Fetela kwa tshedimosetsong

JANUARY 30, 2017
COLOMBIA

Setheo sa Thanolo ya Puo ya Diatla se Naya Basupi Sekgele Kwa Colombia

Setheo sa Thanolo ya Puo ya Diatla se Naya Basupi Sekgele Kwa Colombia

Sekgele se se tlotlomatsang Basupi ka ntlha ya matsapa a ba a tsereng go thusa batho ba kwa Colombia ba ba dirisang puo ya diatla ka dibidio tsa Baebele.

BOGOTA, Colombia—Kwa khonfereseng e e neng e tshwerwe ka di 7 go ya go di 9 tsa October 2016, Setheo sa Naga sa Baranodi ba Puo ya Diatla sa kwa Colombia le mekgatlho e mengwe e mebedi, se ne sa naya Basupi ba ga Jehofa sekgele ka ntlha ya dibidio tsa puo ya diatla tse di mo websiting ya bone. E ne e le lekgetlo la ntlha go nna le khonferense ya mofuta ono e e neng e diretswe go thusa batho ba ba dirisang puo ya diatla le ba ba sa boneng kwa Colombia.

Basupi ba ile ba lalediwa gore ba tle go amogela sekgele ka ntlha ya “tiro ya bone e e tswileng diatla ya go rulaganya gore go nne le dibidio tsa bodumedi tse di thusang batho ba kwa Colombia ba ba dirisang puo ya diatla.” Ricardo Valencia López, yo e leng mongwe wa barulaganyi ba tiragalo eno e bile e le poresidente ya Setheo sa Baranodi ba Puo ya Diatla ya kwa Colombia kwa kgaolong ya Coffee Axis, ASINTEC, o ne a tlhalosa gore Basupi ba ga Jehofa ba ile ba lalediwa ka gonne ba “nnile le seabe mo go kgothaletseng batho go ithuta puo ya diatla ka go dira gore go nne le dikgatiso tse ba di dirisang go thusa batho go tlhaloganya tsela e puo ya diatla e ka ithutiwang ka yone.”

Maitemogelo a Basupi a ile a dira gore komiti e e rulagantseng tiragalo eno e ba neye sekgele se sengwe gape.

Ka nako ya khonferense, Basupi ba ile ba tlhalosa maitemogelo a ba ileng ba nna le one fa go tliwa mo tirong ya thanolo. Maitemogelo ao a ile a dira gore komiti e e rulagantseng tiragalo eo e ba neye sekgele se sengwe gape ka ntlha ya tsela e batho ba ileng ba a tsibogela ka yone.

Mongwe wa batho ba ba neng ba le kwa khonferenseng eo e ne e le Cristian David Valencia wa kwa Pereira yo e leng motlhami wa ditshwantsho e bile a bereka ka dibidio. Valencia a re o “gakgamadiwa ke matsapa a magolo a a tsewang ke mokgatlho wa bodumedi” segolobogolo ka gonne Basupi bano ba sa duelwe.

Wilson Torres, yo e leng mmueledi wa Basupi ba ga Jehofa ba kwa Colombia a re: “Dibidio tseno tse di thusang batho ba ba dirisang puo ya diatla e sa le di nna gone go simologa ka 2000. Website ya rona e na le dibidio di feta 400 tse di diretsweng go thusa bagolo, basha le bana ba ba dirisang Puo ya Diatla ya kwa Colombia. Ga re kitla re kgaotsa go dira dibidio tseno tsa Baebele.”

Mo lefatsheng lotlhe, go na le ditlhopha tsa Basupi ba ga Jehofa tse di ranolelang dibidio mo dipuong tsa diatla di le 88. Gape go na le app ya Puo ya Diatla ya JW Library e mo go yone batho ba kgonang go itseela, go rulaganya le go tshameka dibidio mo websiting ya jw.org.

Media Contacts:

International: David A. Semonian, Office of Public Information, +1-845-524-3000

Colombia: Wilson Torres, +57-1-8911530