Fetela kwa tshedimosetsong

Pego ya Ngwaga le Ngwaga ya 2014

Dingwaga di le 100 Bogosi bo ntse bo Busa!

Pego ya Ngwaga le Ngwaga ya 2014

Ka October 4, 2014, batho ba ka nna 19 000 ba ne ba kopane mmogo kwa pokanong ya bo130 ya ngwaga le ngwaga ya Watch Tower Bible and Tract Society of Pennsylvania. Thulaganyo e ne e tshwaretswe kwa Holong ya Kopano ya Basupi ba ga Jehofa kwa Toropong ya Jersey, New Jersey, kwa U.S.A., mme go ne go na le mafelo a le mmalwa a a neng a gokagantswe ka Internet.

Modulasetulo e ne e le Mark Sanderson wa Setlhopha se se Laolang sa Basupi ba ga Jehofa. Mokaulengwe Sanderson o ne a bula pokano eo ka go gatelela ntlha ya gore pokano ya monongwaga e kgethegile fela thata ka gonne go setse go fetile dingwaga di le 100 fa e sa le Bogosi jwa ga Mesia bo tlhomilwe.

Mokaulengwe Sanderson o ne a tlhalosa dilo tsa botlhokwa di le tharo tse di fitlheletsweng ke Bogosi jono mo dingwageng tsa jone tsa ntlha tse 100:

  • Tiro ya go rera e e dirwang mo lefatsheng lotlhe. Jehofa o thusa batho ba gagwe gore ba kgone go anamisa molaetsa wa dikgang tse di molemo tsa Bogosi. Palo ya baboledi e ile ya gola go tswa go dikete di le mmalwa fela ka 1914 go ya go dimilione di feta robedi ka ngwaga wa tirelo wa 2014. Re tla tswelela pele re rera ka tlhagafalo go fitlha Jehofa a re go lekane.

  • Go sirelediwa ga babusiwa ba Bogosi ba le setlhopha. Baeteledipele ba bodumedi le ba dipolotiki ba ile ba re ganetsa botlhoko tota, mo ba ileng ba leka go nyeletsa Basupi ba ga Jehofa gotlhelele. Le fa go ntse jalo, Jehofa o ntse a sireletsa baobamedi ba gagwe e le setlhopha. Go fenya ga rona dikgetsi tsa semolao, go akaretsa le tse di neng tsa isiwa kwa Kgotlatshekelong ya Makgaolakgang ya United States le kwa Kgotlatshekelong ya Yuropa ya Ditshwanelo Tsa Batho, ke bosupi jwa gore Jehofa o ntse a tsweletse go re sireletsa go tla go fitlha ga jaana.

  • Go nna seoposengwe ga batho ba ba farologaneng. Bogosi Jwa Modimo bo ile jwa thusa batho ba ba godileng ka ditsela tse di farologaneng, ba ba tswang mo ditšhabeng tse di farologaneng e bile ba bua dipuo tse di farologaneng, gore ba nne ngata e le nngwe mme ba fenye dikgwetlho tse di farologaneng. Mokaulengwe Sanderson o ne a re: “Ke Jehofa fela a ka dirang gore go nne jalo.” O ile a tlhalosa gore batho ba ba gone mo pokanong eno ba go tsaya e le tshiamelo e e seng kana ka sepe go nna karolo ya pokano eno e e kgethegileng.

Dibidio Tsa Nna Tsala ya ga Jehofa.

Ntlha e e neng ya latela mo pokanong eno, e ne e le dibidio tsa bana tse go fetileng dingwaga di le pedi re ntse re di itumelela. Sa ntlha, Mokaulengwe Sanderson o ne a tshameka bidio e mo go yone bana go ralala lotlhe ba botsolodiwang gore ba ikutlwa jang ka dibidio tseno. Bareetsi ba ne ba amiwa pelo fela thata ke go utlwa bana ba tlhalosa go tswa pelong kafa ba itumelelang ka gone se ba se ithutang mo dibidiong tseno.

