Fetela kwa tshedimosetsong

Diholo Tsa Bogosi di le 1 000—Tiro e Ntse e a Tswelela

Diholo Tsa Bogosi di le 1 000—Tiro e Ntse e a Tswelela

Ka Phatwe 2013, Basupi ba ga Jehofa kwa Philippines ba ne ba fitlhelela kgato e kgolo ya botlhokwa fa Holo ya Bogosi ya bo1 000 e ne e agiwa go dirisiwa thulaganyo e e kgethegileng ya kago. Fela jaaka mo dinageng di le dintsi, gantsi diphuthego tsa kwa Philippines ga di na madi kgotsa maitemogelo a go ikagela Diholo tsa Bogosi kwantle ga thuso. Ka dingwaga di le dintsi, bangwe ba ne ba kopanela mo magaeng a bone, fa ba bangwe bone ba ne ba kopanela mo dikagong tse dinnye tse di dirilweng ka lotlhaka lwa bampuse.

Go oketsega ga palo ya Basupi ba ga Jehofa kwa Philippines le mo dinageng tse dintsi go ne ga dira gore go tlhokege Diholo tsa Bogosi tse di oketsegileng. Ka ntlha ya seno, ka 1999 Setlhopa se se Laolang sa Basupi ba ga Jehofa se ne sa tlhoma thulaganyo ya go aga Diholo tsa Bogosi mo dinageng tse di humanegileng. Mo thulaganyong eno, Basupi ba mo lefelong leo ba ntsha meneelo e ba e kgonang mme e kopanngwa le meneelo e e tswang mo dinageng tse dingwe. Badiri ba ba thapisitsweng ba kago ba rulaganngwa ka ditlhopha go thusa diphuthego go ikagela Diholo tsa Bogosi. Ka Ngwanatsele 2001, thulaganyo eno e e dirisiwang mo lefatsheng lotlhe e ne ya simololwa kwa Philippines.

Iluminado ke leloko la phuthego ya kwa Marilao, Bulacan, kwa Holo ya Bogosi ya bo1 000 e neng ya agiwa gone. O ne a re: “Ruri ke bone bokaulengwe jwa Bokeresete. Ba le bantsi ba ne ba ithaopile—banna le basadi, basha le bagolo. Re ile ra dira mmogo mo letsatsing le le fisang. Le fa re ne re lapile morago ga tiro ya letsatsi, go ne go itumedisa go bona se re se fitlheletseng mmogo.”

Batho ba e seng Basupi le bone ba ne ba kgatlhiwa ke go bona maiteko a baithaopi bano. Mong wa teraka e e neng e tlisitse motlhaba le matlapana kwa setsheng o ne a re: “E kete lo ditshoswane—lo bantsi! Mongwe le mongwe o a thusa. Ke la ntlha ke bona sengwe sa go nna jaana.”

Holo ya Bogosi e e fedileng

Baithaopi ba ne ba fetsa kago mo dibekeng tse di kafa tlase ga tse thataro go tloga ka nako e ba neng ba simolola go aga lobota. Go fetsa kago ya Holo ya Bogosi ka bonako go ne ga letla maloko a phuthego gore ba nne le seabe ka botlalo mo tirong ya botlhokwa ya go rera dikgang tse di molemo tsa Bogosi jwa Modimo.—Mathaio 24:14.

Ellen, leloko le lengwe la phuthego ya lefelo leo, a re: “Re ne re sa kgone go tsena rotlhe mo Holong ya rona ya Bogosi ya pele, mme bontsi jwa rona re ne re tshwanelwa ke go nna kwa ntle. Holo ya Bogosi e ntšha e ntle e bile rotlhe re kgona go nna sentle mme re solegelwa molemo ke thuto le kgothatso e re e newang kwa dipokanong.”