Fetela kwa tshedimosetsong

Thuto ya Baebele ke Eng?

Thuto ya Baebele ke Eng?

Basupi ba ga Jehofa ba ithaopela go tshwarela batho thuto ya Baebele e e arabang dipotso tse dintsi tse di akaretsang tseno:

  • Modimo ke mang?

  • A ruri Modimo o a amega ka nna?

  • Nka tokafatsa lenyalo la me jang?

  • Nka bona jang boitumelo mo botshelong?

Fa tlase fano o tla fitlhela dikarabo tsa dipotso tse gantsi batho ba di botsang ka thulaganyo ya rona ya thuto ya Baebele.

Thuto ya Baebele e tshwarwa jang? Re tlhopha ditlhogo tse di jaaka “Modimo” kgotsa “lenyalo” re bo re sekaseka ditemana tse di farologaneng tsa Baebele tse di amanang le kgang eo. Ka go di bapisa, re kgona go bona gore Baebele yotlhe ya reng ka kgang eo, mme ka tsela eo re letla Baebele e itlhalosa ka boyone.

Re dirisa buka ya Totatota Baebele e Ruta Eng? go re thusa go ithuta Baebele. Buka eno e tlhalosa sentle dikgang tse di jaaka gore totatota Baebele ya reng ka Modimo, Jesu le kaga isagwe.

Thuto ya Baebele e ja bokae? Thuto eno ke mahala, e bile ga o duedisiwe dibuka tse di dirisiwang mo thutong.

Thuto e tsaya nako e kae? Batho ba le bantsi ba tlhopha go dirisa lobaka lwa ura beke le beke go ithuta Baebele le rona. Mme gone, go tswa mo go wena gore o batla thuto e nna lobaka lo lo kae. Re tla dira gore e tshwanele maemo a gago.

Go direga eng fa ke kopa thuto ya Baebele? Fa o kopa go tshwarelwa thuto ya Baebele, mongwe wa Basupi ba ga Jehofa o tla go etela ka nako le mo lefelong le le go siametseng. O tla dirisa metsotso e se kae go go bontsha gore thuto e tshwarwa jang. Fa o e rata, o ka tswelela ka yone.

Fa ke dumela go tshwarelwa thuto ya Baebele, a ke tshwanetse go nna mongwe wa Basupi ba ga Jehofa? Nnyaa. Basupi ba ga Jehofa ba rata go ruta batho ka Baebele, mme gone ga re pateletse ope go nna leloko la bodumedi jwa rona. Go na le moo, ka tlotlo re go bontsha fela se Baebele e se buang, re tlhaloganya gore mongwe le mongwe o na le tshwanelo ya go itlhophela gore o batla go dumela eng.—1 Petere 3:15.