Batho ba le bantsi ba tsaya sefapaano e le letshwao la Bokeresete. Le fa gone Basupi ba ga Jehofa e le Bakeresete, ga ba dirise sefapaano mo kobamelong ya bone. Ka ntlha yang?

 Lengwe la mabaka ke gore Baebele ya re Jesu ga a swela mo sefapaanong, mme o swetse mo koteng. Mo godimo ga moo, Baebele e tlhagisa Bakeresete gore ba ‘tshabe kobamelo ya medingwana,’ mo go rayang gore ba se ka ba dirisa sefapaano mo kobamelong.—1 Bakorintha 10:14; 1 Johane 5:21.

 Jesu o ne a bua ntlha eno ya botlhokwa: “Botlhe ba tla itse gore lo barutwa ba me ka seno, fa lo ratana.” (Johane 13:34, 35) Ka go rialo Jesu o ne a bontsha gore lorato lwa go intsha setlhabelo—e seng sefapaano kgotsa setshwantsho sepe fela—ke lone lo lo neng lo tla tlhaola balatedi ba gagwe ba mmatota.