Go ne ga tshamekiwa bidio e ntšha ya setlhogo se se reng “Jehofa o Tla Dira Gore O se Ka wa Tshaba.” Bidio eno ya metsotso e le 12 e bua ka pego ya mosetsana wa Moiseraele yo o neng a nna pelokgale mme a bolelela mosadi wa ga Naamane ka Jehofa. (2 Dikgosi 5:1-14) Bidio eo e ne ya tsenngwa mo jw.org ka Mantaga, October 6, 2014, e bile e gone ka dipuo di feta 20.

JW Language.

Mokaulengwe Sanderson o ne a itsise batho ka app eno e ntšha e e tla thusang Basupi ba ga Jehofa ba ba batlang go ithuta puo e sele go atolosa bodiredi jwa bone. E na le mafoko a feta 4 000 ka dipuo di le 18. Bakaulengwe ba ntse ba rulaganya go tsenya mafoko a mangwe, ditsenyeletso tsa mo tshimong mmogo le dilo tse dingwe.

JW Broadcasting.

Bareetsi ba ne ba itumelela go utlwa ka seteishene se sesha sa thelebishene sa mo Internet sa Basupi ba ga Jehofa, se se leng gone ka Seesemane fela. Seteishene seno se gasa go tswa kwa ntlokgolong ya lefatshe lotlhe kwa Brooklyn, New York, U.S.A., mme se bontsha dibidio tsa rona, mmino le diterama tsa Baebele. Mo godimo ga moo, e tla bontsha gape le lenaneo la kgwedi le kgwedi le le tla tshwarwang ke mongwe wa Setlhopha se se Laolang kgotsa bathusi ba dikomiti tsa bone.

Mokaulengwe Sanderson o ne a tshameka bidio eno ka bokhutshwane. Lenaneo leo le le neng le tshwerwe ke Stephen Lett wa Setlhopha se se Laolang le ne le bontsha dipaakanyetso tse di neng tsa dirwa gore seteishene seno se nne gone. JW Broadcasting e ne ya simolola go gasa ka October 6, 2014, mme motho a ka tsena mo tv.jw.org fa a batla go e bona.

“Bogosi—Dingwaga di le 100 Le go Ya Pele.”

Samuel Herd wa Setlhopha se se Laolang e ne e le moanedi mo bidiong e e bontshang kafa Bogosi Jwa Modimo bo ntseng bo tswelela ka gone go re thusa go gola le go tokafatsa tiro ya rona ya go rera. Bidio eno e ne e bontsha ditshwantsho tsa bogologolo, dipontsho le maitemogelo a bakaulengwe ba ba nang le lobaka lo loleele ba tsamaya le phuthego ya ga Jehofa, gape e ne e bontsha matsholo a a neng a dirwa go tlhagisa le go anamisa “Photo-Drama of Creation”; go dirisiwa ga fonokerafa, dikarata tse di neng di na le molaetsa wa Baebele, megwanto ya go anamisa tshedimosetso, dikoloi tse di nang le dibuelagodimo; le dikolo tse di neng di re thapisa gore re kgone go dira tiro ya rona sentle.

Re thusiwa jang ke go akanya ka dilo tse Bogosi bo di fitlheletseng mo dingwageng tsa jone tsa ntlha tse 100? Go dira jalo go dira gore re tseye Bogosi e le selo sa mmatota e bile go dira gore re swegaswege pelo go bona se bo tla se fitlhelelang mo isagweng.

Dipina tse di bakang Jehofa.

David Splane wa Setlhopha se se Laolang o ne a itumedisa batlapokanong fa a ne a itsise ka dithulaganyo tsa go sekaseka sesha buka ya rona ya Opelelang Jehofa. Khabara ya yone e tla tshwana le ya Baebele ya Thanolo ya Lefatshe le Lesha. Tsela ya matsetseleko e buka eno e tla nnang ka yone e bontsha seriti se mmino o nang le sone fa go tla mo kobamelong ya rona.

