“Lu lutumbu laye, uyali undeki w’utamanya.”OSAM. 45:4.

1, 2. Lande na kele Osambu 45 wekɔ la wahɔ le so?

NKUMEKANGA ka lotombo ayamɛ akambo wa mɛtɛ ndo wosembwe ndo ayɔlɛndja atunyi ande. L’ɔkɔngɔ wa nde mbidja otshumba w’ekomelo, nde ayosala diwala la otshukami ande. Nkumekanga kakɔ ayohɔmaka ndo ayotombɔmaka lo nɔnga tshɛ yayaye. Dui sɔ mbatɛkɛtama lo Osambu 45.

2 Osambu 45 wekɔ l’awui efula, koko vɔ hawɔtɛkɛta tsho di’ɔkɔndɔ ɔmɔtshi wa diambo wakakomɛ lo yoho ya dimɛna. Awui wele lɔkɔ wekɔ la wahɔ le so. Vɔ mendanaka la nsɛnɔ yaso ya nshi nyɛ ndo ya lo nshi yayaye. Nyɛsɔ tɔsɛdingole osambu akɔ la yambalo tshɛ.

“DIKAMBU DIMOTSHI DI’OLOLO DIAMBULULA L’UTEMA AMI”

3, 4. a) Naa “dikambu dimotshi di’ololo” diendana la so, ndo ngande wakokadiɔ munanda etema aso? b) Lo woho akɔna wembaso ‘osambo wendana la nkumekanga kɛmɔtshi,’ ndo ngande wele nemi yaso oko lokala l’ofundji w’ɔlɔlɔ?

3 Adia Osambu 45:1. “Dikambu dimotshi di’ololo” ‘diakalole’ l’otema w’omembi w’esambo ele lokumu lendana la nkumekanga kɛmɔtshi. Tshɛkɛta ya lo Hɛbɛru yokadimɔmi ɔnɛ “diambulula,” yakalembetshiyaka ɔnɛ “mimbɔmbɔ” kana “mbudɔdɔ.” Dikambo sɔ diakakonya otema w’omembi w’esambo dia vɔ  mbudɔdɔ l’ɔngɛnɔngɛnɔ ndo diaketɛ lolemi lande oko “lukala l’ufundji w’ololo.”

4 Ko kayotota lo dikambo diaso? Lokumu l’ɔlɔlɔ la Diolelo dia Mɛsiya lekɔ dikambo dimɔtshi di’ɔlɔlɔ diananda etema aso. Lokumu l’ɔlɔlɔ lɔsɔ lakayoleka monga “ololo” lo 1914. Oma k’etena kɛsɔ, losango lɔsɔ komendanaka nto la Diolelo dimɔtshi dia lo nshi yayaye, koko lɔ leendana la lowandji la mɛtɛ lolɛ kakianɛ l’olongo. “Lokumu l’ɔlɔlɔ . . . la Diolelo” lɔsɔ mbasambishaso “lo nkɛtɛ k’otondo oko ɔmɛnyi le anto wa lo wedja tshɛ.” (Mat. 24:14) Shi etema aso ‘ndolaka’ l’ɔngɛnɔngɛnɔ oma lo losango la Diolelo lɔsɔ? Onde sho sambishaka lokumu l’ɔlɔlɔ la Diolelo l’ohetoheto? L’ɛnyɛlɔ k’omembi w’esambo, ‘tekɔ lo memba osambo wendana la nkumekanga kɛmɔtshi,’ mbuta ate Nkumekanga kaso, Yeso Kristo. Tekɔ lo mbewoya anto ɔnɛ Nkumekanga Mɛsiya ambahenyama l’okudi l’olongo. Laadiko dia laasɔ, tekɔ lo nɔmba emboledi la ambolami tshɛ wa l’andja ɔnɛ dia vɔ nɛmbɛ lowandji la nkumekanga kɛsɔ. (Osam. 2:1, 2, 4-12) Nemi yaso mongaka oko “lukala l’ufundji w’ololo” etena kakambaso efula la Bible l’olimu w’esambishelo.

Tekɔ lo nsambisha lokumu l’ɔlɔlɔ lendana la Nkumekanga Yeso Kristo l’ɔngɛnɔngɛnɔ tshɛ

‘ƐTƐKƐTA W’AMƐNA WEKƆ L’ƐLƆMƆ WA YESO’

5. a) Lo toho takɔna taki Yeso la ɛnamelo ka “dimena”? b) Ngande wakatondjaka Yeso ‘ɛtɛkɛta w’amɛna oma l’ɛlɔmɔ ande,’ ndo ngande wakokaso ndjela ɛnyɛlɔ kande?

