PULUSHI ka lo KGB * akambutɛ ate: “Wɛ ekɔ ombutshi wa kɔlɔ. Wɛ ambotakale wadɛyɛ ele la diemi l’ɔna. Ayowasɛnyaka ndo ayowakimanyiyaka? Nsɛka mbetawɔ kayɛ kele nkalola lakayɛ!” Lakakadimola nte: “Ndooko, dimi hakale nkumbo kami. Nyu mbakamunde! Ko l’ɔtɛ wa na?” Pulushi kakɔ akakadimola ate: “Ndooko dui dioleki kɔlɔ ko ndeka monga Ɔmɛnyi wa Jehowa.”

Dui sɔ diakasalema lo 1959 lo lokanu lɔmɔtshi la l’osomba wa Irkoutsk la Russie. Layanga nyɔkɔndɔlɛ lande na kakametawɔ dimi la wadɛmi Maria dia “[nsowa] l’ɔtɛ wa kɛnɛ kele ɔlɔlɔ” ndo woho wakatatshɔkwama l’ɔtɛ wakatatshikala la kɔlamelo.​—1 Pe. 3:13, 14.

Dimi lakotɔ l’Ukraine lo 1933 lo ngielongelo ya Zolotniki. Lo 1937 kosɛ aki mama nde l’omɛnde, wanɛ waki Ɛmɛnyi wa Jehowa wakatshu oma la France dia totenda, ko wakatototshikɛ abuku Gouvernement ndo Délivrance, wakatondjama oma le Société Watch Tower. Etena kakadia papa abuku asɔ, nde akonge la mbetawɔ le Nzambi nto. Lonyangu ko lo 1939 nde akonge baka la hemɔ, koko ntondo ka nde mvɔ nde akatɛ mama ate: “Ɔnɛ ekɔ akambo wa mɛtɛ. Ketshake ana akambo akɔ.”

SIBERIE, ƐTSHI KA NKƐTƐ K’OYOYO KA NSAMBISHA

Lo Ngɔndɔ ka nɛi 1951, ewandji wa lɛɛta wakatatɛ ntoma Ɛmɛnyi wa Jehowa oma l’owɛstɛ ka URSS otsha la Siberie lo lɔhɔmbɔ. Dimi la mama la kosɛmi Grigory, takatshanyema oma l’owɛstɛ w’Ukraine. L’ɔkɔngɔ wa sho munda lɔkɛndɔ la kilɔmɛtrɛ 6 000 lo kawolo, takakome l’osomba wa Touloun la Siberie. L’ɔkɔngɔ wa mingu hiende, Bogdan enondo ami la pami akaye lo mpango kaki suke l’osomba wa Angarsk. Wakawofundɛ lokanu l’ɛnɔnyi 25 dia kambaka olimu wa wolo.

Dimi la mama ndo Grigory takasambishaka lo bɛtshi dia nkɛtɛ diaki suke la Touloun, koko takayangaka toho ta nsambisha. Ɛnyɛlɔ, takambolaka ɔnɛ: “Onde ekɔ onto ɔmɔtshi lasondja ngɔmbɛ lanɛ?” Etena kakatɛnaka onto lakasondjaka ngɔmbɛ, takawotɛka ɔnɛ woho wakatongama ngɔmbɛ ekɔ dui dia diambo. Aha la ntshimbatshimba, takasawolaka la nde awui wendana l’Otungi. L’etena kɛsɔ, wakatondja jurnalɛ mɔtshi yendana l’Ɛmɛnyi wa Jehowa ɔnɛ vɔ wekɔ lo tambola ngɔmbɛ ko tete le, wekɔ lo tayange ɛkɔkɔ! Ndo takatane anto wele oko ɛkɔkɔ! Aki dui di’ɔngɛnɔngɛnɔ efula dia mbeka l’anto w’okitshakitsha ndo walongɔna dimɛna Afundelo l’ɛtshi ka nkɛtɛ kakiwɔ  kotoma ndooko onto. Nshi nyɛ, aya etshumanelo kele l’apandjudi ndekana 100 la Touloun.

