• ƆNƆNYI WA LOOTƆ: 1974

  • WODJA WA LOOTƆ: LETTONIE

  • ƆKƆNDƆ: ONDAWI WA LOWANGO LA MUTUTU

NSHI YAMI YAKETE:

Lakotɔ la Riga, kapitalɛ ka Lettonie. Mama mbakatodia dimi la enondo ami la womoto. Kaanga mbele mama oseka Mupɛ, takatshɔka l’ɔtɛmwɛlɔ paka lo nshi ya fɛtɛ y’ɔtɛmwɛlɔ. Dimi laketawɔka dia wolo ɔmɔtshi wa laadiko wekɔ, koko oko wakimi dikɛnda, lakayashaka l’awui akina wekola yimba.

Etena kakamatoolaka, mama akashihodia dia lekɔ l’akoka w’otshudi wa nkakitola diangɔ dimɔtshi ndo dikakatanya nto. Lam’ele luudu laso laki la diangɔ efula dia ngasɔ, mama akokaka wɔma dia tshikami dimɛ la ngelo. Diakɔ diakandambisha ehomɔ kɛmɔtshi ka lowolo, kakamangɛnangɛnaka nkakitola tshɛ ndo kikakatanya nto. Lo nkamba la ehomɔ kɛsɔ, lakayonga la nsaki kekina, mbuta ate nkɛndjakɛndja mitutu. Mama akatofundja lokombo lo Zelta Mopēds (lɛnɛ akiwɔ la mitutu wa mɔbilɛtɛ), dihole diakawetshaka anto woho wa sɛmanɛ lowango la mitutu. Lakatatɛ sɛmanɛ lowango la mɔbilɛtɛ ndo l’ɔkɔngɔ la mitutu wa weke.

Lakeke kɛnyɔ shɔ esadi eto ndo kombet’edja lakakome manyi lo kɛnyɔ y’esadi esadi ndo ya waale shɔ. Lakadje otshumba mbala shato l’ɔsɛmanelo wa la mitutu l’osomba wa Lettonie ndo mbala hiende lo wedja wa Baltes.

WOHO WAKATSHIKITANYA BIBLE LƆSƐNƆ LAMI:

Etena kakamaleke monga la lokumu lo kɛnyɔ shɔ, Evija laki ɔngɛnyi ami wa womoto (lakayokomaka wadɛmi yema l’ɔkɔngɔ) akatatɛ nsawola l’Ɛmɛnyi wa Jehowa. Nde akatane ekanda awɔ ɛmɔtshi walembetshiya Bible wele la ɛtshi ka dikatshi kɛnya woho wakoka onto nɔmba wekelo wa Bible. Nde akalodia ɛtshi ka dikatshi kakɔ ndo akakitome. Kombet’edja, Ɛmɛnyi wa Jehowa ehende wakaye dia ndjowembola ndo nde akatatɛ mbeka Bible la wɔ. Dui sɔ diakangɛnyangɛnya, koko l’etena kɛsɔ dimi kondjashaka efula lo awui w’ɔtɛmwɛlɔ.

L’ɔkɔngɔ wa laasɔ, Ɛmɛnyi wa Jehowa wakanɔmbɛ dia mbidjasɛ lam’akawekaka la Evija Bible ndo pokamɛka. Lakadjasɛ  laawɔ ndo lakangɛnangɛna kɛnɛ kakamoke. Koko dui diakaleke mundanda otema ami, aki daka dia lo Bible dia paradiso ka la nkɛtɛ. Ɛnyɛlɔ, vɔ wakambadiɛ Osambu 37:10, 11 wata ɔnɛ: “Etenyi ka tshitshe ketu, k’untu a kolo hatanema ntu. Kuyanga ayushishima lu dihuli diandi, ndi henama ntu. Keli akanga a memakana wayukita kete, ndu wayongenangena la etshoko efula wa ki.” Daka sɔ diakangɛnyangɛnya efula.

Nsaki kami ka mbeya awui wa lo nyuma kakatetemala mpama. Lakayotatɛ nshihodia di’ɛtɛmwɛlɔ efula wekɔ lo mbetsha awui wa kashi. Otshikitanyi la wetshelo ɛsɔ, wetshelo wa lo Bible wakamunanda nɛ dia vɔ ngɛnyangɛnyaka onto ndo mbokɛmaka hwe.