5 Adia Osambu 45:2. Bible haleke ntɛkɛta dikambo dia ɛnamelo ka Yeso. Oko wakinde onto la kokele, aha la taamu Yeso aki la ɛnamelo ka “dimena.” Koko nde aki la ɛnamelo ka dimɛna l’ɔtɛ wakinde la kɔlamelo le Jehowa ndo wakandalame olowanyi ande. Laadiko dia laasɔ, Yeso akakambe l’“ɛtɛkɛta w’amɛna” etena kakandasambishaka losango la Diolelo. (Luka 4:22; Jni. 7:46) Onde wɛ tosalaka la wolo dia ndjela ɛnyɛlɔ kaki Yeso l’olimu w’esambishelo ndo mpembaka nkamba l’ɛtɛkɛta wakoka munanda etema w’anto?—Kɔl. 4:6.

6. Ngande wakatshɔkɔla Nzambi Yeso lo “pundju”?

6 Lam’ele Yeso akayakimɔ l’otema ɔtɔi, Jehowa akɔɔtshɔkɔla etena kakandasambishaka lanɛ la nkɛtɛ ndo akoofute etena kakandolɔ oma lo nyɔi kande k’olambo. Ɔpɔstɔlɔ Pɔɔlɔ akafunde ate: “Lam’akandayala onto, nde [Yeso] akayakitshakitsha ndo akonge la okitanyiya polo ndo lo nyɔi, ɛɛ, nyɔi ka l’otamba w’asui. Diakɔ diele Nzambi akawodiya lo dihole dia laadiko ndo la ngandji tshɛ nde akawosha lokombo lele laadiko dia nkombo nkina tshɛ, kele adwe tshɛ wa wanɛ wele l’olongo ndo wanɛ wele la nkɛtɛ ndo wanɛ wele l’ɛse ka nkɛtɛ kawokusame lokombo la Yeso ndo kele anto tshɛ kawetawɔ lo sɛkɛ dia Yeso Kristo kele Nkumadiɔndjɔ dikambo dia lotombo la Nzambi She.” (Flpɛ. 2:8-11) Jehowa akatshɔkɔla Yeso lo “pundju” lo mboolola otsha lo lɔsɛnɔ lahavu.—Rɔmɔ 6:9.

YESO AKETƐMA NKUMEKANGA KA WOKE KOLEKI ‘ASEKANDE’

7. Lo toho takɔna takakitama Yeso esɔ oleki ‘asekande’?

7 Adia Osambu 45:6, 7Lam’ele Yeso aki la ngandji k’efula k’akambo wosembwe ndo akahetshaka dui tshɛ diakakoke mɔnyɔla She, Jehowa akɔɔsɔnɛ oko Nkumekanga ka Diolelo. Yeso akakitama “iso k’ongenongeno” oleki ‘asekande,’ mbuta ate nkumi ya dikanga ya lo dioho dia Juda l’ɔlɔndji  wa Davidɛ. Lo woho akɔna? Ɔkɔkɔ wa ntondo ele, Yeso akasɔnama oma le Jehowa ndamɛ. Laadiko dia laasɔ, Jehowa akookite esɔ oko Nkumekanga ndo oko Ɔlɔmbɛdi wa laadiko. (Osam. 2:2; Hɛb. 5:5, 6) Ndo nto, Yeso kokitama esɔ k’esɔ, koko nyuma k’ekila ndo lowandji lande keema la la nkɛtɛ koko la l’olongo.

8. Lande na kakokadiɔ mbutama ɔnɛ ‘Nzambi mbele kiti ka lowandji la Yeso,’ ndo lande na kakokaso monga l’eshikikelo ɔnɛ nde ekɔ lo mbolɛ la losembwe?

8 Lo 1914, Jehowa aketɛ Ɔnande Nkumekanga l’olongo. ‘Danga dia Diolelo diande diekɔ danga dia losembwe,’ diakɔ diele, ndooko onyake losembwe ndo wɔladi wayonga lo ɛlɔmbwɛlɔ kande. Nde kokaka nongola lowandji nɛ dia ‘Nzambi mbele kiti kande ka lowandji,’ mbuta ate Jehowa mbele ehikamelo ka Diolelo diande. Ndo nto, kiti ka Yeso kayotshikalaka “pondjo pondjo.” Onde wɛ hangɛnangɛna kambɛ Jehowa l’ɛse ka lowandji la Nkumekanga kakandasɔnɛ kɛsɔ?