WOHO WAKAHEMBAMA MBETAWƆ KA MARIA

Wadɛmi Maria akeke akambo wa mɛtɛ l’Ukraine etena kakalɔmaka Ta dia hende dia l’andja w’otondo. Etena kakinde l’ɛnɔnyi 18, pulushi kɛmɔtshi ka lo KGB akatatɛ mbofukutanya ndo mbotshutshuya dia nsala la nde awui wa mindo, koko nde akatone l’eshikikelo tshɛ. Lushi lɔmɔtshi, lam’akandakalola la ngelo, nde akatane pami kakɔ oshami lo mbeto kande. Maria akalawɔ. La kɛlɛ tshɛ, pulushi kakɔ akawanɛ dia mboshimba diaha monga Ɔmɛnyi wa Jehowa ndo lo 1952, wakafundɛ Maria lokanu l’ɛnɔnyi dikumi. Nde akayaoke oko Yɔsɛfu lakadjama lo lokanu l’ɔtɛ w’olowanyi ande. (Eta. 39:12, 20) Shufɛlɛ yakatɔsa Maria oma lo tominadi otsha lo lokanu akawotɛ ate: “Tokake wɔma. Anto efula tshɔka lo lokanu, koko kalolaka la nɛmɔ diawɔ.” Ɛtɛkɛta ɛsɔ wakokeketsha.

Oma lo 1952 polo 1956, wakadje Maria lo mpango kakawakandjaka anto elimu wa wolo kaki suke l’osomba wa Gorkiy (welamɛ nshi nyɛ Nijni Novgorod) la Russie. Wakawodjangɛ dia kundolaka esongo, kaanga lo nshi ya tshitshi k’efula. Nde akayonga la yoonge ya kɔlɔ, koko lo 1956 wakotondja oma lo lokanu ko nde akatshu la Touloun.

LAKANGANA ETALE LA WADƐMI NDO ANAMI

Etena kakambutɛ ɔnangɛso ɔmɔtshi la la Touloun ɔnɛ kadiyɛso kɛmɔtshi ekɔ lo ndjaye, lakatshu lo dikalo diami lo dihole diakemalaka mituka dia tohomana la kadiyɛso kakɔ ndo tokimanyiya la mɛmba etshumu. Kam’akamɛnana la Maria, lakɔngɛnangɛna. Akalɔmbama mbidja welo dia nde nangami, koko nde akayonanga. Takatshukana lo 1957. L’ɔkɔngɔ w’ɔnɔnyi, Irina ɔnaso la womoto akotɔ, koko, ɔngɛnɔngɛnɔ wa monga kaamɛ la nde waki wa tshenyitenyi. Lo 1959, wakamunde l’ɔtɛ wakamatondjaka ekanda walembetshiya Bible. Lakatshikala lo lokanu l’edja k’etenyi k’ɔnɔnyi dimɛ. Dia ntetemala monga la ki ka l’otema l’etena kɛsɔ, lakalɔmbaka mbala la mbala, lakembaka esambo wa Diolelo ndo lakakanyiyaka woho wakamahombe tosambisha nto naka lambotomba.

Lele lo mpango kakandjawɔ anto elimu wa wolo, 1962

Lam’akimi lo lokanu, ɔnɛ lakambokaka ambola akahangɔ ate: “Kem’edja tayonyoshila oshiki oko dji!” Lakakadimola nte: “Yeso akate dia lokumu l’ɔlɔlɔ la Diolelo LAYOSAMBISHAMA lo wedja tshɛ ndo ndooko onto lakoka liemɛ.” Oma laasɔ, ɔnɛ lakambokaka ambola akaye la mayɛlɛ tshɛ dia ndjombetawoya dia nsɛka mbetawɔ kami, oko wakamaditshi lo mbɔtwɛlɔ. Etena kakawɛnyi dia wanelo ndo welo awɔ hawongi la shɛngiya le mi, wakafundɛ lokanu l’ɛnɔnyi esambele lo mpango kakawakandjaka elimu wa wolo kaki suke l’osomba wa Saransk. Etena kakamatatshɔka lo mpango kakɔ, wakambutɛ ɔnɛ Olga, ɔnaso la hende la womoto akotɔ. Kaanga mbaki wadɛmi l’ana etale, lakakeketshamaka lo mbeya dia dimi la Maria tekɔ lo ntetemala monga la kɔlamelo le Jehowa.

