanolo ya Lefatshe le Lesha e tla nna gone ka dipuo tse di oketsegileng di le thataro. Fa e sa le ka nako eo, Basupi ba ne ba ranola thanolo eno ka dipuo di feta 120. Mo dingwageng tsa bosheng, Komiti ya Thanolo ya Baebele ya Lefatshe le Lesha e ile ya tlhabolola Thanolo ya Lefatshe le Lesha e le go tsibogela diphetogo tse di leng gone mo puong ya motlha ono le go tlhalosa mafoko a a rileng a Baebele, se se neng se tla thusa gore e balege le go tlhaloganyesega motlhofo. Thanolo ya Lefatshe le Lesha e e tlhabolotsweng e akaretsa diphetogo tseno tse disha mo go ranoleng Baebele.

J. R. Brown, mmueledi wa Basupi ba ga Jehofa kwa ntlokgolo ya bone ya lefatshe lotlhe, a re: “Go ne go itumedisa go bona dikgatiso tsa ntlha tsa Thanolo ya Lefatshe le Lesha dingwaga di feta 50 tse di fetileng, mme go itumedisa le go feta go bo re na le kgatiso e e tlhabolotsweng ya bosheng. Maikaelelo a rona ke go dira gore Dikwalo Tse di Boitshepo di tlhaloganngwe ke botlhe ka go dirisa puo e e nepileng, e e nang le seriti e bile e le ya motlha wa rona.”

Media Contact(s):

International: J. R. Brown, Office of Public Information, tel. +1 718 560 5000