Mokaulengwe Splane o ne a itsise gore go tla nna le dipina di le mmalwa tse di tla akarediwang mo bukeng ya rona ya kopelo. Mme gone ga re tlhoke go letela kopelo e printiwa gape gore re simolole go di dirisa. Nako le nako fa pina e feditswe, e tla tsenngwa mo jw.org.

Kwa pokanong eo, maloko a Bethele a ne a opela dipina tse tharo tse disha. Mokaulengwe Splane o ne a opedisa khwaere pina e ntšha ya setlhogo se se reng “Bogosi bo a Busa—A bo Tle!” Go ne ga tlhophiwa pina eno go tshwaya dingwaga di le 100 tsa fa e sa le Bogosi bo tlhomilwe. Fa khwaere e sena go opela, bareetsi ba ne ba kopiwa gore ba opele le yone. Moragonyana fa pokano e ntse e tsweletse, khwaere mmogo le bareetsi ba ne ba opela pina e nngwe gape e ntšha ya setlhogo se se reng “Re Neye Bopelokgale.

Potsolotso.

Go ne ga tshamekwa bidio e mo go yone Gerrit Lösch wa Setlhopha se se Laolang a botsolotsang banyalani ba le bararo ba ba nang le lobaka lo loleele ba direla mo Bethele. Ba ile ba tlhalosa diphetogo di le dintsi tse ba ileng ba bona di dirwa mo dingwageng tse di fetileng, tse di bontshang gore batho ba Modimo ba semeletse fela thata. Mokaulengwe Lösch o ne a tlhalosa gore Baebele e ile ya bolelela pele gore phuthego ya Modimo e tla gatela pele mme a kgothaletsa botlhe gore ba tsamaisane le yone.—Isaia 60:17.

“Dilo tse go buiwang ka tsone mo Baebeleng di kaya tiragalo nngwe e e tla diregang mo isagweng.”

Mokaulengwe Splane o ne a tlhalosa lebaka la go bo bosheng jaana dikgatiso tsa rona di sa tlhole di bontsha gore tiragalo nngwe ya mo Baebeleng e bontsha sengwe se se tla diregang mo isagweng.

Mo dingwageng tse di fetileng, phuthego ya ga Jehofa e ne e re banna le basadi ba ba ikanyegang ba go buiwang ka bone mo Baebeleng ba emela Bakeresete ba ba ikanyegang ba motlha wa rona. Gape go ne go twe dipego di le mmalwa tsa Baebele di ne di bolelela pele ditiragalo dingwe tse di tla diragalelang batlhanka ba Modimo mo motlheng wa rona. Boammaaruri ke gore dintlha tseno di ne di kgatlha fela thata. Mme gone, ke ka ntlha yang fa bosheng jaana dikgatiso tsa rona di sa tlhole di dira jalo?

Dikwalo di tlhalosa gore batho kgotsa ditiragalo dingwe tsa mo Baebeleng di tshwantshetsa mongwe kgotsa sengwe se se segolo se se tla diregang mo isagweng. Fa go na le bosupi jwa seo mo Baebeleng, re se amogela re sa okaoke. Mokaulengwe Splane o ne a re: “Mme fa Baebele e sa tlhalose sepe ka kgang eno, le rona ga re a tshwanela go tlhalosa sepe.” Fa re bala pego nngwe mo Baebeleng, re tshwanetse go tila go sekaseka ntlha nngwe le nngwe e re e balang. Mo godimo ga moo, fa re fetsa nako e ntsintsi re batlana le dilo tsa mo Baebeleng tse di emelang sengwe se se tla diregang mo isagweng, re feleletsa re sa ithute sepe se se botlhokwa mo pegong e re e balang—go sa kgathalesege gore a re na le tsholofelo ya go tshela kwa legodimong kgotsa mo lefatsheng.—Baroma 15:4. *

“A o Tla ‘Nna o Disitse’?”