Etena kakamatatetemalaka mbeka Bible, lakayeya dia Jehowa mbɔsaka lɔsɛnɔ la nɛmɔ ndo lɔ lekɔ ohomba efula lo washo ande. (Osambu 36:9) Dui sɔ diakonge la shɛngiya lo kɛnyɔ yami ya sɛmanɛ lowango la mitutu ndo lakayotshika mbidja lɔsɛnɔ lami lo waale. Lo dihole dia ntetemala la kɛnyɔ shɔ lakayɔsa yɛdikɔ ya nkamba la lɔsɛnɔ lami dia ntombola Jehowa. Ɔnkɔnɛ, lokumu, lotombo ndo ɔngɛnɔngɛnɔ waki lami lo sɛmanɛ lowango la mitutu kondjonga nto ohomba le mi.

Lakayoshihodia dia lekɔ l’ɔkɛndɛ ɔmɔtshi otsha le Ombishi wa lɔsɛnɔ

Lo 1996, lakɔtɔ lo Losanganya la wedja efula l’Ɛmɛnyi wa Jehowa lakasalema l’osomba wa Tallinn, lo wodja wa Estonie suke la sɛkɛ diakatasɛmanɛka lowango la mitutu mbala efula. Lo losanganya lɔsɔ, lakatɛna anto w’oma lo wedja wotshikitanyi wosanganyi kaamɛ lo wɔladi. Ɛnyɛlɔ, etena kakashisha Ɔmɛnyi wa Jehowa ɔmɔtshi tapa diande, lakafɔnya ɔnɛ nde hatodiɛna nto pondjo. Koko, la ntondo ka losanganya nshila, Ɔmɛnyi wa Jehowa ɔmɔtshi akatɔngɔna tapa diakɔ ndo akadikaloya aha la ɛngɔ kaanga ɔtɔi kaki lɔkɔ nshishɔ. Lakaambe woho w’anyanya. Oma laasɔ mbakamayoshihodia ɔnɛ, Ɛmɛnyi wa Jehowa wekɔ lo nsɛna mɛtɛ lo yoho yɔtɔnɛ l’atɔndɔ wa lo Bible. Dimi la Evija takatetemala la wekelo aso wa Bible ndo lo 1997, takakome Ɛmɛnyi wa Jehowa wambobatizama.

WAHƆ WAMOMOKONDJA:

Angɛnyi ami amɔtshi wakavu l’ɔtɛ wa kɛnyɔ ya sɛmanɛ la mitutu shɔ. Diɛsɛ la wekelo wa Bible, lakayoshihodia dia lekɔ l’ɔkɛndɛ ɔmɔtshi otsha le Ombishi wa lɔsɛnɔ, Jehowa. Ondo diɛsɛ la ewo kɛsɔ mbakakokamɛ lɔsɛnɔ lami.

Dimi la Evija takonge la diɛsɛ dia monga ekambi wa lo tena tshɛ l’edja k’ɛnɔnyi ɛnɛi lo Bɛtɛlɛ ka la Riga. Kakianɛ tekɔ l’ɔngɛnɔngɛnɔ dia mbodia Alise, ɔnaso la womoto ndo mbokimanyiya dia nde mboka Jehowa ngandji k’efula. Lekɔ nto la diɛsɛ dia tshɔɔka lushi ɔtɔi lo lomingu lo Bɛtɛlɛ kɛmɔtshi dia tɔlɔngɔsɔlaka mituka ndo diangɔ dikina. Dimi mongaka l’ɔngɛnɔngɛnɔ w’efula dia nkamba lo yoho ya dimɛna l’akoka ami w’oma ko dikɛnda. Lo mɛtɛ, lekɔ lo ntetemala nkakitola diangɔ ndo dikakatanya.

Dimi mbɔsaka diɛsɛ dia nsambisha awui wendana la Nzambi ɔtɔi ka mɛtɛ kaamɛ l’ase nkumbo kami la nɛmɔ di’efula ndo lekɔ la lowando lo kɛnɛ kakameke lo Bible. Lo mɛtɛ, daka dia paradiso ka la nkɛtɛ mbakatshikitanya lɔsɛnɔ lami.