Maria nde l’anaso wa wamato Olga la Irina lo 1965

Maria akatshɔka la Saransk mbala ɔtɔi l’ɔnɔnyi dia tomenda kaanga mbele, ntshɔ la nkalola oma la Touloun lo kawolo akɔsaka nshi 12. Ɔnɔnyi tshɛ, nde akatɔlɛka lokolo la sabata ya sokoto l’oyoyo. Nde akatɔlɛka numɛlɔ ya Tshoto y’Etangelo yeke katomba mbishɛ lo sokoto. Ɔnɔnyi ɔmɔtshi wakaye Maria dia ndjomenda aki dui dia laande nɛ dia nde akaye ndo l’anaso ahende. Ohokanyiya woho wakamayaoke lo mbaɛna ndo monga kaamɛ la wɔ!

 NGELO K’OYOYO NDO EKAKATANU EKINA

Lo 1966, wakatondja oma lo mpango kakawakandjaka anto elimu wa wolo ko takonɔ sho akɔ anɛi l’osomba wa Armavir, suke la Ndjale k’odima. Lɛkɔ, mbakatotɔ Yaroslav ndo Pavel anaso w’apami.

Kombeta edja, apulushi wa KGB wakaye dia ndjoyanga ekanda walembetshiya Bible lo luudu laso. Vɔ wakayange dihole tshɛ polo ndo lɛnɛ akalɛka ngɔmbɛ. Lushi lɔmɔtshi lakawatasalaka eyangelo akɔ, apulushi wakatshutshumɔ dungu l’ɔtɛ wa yanyi, ko ditshu diakakakatɛ lo inifɔrmɛ awɔ. Maria akawaoke kɛtshi, etena kakawakitanyiyaka kɛnɛ kakawalɔmbɛ. Nde akawadjɛ ashi w’elowa, akawaela shifɔ dia minya ditshu, dɔnga di’ashi ndo esiyamɛ. L’ɔkɔngɔ diko, lam’akaye owandji wa KGB, apulushi wakawotɛ awui w’amɛna wakawasalɛ. Etena kakawatatshɔka, owandji akɔ akamɔnamɔna ndo akatohohiya lonya. Taki l’ɔngɛnɔngɛnɔ lo mɛna dia nsala ɔlɔlɔ koka monga l’etombelo w’amɛna etena kakatasale la wolo dia “[ntetemala] nɛndja akambo wa kɔlɔ oma lo akambo w’ɛlɔlɔ.”​—Rɔmɔ 12:21.

Kaanga mbakawasalaka eyangelo ɛsɔ, takatetemala nsambisha la Armavir. Takasha lonya nto dia nkeketsha olui wa tshitshɛ w’apandjudi wa l’osomba waki suke la Kurganinsk. Lekɔ l’ɔngɛnɔngɛnɔ efula dia mbeya ɔnɛ, ɛlɔ kɛnɛ aya tshumanelo samalo la Armavir ndo nɛi la Kurganinsk.

L’edja k’ɛnɔnyi ɛsɔ tshɛ, lonyuma laso lakakitakitaka lo tena dimɔtshi. Koko, tekɔ la lowando le Jehowa l’ɔtɛ wakandakambe l’anangɛso wa kɔlamelo dia tongola ndo tokeketsha lo nyuma. (Os. 130:3) Taki nto l’ohemba wa wolo dia nkamba kaamɛ l’anto amɔtshi wa lo KGB wakasɔsɔmɛ lo tshumanelo aha la sho mbeya. Vɔ wakɛnamaka oko wekɔ l’ohetoheto ndo wakayashaka l’esambishelo. Amɔtshi l’atei awɔ wakayonga ndo l’ɛkɛndɛ l’okongamelo. Koko l’edjedja ka wonya, takayeya waa na mɛtɛ wakiwɔ.