Mokaulengwe Lett o ne a tlotla ka setlhogo seno mme a tlhalosa gore tsela e re tlhaloganyang ka yone setshwantsho sa ga Jesu sa makgarebane a a lesome e tokafaditswe. (Mathaio 25:1-13) Jaanong re se tlhaloganya ka tsela eno: Monyadi ke Jesu mme makgarebane ke Bakeresete ba ba tloditsweng. (Luke 5:34, 35; 2 Bakorintha 11:2) Setshwantsho seno se diragadiwa mo metlheng ya bofelo, mme e tla fitlha kwa setlhoeng ka nako ya pitlagano e kgolo. Jesu o ne a sa reye gore makgarebane a dieleele a kaya batlodiwa ba le bantsi ba ba neng ba se kitla ba tlhola ba ikanyega mme ba tla tlhokang go emisediwa ka ba bangwe. Go na le moo, o ne a tlhagisa batlodiwa gore fela jaaka makgarebane a matlhano a ne a le botlhale mme a mangwe a matlhano a le dieleele, motlodiwa mongwe le mongwe o tshwanetse go itlhophela gore a o tla tswelela a ipaakantse a disitse kgotsa gore a o tla tlogela go ikanyega.

Le mo ntlheng eno, go tla bo go se botlhale gore re sekaseke setshwantsho seno re batlana le sengwe se e se kayang. Go na le moo, go tla go bo le molemo fa re lebelela dithuto tsa botlhokwa tse re ithutang tsone mo go sone. Le fa re ka tswa re na le tsholofelo ya go tshela kwa legodimong kgotsa mo lefatsheng, rotlhe re tshwanetse go phatsimisa lesedi la rona le go ‘nna re disitse.’ (Johane 10:16; Mareko 13:37; Mathaio 5:16) Mongwe le mongwe o tshwanetse go nna a ikanyega a “tlhophe botshelo” ka go nna a disitse e bile a tshwaregile mo bodireding.—Duteronome 30:19.

“Setshwantsho sa Ditalenta.”

Anthony Morris wa Setlhopha se se Laolang o ne a thusa bareetsi go tlhaloganya tsela e e tokafaditsweng e re tlhaloganya ka yone setshwantsho sa ditalenta. (Mathaio 25:14-30) Jaanong re tlhaloganya gore mong mo setshwantshong seno (e bong Jesu) o tla duela batlhanka (batlodiwa ba ba ikanyegang ba ba mo lefatsheng) mo isagweng fa a tla le go ba tsosetsa go ya go tshela kwa legodimong. Fa Jesu a ne a bua ka “motlhanka yo o boikepo le yo o bobodu” o ne a sa kaye gore balatedi ba gagwe ba ba tloditsweng ba le bantsi ga ba kitla ba tlhola ba ikanyega. Go na le moo, o ne a tlhagisa batlodiwa gore ba tshwanetse go nna ba ntshitse matlho dinameng le go tila go nna le mekgwa le ditiro tse di sa siamang tsa motlhanka yono yo o boikepo.

Re ka ithuta eng mo setshwantshong seno? Mong mo setshwantshong seno o naya batlhanka ba gagwe sengwe se se tlhwatlhwakgolo thata. Jesu le ene o neile balatedi ba gagwe sengwe se se tlhwatlhwakgolo thata—tiro ya go rera le go dira batho barutwa. O lebeletse gore rotlhe re dire go tlala seatla mo tirong eno go ya kafa maemo a rona a re letlang ka gone. Mokaulengwe Morris o ne a akgola bareetsi ka tlhagafalo e ba e bontshang mo ditirong tse di direlwang Bogosi.

“Ke Mang yo o Tla Tlogang a Tlhasela Batho ba Modimo?”

Geoffrey Jackson wa Setlhopha se se Laolang o ne a konela thulaganyo ka go tlhalosa setlhogo seno sa bofelo. Mokaulengwe Jackson o ne a tlhalosa gore mo isagweng Gogo wa Magogo o tla tlhasela batho ba Modimo.—Esekiele 38:14-23.