‘NKUMEKANGA AMBOKIMƐ YƆƆMBƆ YANDE’

9, 10. a) Etena kakɔna kakasɔmɛ Kristo yɔɔmbɔ l’oya, ndo ngande wakandakambe la yɔ aha la ntshimbatsimba? b) Ngande wayokamba Kristo la yɔɔmbɔ yande nto?

9 Adia Osambu 45:3. Jehowa akatɛ Nkumekanga kakandasɔnɛ dia ‘nsɔmɛ yɔɔmbɔ yande l’oya’ lo mbosha lotshungɔ la ndɔsha ndo ndanya wanɛ tshɛ walɔshana la lowandji la Nzambi. (Osam. 110:2) Lam’ele Kristo ekɔ Nkumekanga k’ɔndɔshi wa ta wahalɛndjama, nde mbelamɛka ɔnɛ “pami ka wulu.” Lo 1914, nde akasɔmɛ yɔɔmbɔ yande l’oya etena kakandalɛndja Satana l’ɛdiɛngɛ ande ndo kakandawakasha oma l’olongo oya la nkɛtɛ.—Ɛny. 12:7-9.

10 Ɔsɔ aki tsho etatelo k’ɔlɛndjɛlɔ wa Nkumekanga Yeso nɛ dia nde aakahombe ‘nshidiya ɔlɛndjɛlɔ ande.’ (Ɛny. 6:2) Jehowa ayolanya dikongɛ di’otondo di’akambo diaki Satana ndo Satana l’ɛdiɛngɛ ande hawotonga l’akoka wa nsala ndooko dui. Babilɔna ka Woke, mbuta ate tshunda di’ɛtɛmwɛlɔ wa kashi wa l’andja w’otondo mbayolanyema ntondo. Jehowa ayokamba la ewandji wa pɔlitikɛ dia ndanya “womoto la numba” la kɔlɔ. (Ɛny. 17:16, 17) Oma laasɔ, Nkumekanga k’Ɔndɔshi w’ata ayolanya dikongɛ dia pɔlitikɛ diaki Satana. Kristo lelamɛ nto ɔnɛ “ondjelo wa difuku diaha l’ekomelo” ayoshidiya ɔlɛndjɛlɔ ande lo mbikadja Satana la ɛdiɛngɛ ande lo difuku diaha l’ekomelo. (Ɛny. 9:1, 11; 20:1-3) Nyɛsɔ tɔsɛdingole daka diele lo Osambu 45 diatɛkɛta di’akambo wa diambo asɔ.

NKUMEKANGA AYAMƐ “AKAMBU WA METE”

11. Ngande ‘wayamɛ Kristo akambo wa mɛtɛ’?

11 Adia Osambu 45:4. Nkumekanga Yeso halɔsha ta dia mbɔsa ɛtshi kɛmɔtshi ka nkɛtɛ kana munda anto lo mfumbe. Nde ayɔlɔsha ta dia losembwe la eyango w’amɛna. Nde ayamɛ “akambu wa mete, ndjakitshakitsha, la sambu k’ololo.” Dikambo dia mɛtɛ dioleki woke diahomba Yeso mamɛ ele lowandji laki Jehowa la l’andja w’otondo. Satana akalɔsha lowandji laki Jehowa etena kakandɔɔtɔmbɔkwɛ. Oma ko etena kɛsɔ, ɛdiɛngɛ ndo ana w’anto wekɔ lo mbidja lowandji laki Nzambi tɔfwɛfwɛ. Diakɔ diele, etena kambokoka ka Nkumekanga kakasɔnama oma le Jehowa ndja dia ndjaamɛ akambo wa mɛtɛ wendana la lowandji laki Jehowa mbala ɔtɔi lo pondjo.

12. Lo woho akɔna wayamɛ Nkumekanga Yeso ‘okitshakitsha’?

12 Nkumekanga Yeso ayamɛ ndo ‘okitshakitsha.’ Oko wende Ɔna ɛtɔi laki Nzambi, Yeso akasha ɛnyɛlɔ ka dimɛna efula k’okitshikitsha ndo ka ntshikala la kɔlamelo lo nɛmbɛ lowandji la She. (Is. 50:4, 5;  Jni. 5:19) Ambolami tshɛ wa Nkumekanga Yeso pombaka ndjela ɛnyɛlɔ kande ndo nɛmbɛ l’okitshkitsha tshɛ lowandji la Jehowa lo akambo tshɛ. Paka wanɛ wasala ngasɔ mbele la diɛsɛ dia tɔsɛna l’andja w’oyoyo watolakiya Nzambi.—Zek. 14:16, 17.

