Fetela kwa tshedimosetsong

JANUARY 22, 2018
ISERAELE

Ditshwantsho Tse di Bontshang Tsela e Basupi ba Bogisitsweng ka Yone ka Nako ya Puso ya Banasi

Ditshwantsho Tse di Bontshang Tsela e Basupi ba Bogisitsweng ka Yone ka Nako ya Puso ya Banasi

TEL AVIV—Go tloga ka November 26 go ya go December 2, 2017, batho ba ka nna 1 700 ba ile ba ya kwa kagong e e tumileng thata e e bidiwang Hatachana. Basupi ba ga Jehofa ba ne ba beile ditshwantsho tse di neng di bontsha batho tsela e ba ileng ba bogisiwa ka yone ka nako ya puso ya Banasi.

Gape go ne go na le bidio le difotho tsa bogologolo go akaretsa le seaparo se se neng se aparwa ke magolegwa. Seaparo seo se dirilwe ke Mosupi yo o ileng a falola fa Basupi ba bolawa ke Banasi. Mo gare go ne go na le ditshwantsho di le 27 tse di pentilweng ke Johannes Steyer (1908-1998). Rre Steyer e ne e le Mosupi wa ga Jehofa mme o ile a nna dingwaga di le lesome mo dikampeng tsa Banasi, go akaretsa kampa ya kwa Buchenwald, Mauthausen, Sachsenburg le ya Sachsenhausen. Ka dingwaga tsa bo1970 o ile a feleletsa go torowa ditshwantsho tsa dilo tse a ileng a di bona fa a le kwa kampeng ya Banasi.

Mosadi a lebile seaparo se se ileng sa dirwa ke Mosupi yo o ileng a falola fa Banasi ba bolaya batho kwa dikampeng tsa bone.

Porofesa Emeritus Yair Auron

Rahisitori wa Moiseraele e bong porofesa Yair Auron yo o direlang kwa Yunibesithing nngwe ya kwa Iseraele o ile a bua jaana fa a tlhalosa botlhokwa jwa go bontsha batho ditshwantsho tseno: “Ke akanya gore baithuti ba dikolo ba tshwanetse go bona ditshwantsho tseno ka gonne ka maswabi batho ba le bantsi ga ba itse sepe ka hisitori ya Basupi ba ga Jehofa. Batho ba mo Iseraele ga ba itse sepe ka Basupi ba ga Jehofa le se se ileng sa ba diragalela ka nako ya puso ya Banasi.”

Mmueledi wa Basupi ba ga Jehofa kwa Iseraele e bong Mauro Trapanese a re: “Ga re batle fela gore batho ba bone tsela e Basupi ba ga Jehofa ba ileng ba boga ka yone ka nako ya puso ya Banasi, gape re eletsa gore ba ithute ntlha nngwe ya botlhokwa. Ka sekai, re lemogile gore batho ba le bantsi ba ne ba sa itse gore Basupi ba ga Jehofa ba ile ba newa tshono ya gore ba tswe mo dikampeng tseo, fa fela ba ne ba ka tlogela bodumedi jwa bone. Go tlhalosetsa batho ntlha eno go thusitse gore ba tswe ba ithutile sengwe ka rona.”

Porofesa Gideon Greif

Porofesa Gideon Greif yo o ileng a ithuta ka hisitori ya kwa Auschwitz a re: “Basupi ba ga Jehofa ke bangwe ba batho ba ba siameng ba ba ileng ba boga botlhoko ka ntlha ya go bo ba gana go tlogela bodumedi jwa bone le go gatelela matswalo a bone.”

Dr. Batya Brutin

Dr. Batya Brutin o ne a bua jaana: “Ke akanya gore go ithuta ka se se ileng sa diragalela Basupi ba ga Jehofa ka nako ya puso ya Banasi go ka re ruta dithuto tsa botlhokwa tse di ka re thusang go fetola lefatshe leno.”

Le fa tiragalo eo e ne e le selo sa letsatsi fela, baemedi ba mekgatlho ya thuto ba ba neng ba tlile go bona ditshwantsho tseo ba ile ba kopa tshedimosetso e e oketsegileng ka Basupi ba ga Jehofa.

Babegadikgang ba ka Ikgolaganya le:

Kwa Ntlokgolong: David A. Semonian wa Ofisi ya Tshedimosetso mo nomorong ya +1-845-524-3000

Kwa Iseraele: Mauro Trapanese mo noromong ya +972-54-568-1912