Fetela kwa tshedimosetsong

Go Thusa Magolegwa

Go Thusa Magolegwa

Letsatsi le letsatsi magolegwa a a kwa dikgolegelong tsa kwa United States a kwalela ofisi ya Basupi ba ga Jehofa makwalo a mantsi, a kopa go rutiwa Baebele.

Re araba dikopo tsa bone ka go rulaganya gore badiredi ba ba mo diphuthegong tse di mo lefelong leo ba ba etele le go ithuta Baebele le batho ba ba mo mafelong a go seng motlhofo go tsena mo go one, jaaka kwa dikgolegelong, kwa maokelong a puso, kwa mafelong a basha le kwa mafelong a mangwe.

Kwa dikgolegelong dingwe, badiredi bano ba tshwara dipokano tsa phuthego ka metlha. Ka sekai, kwa lefelong lengwe batho ba ka nna 32 ba ne ba nna gone kwa puong ya phatlalatsa e e neng e neelwa mo dikgolegelong tse pedi.

Go a kgothatsa go bona kafa dithulaganyo tseno di thusitseng magolegwa ka gone. Monna mongwe wa kwa Indiana, e e kwa United States, yo o neng a atlholelwa go nna botshelo jotlhe mo kgolegelong ka go bo a bolaile motho, o ne a dira diphetogo tse dikgolo mo bothong jwa gagwe mme a kolobediwa go nna Mosupi wa ga Jehofa.

Mosupi yo o neng a ithuta le legolegwa lengwe le le neng le tswaletswe kwa kgolegelong e kgolo ya kwa California, a re: “Ke bone kafa a neng a itshwara ka gone pele a simolola go ithuta Baebele mme ka lemoga le diphetogo tse a neng a di dira. O ne a dira diphetogo tse dikgolo tota gore a tshwanelege go kolobediwa.”

Magolegwa a le mantsi a ne a simolola go tshela go dumalana le boammaaruri jwa Baebele le fa a ne a itse gore go dira jalo go ne go ka tsenya matshelo a one mo kotsing. Ka sekai, mangwe a one a a neng a ikgaogantse le digongwana tse a neng a le mo go tsone a ne a tsenngwa a le nosi mo seleng kgotsa a isiwa kwa dikgolegelong tse dingwe gore a babalesege.

Balaodi ba kgolegelo ba itumedisiwa ke go bona kafa Baebele e fetotseng matshelo a batho ka gone. Bangwe ba bone ba neile Basupi disetifikeite tsa go bontsha kanaanelo le dikgele tsa semolao tsa baithaopi ka ntlha ya tiro ya bone ya go ruta kwa dikgolegelong.