Lo 1978 etena kaki Maria l’ɛnɔnyi 45, nde akatshu diemi nto. Lam’ele nde akadiɛnɛka la hemɔ ka lo doyi, adɔkɔtɛlɛ wakalange dia nkokɛ lɔsɛnɔ lande ko wakasale la wolo dia mbeetawoya dia ntondja diemi. Maria akatone. Koko adɔkɔtɛlɛ amɔtshi wakatayelanaka la nde dihole tshɛ diakinde lo lopitadi la tɛdi wayanga dia mboka l’oyango w’ɔna mbotɔ osondjo. Dia nkokɛ ɔna laki l’otema, Maria akalawɔ oma lo lopitadi lakɔ.

Ase KGB wakatodjangɛ dia mimɔ oma l’osomba akɔ. Takonɔ lo ngielongelo mɔtshi yaki suke l’osomba wa Tallinn la Estonie, wakayonga lo URSS. Etena kakiso la Tallinn, otshikitanyi la kɛnɛ kakate adɔkɔtɛlɛ, Maria akote Vitaly ɔna pami laki la yoonge ya dimɛna.

L’ɔkɔngɔ diko, takayonɔ oma l’Estonie otsha la Nézlobnaïa lo sudɛ ka Russie. Takasambishaka anto waki lo tosombasomba ta lɛkɔ la mayɛlɛ tshɛ, nɛ dia anto w’oma lo wedja tshɛ wakayaka dia ndjɛngɔla lɛkɔ. Vɔ wakayaka lɛkɔ dia ndjosakemɛ, koko amɔtshi wakakalolaka l’elongamelo ka lɔsɛnɔ la pondjo!

TAKETSHA ANASO DIA NANGA JEHOWA

Takasale la wolo dia mbetsha anaso w’apami la wa wamato dia nanga Jehowa ndo monga la nsaki ka mbokambɛ. Mbala efula takelɛka anangɛso waki la shɛngiya ya dimɛna le anaso lakaso. Enondo ami Grigory laki omendji weteta oma lo 1970 polo 1995 akatembolaka mbala la mbala. Nkumbo k’otondo kakangɛnangɛnaka wembwelo ande nɛ  dia nde aki l’ɔngɛnɔngɛnɔ ndo akasalaka shɛkɛsɛkɛ. Etena kakatongaka l’angɛndangɛnda, mbala efula takasalaka tɔkɛnyɔ ta lo Bible, diakɔ diele anaso waketshama dia nanga ɛkɔndɔ wa lo Bible.

Anami la wadɛwɔ.

Oma lo lɔmɔsɔ otsha lo l’omi, l’ɔkɔngɔ: Yaroslav, Pavel, Jr., Vitaly

La ntondo: Alyona, Raya, Svetlana

Lo 1987, ɔnaso Yaroslav akonɔ l’osomba wa Riga la Lettonie, lɛnɛ akandatoleka nsambisha aha l’okakatanu. Koko etena kakandatone nkamba olimu w’ɔsɔlayi, wakawodje lo lokanu ɔnɔnyi l’etenyi ndo wakɔtɔlɛ lo nkanu divwa yotshikitanyi. Awui wakamawotɛ wendana la woho wakamɔtɔ nkanu, akokimanyiya dia mbikikɛ. L’ɔkɔngɔ diko, nde akayonga ombatshi mboka. Lo 1990, lam’akakotsha ɔnaso Pavel ɛnɔnyi 19, nde akalange monga ombatshi mboka la Sakhaline, disɛnga dia lo nɔrdɛ ka Japon. Oma l’etatelo, sho konanga dia nde ntshɔ. Aki apandjudi 20 ato lo disɛnga di’otondo ndo takangana la disɛnga diakɔ kilɔmɛtrɛ ndekana 9 000. Koko takayetawɔ ndo ɔsɔ aki yɛdikɔ ya dimɛna. Anto wa lɛkɔ waketawɔka losango la Diolelo. L’ɔkɔngɔ w’ɛnɔnyi engana eto, tshumanelo enanɛi diakonge lɛkɔ. Pavel akakambe la Sakhaline polo lo 1995. Koko oma laasɔ, takayotshikala sho la Vitaly ɔnaso la kose oto la ngelo. Oma ko dikɛnda diande, nde akalangaka mbadia Bible. Lam’akandakotsha ɛnɔnyi 14, nde akonge ombatshi mboka ndo dimi lakonge ombatshi mboka kaamɛ la nde l’edja k’ɛnɔnyi ehende. Ɔsɔ aki etena ka dimɛna efula. Lam’akinde l’ɛnɔnyi 19, Vitaly akatshu dia tokamba oko ombatshi mboka wa laande.