13. Ngande wayamɛ Kristo ‘losembwe’?

13 Kristo ayamɛ ndo ‘losembwe.’ Ɔsɔ ekɔ ‘losembwe laki Nzambi,’ mbuta ate ɛlɛmbɛ wa Jehowa wendana la kɛnɛ kele ɔlɔlɔ la kɛnɛ kele kɔlɔ. (Rɔmɔ 3:21; Euh. 32:4) Isaya akasha daka lo kɛnɛ kendana la Nkumekanga Yeso Kristo ate: “Khum’ekanga ayulela la sambu k’ololo.” (Is. 32:1) Ɛlɔmbwɛlɔ kaki Yeso kayotela “olongo w’oyoyo” la “nkɛtɛ k’oyoyo lɛnɛ ayongaka losembwe.” (2 Pet. 3:13) Anto tshɛ wayodjasɛ lo andja w’oyoyo ɔsɔ wayohomba nkɛndakɛnda lo ndjela ɛlɛmbɛ wa Jehowa.—Is. 11:1-5.

NKUMEKANGA AYOSALA ‘AKAMBO WA MAMBA’

14. Ngande wayosala lonya l’omi la Kristo ‘akambo wa mamba’? (Enda osato wele lo mbɔtwɛlɔ.)

14 Oko waheminde lo mfalasa, Nkumekanga akashile nsɔmɛ yɔɔmbɔ yande l’oya. (Osam. 45:3) Etena kayokoka ka Nkumekanga nkimɛ yɔɔmbɔ yande la lonya lande l’omi ndo nkamba la yɔ. Omembi w’esambu akasha daka ate: ‘Lonya layɛ l’omi layosala akambo wa mamba.’ (Osam. 45:4) Yeso Kristo ayosala ‘akambo wa mamba’ lo Aramangɛdɔna, ɛnyɛlɔ nde ayodiaka atunyi ande. Hateye kɛnɛ kayokamba la nde dia nanya dikongɛ diaki Satana. Koko kɛnɛ kele mɛtɛ ele, mpokoso kɛsɔ kayokomɛ anto tshɛ wa la nkɛtɛ wahakitanyiya ɛhɛmwɛlɔ waki Nzambi ndo wahalɛmbɛ Nkumekanga Yeso. (Adia Osambu 2:11, 12.) Lo daka diande diendana la nshi y’ekomelo, Yeso akate dia “anto wayɔkɔ hohakayi l’ɔtɛ wa wɔma ndo wa elongamelo k’akambo wayosalema lo nkɛtɛ k’otondo, nɛ dia diangɔ dia wolo dia l’olongo diayosutshasutshama.” Nde akakotsha ate: “Ko l’etena kɛsɔ, vɔ wayɛna Ɔna onto ayaye lo dinge la wolo ndo la lotombo l’efula.”—Luka 21:26, 27.

15, 16. Waa na wayonga l’atei w’“alembe” wayokamba la Kristo dia ndɔ ta?

15 Etena kewoya dibuku dia Ɛnyɛlɔ ɔnɛ Nkumekanga Yeso ayoya “la wolo ndo la lotombo l’efula,” diɔ mbutaka ɔnɛ: “Ko dimi lakɛnyi olongo wambodihɔ ndo mfalasa ka wɛma. Ɔnɛ lakakiahema lokombo lande Kanga kɔlamelo ndo mɛtɛ, ndo nde nomboshaka ndo ndɔshaka ata la losembwe. Ndo nto, alembe wa l’olongo wakayawoyelaka la mfalasa ya wɛma ndo vɔ wakalɔtɛ ahɔndɔ wa swaswa wa wɛma ndo wa pudipudi. Ndo lokuwa l’otale la mpɛmɔ lakayatombaka oma l’onyɔ ande dia nde nkɔta wedja ndo mbalama la okalemba wa lowolo. Ndo nto, nde akahɔtshahɔtsha diamula dia odudu wa nkɛlɛ ka Nzambi Kanga-Wolo-Tshɛ.”—Ɛny. 19:11, 14, 15.

16 Waa na wayokamba kaamɛ la Kristo oko “alembe” w’oma l’olongo dia ndɔ ta sɔ? Mbala ka ntondo kakandakambe la yɔɔmbɔ yande dia mbitshanya Satana l’ɛdiɛngɛ ande oma l’olongo, Yeso akakambe kaamɛ “l’andjelo ande.” (Ɛny. 12:7-9) Mbokɛmaka dia ndo lo ta di’Aramangɛdɔna, andjelo wayonga l’atei w’alembe wayokamba la Yeso. Waa na nto wayonga l’atei w’alembe ande? Yeso akasha daka lo kɛnɛ kendana la anango w’akitami ate: “Ndo ɔnɛ ladja otshumba ndo layela etsha ami polo l’ekomelo, dimi layowosha lowandji la mbahemɛ wedja, ko nde ayowalɔmbɔla la okalemba wa lowolo dia nde mbatshatsha wedja oko diangɔ dia diwomba, oko wakamalongola lowandji oma le Papa.” (Ɛny. 2:26, 27) Ɔnkɔnɛ, Akristo w’akitami wakalongola difuto diawɔ dia l’olongo wayonga l’atei w’alembe waki Kristo wa l’olongo.  Vɔ wayonga kaamɛ la Kristo etena kayondosala ‘akambo wa mamba’ dia nɔmbɔla wedja l’okalemba wa lowolo.