Mo nakong e e fetileng, re ne re tlhaloganya gore Gogo ke leina le lengwe le le dirisiwang fa go buiwa ka Satane Diabolo fa a sena go latlhelwa mo lefatsheng. Le fa go ntse jalo, Mokaulengwe Jackson o ne a ntsha mabaka a go bo tlhaloso eo e sa utlwale sentle. Ka sekai, Jehofa o ne a bolelela pele gore fa Gogo a sena go senngwa, Jehofa o tla naya Gogo “dinonyane tse di jang nama, dinonyane tsa diphuka tsa mofuta mongwe le mongwe, le dibatana tsa naga go nna dijo tsa tsone.” (Esekiele 39:4) Gape Jehofa o ne a bolelela pele gore ‘Gogo le boidiidi jwa gagwe’ ba ne ba tla newa lefelo la go fitlhwa. (Esekiele 39:11) Jaanong dilo tseno di ne di tla diragalela jang Satane ka e le sebopiwa sa semoya? Satane o tla latlhelwa mo moleteng o o se nang bolekanngo ka dingwaga di le 1 000, e seng go jewa kgotsa go fitlhwa. (Tshenolo 20:1, 2) Mo godimo ga moo, morago ga dingwaga tse 1 000, Satane o tla ntshiwa mo moleteng oo mme a ye “go timetsa ditšhaba tse di mo dikhutlong tse nnè tsa lefatshe, Gogo le Magogo.” (Tshenolo 20:7, 8) Go bonala sentle gore Satane a ka se timetse Gogo fa ene ka boene e le Gogo.

Mokaulengwe Jackson o ne a tlhalosa gore Gogo wa Magogo yo go buiwang ka ene mo boporofeting jwa ga Esekiele o tshwanetse a bo a emela ditšhaba tse di ipopileng ngata e le nngwe go tlhasela batho ba Modimo mo isagweng mme e seng Satane. Go ka direga gore tlhaselo ya ga Gogo e tla tshwana le tlhaselo e e dirwang ke “kgosi ya borwa” le ke “dikgosi tsa lefatshe.”—Daniele 11:40, 44, 45; Tshenolo 17:12-14; 19:19.

“Kgosi ya borwa” e emela mang? Re tla dika re bone. Re a bona gore tumelo ya rona e nna e ntse e nonofa fa re bona tsela e re tlhaloganyang dilo ka yone e ntse e tokafadiwa fa bokhutlo bo ntse bo atamela. Ga re tshoge gore re tla tlhaselwa ka gonne re a itse gore fa Gogo wa Magogo a tlhasela, o tla nyelediwa lorelore—fa rona batho ba Modimo re tla nna ka bosakhutleng. *

Konelo.

Mokaulengwe Sanderson o ne a itsise gore Baebele e nnye ya Thanolo ya Lefatshe le Lesha e gone. Mo godimo ga moo, go ntse go dirwa dipaakanyetso tsa Baebele ya mantswe a a gatisitsweng e mo go yone babadi ba tla bong ba bala mafoko a a buiwang ke batho ba mo Baebeleng. E tla tsenngwa mo jw.org, go simolola ka buka ya Mathaio.

Mokaulengwe Sanderson o ne a itsise setlhogo sa ngwaga wa 2015 se se theilweng mo go Pesalema 106:1 e e reng: “Ntshetsang Jehofa ditebogo, gonne o molemo.” O ne a kgothaletsa botlhe gore ba nne ba batlana le mabaka a go leboga Jehofa.

Pina e e konelang pokano e ne e le nngwe ya tse tharo tse disha e e nang le setlhogo se se reng, “Leina la Gago ke Jehofa.” Maloko otlhe a le supa a Setlhopha se se Laolang a ne a tsena mo khwaereng mme a opela le botlhe pina eno e ntšha—e e neng e siametse go konela pokano eno e e kgethegileng!

^ ser. 22 Puo eno le tse dingwe tse pedi tse di latelang di theilwe go tswa mo ditlhogong tse di tla tlhagang mo makasineng wa Tora ya Tebelo ya March 15, 2015.

^ ser. 30 Puo eno e theilwe mo setlhogong se se tla tlhagang mo makasineng wa Tora ya Tebelo ya May 15, 2015.