Lo 1952, pulushi kɛmɔtshi ka lo KGB akatɛ Maria ate: “Nsɔna lam’asa nsɛka mbetawɔ kayɛ kana mbɔtɔ lo lokanu ɛnɔnyi dikumi. Lam’ayoyotomba, kete wɛ aya osombe ndo wɛ ayonga opoko.” Koko akambo wakasalema lo yoho yotshikitanyi. Takashihodia ngandji kakatokaka Jehowa Nzambi kaso ka kɔlamelo, anaso ndo anto efula wakatakimanyiya dia mbeya akambo wa mɛtɛ. Dimi la Maria taki l’ɔngɛnɔngɛnɔ dia tembola anaso lɛnɛ akawakambaka. Takɛnyi woho waki anto wakakimanyiyaka anaso dia mbeya akambo wendana la Jehowa la lowando.

LOWANDO L’ƆTƐ W’ƆLƆLƆ WA JEHOWA

Lo 1991, olimu w’Ɛmɛnyi wa Jehowa wakeyama le lɛɛta. Yɛdikɔ shɔ yakatosha wolo w’oyoyo wa ndjasha l’olimu w’esambishelo. Etshumanelo kaso kakasombe mutuka dia sho tshɔka tosambisha lo tosombasomba ndo ngelo yaki suke lo wikɛndɛ tshɛ.

Dimi la wadɛmi lo 2011

Lekɔ l’ɔngɛnɔngɛnɔ nɛ dia Yaroslav la wadɛnde Alyona, ndo Pavel la wadɛnde Raya, wekɔ lo nkamba lo Bɛtɛlɛ ndo Vitaly la wadɛnde Svetlana, wekɔ lo nkamba l’otshimbedi. Irina ɔnaso l’enondo nde la nkumbo kande wekɔ l’Allemagne. Omɛnde, Vladimir nde l’anande asato wekɔ vɔ tshɛ dikumanyi. Ɔnaso Olga ekɔ l’Estonie ndo nde mbelɛkami mbala la mbala. Lonyangu ko, Maria wadɛmi la ngandji akavu lo 2014. Lekɔ lo nomɔlomɔ dia ndjɛnana la nde nto lo eolwelo! Nshi nyɛ lekɔ l’osomba wa Belgorod ndo anangɛso wa lanɛ wekɔ lo sukɛmi dimɛna.

Ɛnɔnyi efula wamomokambɛ Jehowa wambombetsha ɔnɛ, ekɔ ohomba mbidja welo dia nama olowanyi, koko wɔladi wa l’etei k’otema washa Jehowa ekɔ ɛngɔ koleki nɛmɔ tshɛ. Ɛtshɔkɔ wakamakondja dimi la Maria l’ɔtɛ wakiso l’etete waki efula ndeka ndo woho wakokami nkanyiya. Ntondo ka URSS nkita tatala lo 1991, aki apandjudi ndekana 40 000 ato. Ɛlɔ kɛnɛ, aya apandjudi ndekana 400 000 lo wedja waki lo Union soviétique! Kakianɛ, laya l’ɛnɔnyi 83 ndo lekɔ lo ntetemala nkamba oko ekumanyi. Tena tshɛ, Jehowa akasukɛka ndo akambishaka wolo wa mbikikɛ. Lo mɛtɛ, Jehowa ambomfuta lo yɛdikɔ y’efula.​—Os. 13:5, 6.

^ od. 4 KGB ekɔ okangelo wa comité de sécurité de l’État soviétique ka la Russie.