Fetela kwa tshedimosetsong

Dipina ka Dipuo Tse Dintsi

Dipina ka Dipuo Tse Dintsi

Go ranolela pina e le nngwe mo puong e nngwe ke kgwetlho e e seng kana ka sepe. Mme go ranola kopelo yotlhe ya dipina tse 135 ke namane e tona ya tiro.

Basupi ba ga Jehofa ba ne ba dira tiro eno mme mo dingwageng di le tharo ba ne ba ranoletse kopelo yotlhe e ntšha ya Opelelang Jehofa mo dipuong di le 116. Dipuo tse dingwe tse 55 di na le kopelo e e nang le dipina di le 55. Tse dingwe di le mmalwa tsone di sa ntse di tla nna le kopelo eno.

Go Ranola le go Kwala Mafoko a Pina

Basupi ba ga Jehofa ba ranola dikgatiso tsa Baebele ka dipuo di ka nna 600, di le 400 tsa tsone di tlhaga mo Internet. Mme go ranola kopelo e ne e le kgwetlho tota. Ka ntlha yang? Ka gonne le fa mafoko a kopelo ya Opelelang Jehofa a ka ranolelwa mo dipuong tse dintsi, molodi wa pina one ga o fetoge.

Go tlhama mafoko a pina ga go tshwane le go ranola makasine. Ka sekai, fa baranodi ba ranolela makasine wa Tora ya Tebelo mo puong e nngwe, ba lwela go tlhalosa bokao jotlhe jwa Seesemane ka tsela e e utlwalang sentle. Mmino one o farologane.

Kafa o Dirwang ka Gone

Baranodi ba dipina ba dirisa mokgwa o o farologaneng le wa fa ba ranola dikgatiso tse dingwe, ka gonne ba lwela go dirisa mafoko a a nang le bokao, a a monate e bile a sa lebalege.

Mafoko a a dirisiwang mo pineng ya pako a tshwanetse go nna motlhofo gore fa motho a opela a kgone go tlhaloganya bokao le boikaelelo jwa polelwana nngwe le nngwe. Mo puong nngwe le nngwe, mafoko le mmino di tshwanetse go tsamaisana sentle mme go utlwale e kete mafoko ao ke mafoko a seopedi.

Baranodi ba fitlhelela mokgele ono jang? Go na le gore ba ranole dipolelwana tsa kopelo ya Seesemane ya Opelelang Jehofa lefoko ka lefoko, ba kaelwa gore ba kwale mafoko a masha a a tshwereng molaetsa wa konokono wa pina. Le fa ba leka go ranola molaetsa wa Baebele o o mo pineng nngwe le nngwe, ba dirisa mafoko a a tlwaelegileng mo puong ya bone a a motlhofo go tlhaloganngwa le go gakologelwa.

Ba simolola ka go ranola mafoko a pina ya Seesemane jaaka a ntse. Go tswa foo, Mosupi yo o nang le bokgoni jwa go kwala mafoko a dipina o dira gore mafoko a a ranotsweng a nne monate mme a na le bokao. Morago ga moo, setlhopha sa baranodi le batho ba ba balang dikgatiso go bona gore a ga go na diphoso, ba sekaseka se mokwadi wa pina a se kwadileng ba ntse ba le kelotlhoko gore sengwe le sengwe se tsamaisana sentle le Dikwalo.

Basupi ba ga Jehofa lefatshe ka bophara ba ne ba itumelela go amogela buka e ntšha ya dipina, mme ba dipuo tse dingwe le bone ba lebile pele thata go nna le yone.