Ngwaga le ngwaga, batho ba le diketekete ba etela dikago tsa ofisi ya lekala ya United States le ntlokgolo ya lefatshe lotlhe ya Basupi ba ga Jehofa kwa New York State. Mafelo ano a bidiwa Bethele, e leng leina la Sehebera le le kayang “Ntlo ya Modimo.” Baeti ba tla ba tswa kwa mafelong a a gaufi le a a kgakala go tla go bona gore dikgatiso di gatisiwa jang, gore tiro ya rona e rulagantswe jang le go etela ditsala tse di direlang teng. Moeti mongwe wa bosheng o ne a ikemiseditse go tsaya loeto lono.

Marcellus, Mosupi wa ga Jehofa yo o nnang kwa Anchorage, Alaska, U.S.A., o ne a itewa ke seterouku mo dingwageng tse di fetileng mme ka ntlha ya seno o kgona go bua mafoko a se kae fela. O tsamaya ka setulo sa maotwana e bile o tlhoka thuso ka ditiro tsa letsatsi le letsatsi. Marcellus o ne a na le keletso e kgolo ya go etela Bethele ntswa a na le dikgwetlho tseno. Bosheng jaana, o ne a kgona go etela Bethele fela jaaka a ne a eleditse.

Corey, tsala ya ga Marcellus yo o neng a mo thusa go rulaganya loeto loo, a re, “O ne a sa itlhoboge. O ne a letsa ka metlha a batla go itse gore dithulaganyo di tsamaya jang. E re ka mafoko a ga Marcellus a ne a felela fela mo go ‘Ee’ le ‘Nnyaa,’ ke ne ka tshwanelwa ke go mmotsa motseletsele wa dipotso fa a letsa.” Puisano ya bone e ne e le sengwe sa go nna jaana:

“A o batla ke tle koo?”

“Nnyaa.”

“A o batla ke leletse ngaka?”

“Nnyaa.”

“A seno se malebana le loeto lwa gago la go ya Bethele?”

“Ee.”

“Ke tla bo ke tshwanelwa ke go tlhalosa gore dithulaganyo tsa mosepele di tsamaya jang. Ke ne ke itumeletse go mmona a fitlhelela mokgele oo.”

Marcellus o ile a tshwanelwa ke go fenya dikgwetlho dingwe gore a kgone go tsaya loeto loo. E re ka a amogela madi a a seng kalo, o ile a boloka madi dingwaga tse pedi gore a kgone go tsaya mosepele wa dikilometara di le 5 400 go ya New York. E re ka a na le mathata a botsogo, o ile a tshwanelwa ke go tsamaya le mongwe yo o ka mo thusang. Sa bofelo, o ne a tlhoka tetla ya ngaka, e a neng a e newa malatsi a se kae pele ga nako e a neng a tshwanetse go tsamaya ka yone.

Fa Marcellus a goroga kwa New York, o ile a tsamaisiwa mo dikagong tsa Brooklyn, Patterson le Wallkill. O ile a bona metšhini e megolo e e gatisang dibuka le Dibaebele mme o ile a ithuta go le gontsi kafa tiro ya rona e rulagantsweng ka gone. Gape o ile a bona lefelo la dipontsho le le bidiwang “Baebele le Leina la Modimo” le la “Batho ba ba Bidiwang ka Leina la ga Jehofa.” O ile a dira ditsala tse dintsi fa a ntse a tsamaisiwa. Ruri loeto lono lo ne lo sa tshwane le lepe!

Ba le bantsi ba tlhaelwa ke mafoko fa ba bua ka go etela kwa Bethele. Fa Marcellus a ne a bodiwa gore a matsapa a a a tsereng a mo solegetse molemo, o ile a araba fela ka tsela e a kgonang ka yone: “Ee. Ee. Ee!”

Go etela Bethele go ka kgothatsa wena le ba lelapa la gago fela jaaka Marcellus. Botlhe ba ba eletsang go etela nngwe ya diofisi tsa rona tsa makala mo lefatsheng lotlhe ba a amogelwa. Goreng o sa re etele?