NKUMEKANGA AMBOSHIDIYA ƆLƐNDJƐLƆ ANDE

17. a) Mfalasa ka wɛma kahemi Kristo nembetshiyaka na? b) Yɔɔmbɔ la ota wekɔ didjidji dia na?

17 Adia Osambu 45:5. Nkumekanga Yeso mbahema laadiko dia mfalasa ka wɛma ndo mfalasa kakɔ kekɔ didjidji dia ta dia pudipudi ndo dia losembwe lo washo wa Jehowa. (Ɛny. 6:2; 19:11) Laadiko dia yɔɔmbɔ, nde ekɔ ndo la ota. Bible mbutaka ɔnɛ: “Dimi lakende, mɛnyi ko mfalasa ka wɛma ndo ɔnɛ lakakiahema aki la ota ndo wakawosha dɛmbɔ dia nkoso, ko nde akatshu, atalɛndja ndo dia toshidiya ɔlɛndjɛlɔ ande.” Yɔɔmbɔ la ota ekɔ didjidji dia dihomɔ diayokamba la Kristo dia ndanya atunyi ande.

Tofudu tayelamɛ dia ndjɛdia nkɛtɛ (Enda odingɔ 18)

18. Ngande wayonga ‘mpito’ ya Kristo “sodi”?

18 Lo lembo lande, omembi w’esambo ɔmɔtshi akembe dia ‘mpito ya Nkumekanga yekɔ sɔdi efula yatokomaka polo l’etema w’atunyi ande ndo yatolawoyaka anto oma la ntondo kande.’ Anto wayodiakema lo nkɛtɛ k’otondo. Jɛrɛmiya akalake ate: “Lushi lako, wane wayudiakema le [Jehowa], wayukalema kalakala uma la kuma kemotshi ka kete pulu ndu la kuma kekina.” (Jer. 25:33) Daka dia woho akɔ waamɛ mbutaka ɔnɛ: “Dimi lakɛnyi nto ondjelo ɔmɔtshi emadi lo wonya, ko nde akawelɛ la dui dia wolo ndo akatɛ tofudu tatafumbɔ l’olongo ate: ‘Nyoye, nyotshumane kaamɛ lo dambo dia woke dia dikɔlɔ diaki Nzambi, dia nyu ndɛ emunyi wa nkumi ya dikanga, emunyi w’ewandji w’asɔlayi, emunyi w’akanga wa wolo, emunyi wa mfalasa ndo wanɛ woyahemi, emunyi w’anto tshɛ, oyadi anto wele la lotshungɔ kana mfumbe ndo emunyi w’anto w’anyanya ndo w’anto wa lokumu.’”—Ɛny. 19:17, 18.

19. Ngande wayonga Kristo “undeki w’utamanya,” ndo ngande wayondoshidiya ɔlɛndjɛlɔ ande?

19 L’ɔkɔngɔ wa nde ndanya dikongɛ di’akambo dia kɔlɔ diaki Satana, Kristo ayoyala “undeki w’utamanya.” (Osam. 45:4) Nde ayoshidiya ɔlɛndjɛlɔ ande lo mbidja Satana la ɛdiɛngɛ ande lo difuku diaha l’ekomelo l’edja k’ɛnɔnyi kinunu wayondolɛ. (Ɛny. 20:2, 3) Etena kayonga Diabolo l’ɛdiɛngɛ ande lo lokanu, anto wa la nkɛtɛ hawotɔsɛngiyama nto oma le Satana ndo wayokitanyiya awui tshɛ waki Nkumekanga kawɔ ka lotombo ndo kambodja otshumba. La ntondo k’anto mɛna woho wayotakadimɔmaka nkɛtɛ k’otondo paradiso yema yema, vɔ wayokondja diaaso dikina dia ngɛnangɛna la Nkumekanga kawɔ kaamɛ l’anto ande w’oma l’olongo. Dikambo di’ɔngɛnɔngɛnɔ sɔ mbayotɔsɛdingola lo sawo diayela.