Don nde la Margaret * wakangɛnangɛna woho wakaye ɔnawɔ la womoto la nkumbo kande dia ndjowaenda. Margaret laki manyi lo awui w’okatelo ndo lakalongola pasiɔ akakatɛɛ ekana ande ehende makarɔni la abɛlɛ w’ekama, diangɔ diakawalekaka nanga ndo diahohamamɛki.

Etena kakawadjasɛ vɔ tshɛ, Margaret akela diangɔ dia ndɛ ndo akadikitsha laa mɛsa. Nde akafola ofidi ndo akashimɔ nganɛ ko paka oshi w’abɛlɛ w’ekama oto. Margaret akohɛ nkotsha ɛngɔ kɛmɔtshi k’ohomba, mbuta ate makarɔni! *

Oyadi opalanga kana diewo diele la so, sho tshɛ salaka munga. Mbeyaka monga ko takatondjisha ɛtɛkɛta wa kɔlɔ kana takasadi dui dimɔ dia dimɛna koko hongi l’etena ka dimɛna ndo ayoleka dimɛna sho diohɛ. Lande na kasalema munga? Ngande wakokaso ndɔshana la yɔ? Ngande wakokaso mbewɔ nsala munga? Monga la ekanelo k’ɔlɔlɔ lo dikambo dia munga ayotokimanyiya dia sho nkadimola lo ambola asɔ.

KANYI YASO NDO YA NZAMBI LO DIKAMBO DIA MUNGA

Etena kasalaso dui dimɔ dia dimɛna, l’ɔngɛnɔngɛnɔ tshɛ, sho mbetawɔka lotombo ndo kɛsɔ tokiyaka ɔnɛ sho sunganaka mbolilongola. Lam’asalaso munga, oyadi hatongi la nsaki ka kisala kana anto akina hawokiɛnyi, onde hatokoke mbetawɔ dia takasadi dui dimɔ dia kɔlɔ? Nɔmbamaka monga l’okitshakitsha dia nsala dui sɔ.

Naka sho ndeka nkanyiya lo dikambo diaso, sho mbeyaka ndjɔnyɔla munga kaso kana ndjomama anto akina kana manguna ɔnɛ hatokisadi. Mbala efula dui sɔ konyaka l’etombelo wa kɔlɔ. Dui sɔ koka ntshikala aha la kandɔma ndo mama anto akina onongo. Kaanga naka tambosala munga kɛmɔtshi ndo tambewɔ etombelo w’oma lɔkɔ kakianɛ, tohɔ dia l’ekomelo a shimu “onto l’onto ayokoya la Nzambi.”​—Rɔmɔ 14:12.

Nzambi mɛnaka akambo la sso di’ɔlɔlɔ lo dikambo dia munga. Lo dibuku di’Esambo, vɔ mɛnyaka dia Nzambi ekɔ “lokana kɛtshi ndo lokana kandji,” nde “hatondaka anto la munga nshi tshɛ ndo nde hatolama kumbɛkumbɛ pondjo.” Nde mbeyaka dia anto keema kokele ndo nde shihodiaka dia takotɔ la wɛɔdu, “nde mbohɔka dia tekɔ ditshu.”​—Osambo 103:8, 9, 14.

Laadiko dia laasɔ, l’ɛnyɛlɔ k’ombutshi wa ngandji, Nzambi nangaka dia sho anande monga la kanyi y’ɔlɔlɔ lo dikambo dia munga oko nde. (Osambo 130:3) La ngandji tshɛ, Ɔtɛkɛta ande mbishaka alako efula ndo ɛlɔmbwɛlɔ katokimanyiya dia ndɔshana la munga yaso ndo y’anto akina.

TOHO TA NDƆSHANA LA MUNGA

Mbala efula etena kasalema munga, onto mbetshaka wenya ndo wolo efula dia mama anto akina onongo kana nyanga dia mbisha tɛkɛ nɛndɛ lo kɛnɛ kakatami ndo kakasalemi. Lo dihole dia nsala ngasɔ, naka ɛtɛkɛta ayɛ wambohomuya onto okina, ekɔ ohomba nɔmba edimanyielo, nɔngɔsɔla munga ndo ntetemala nama lɔngɛnyi woho watolongaka.  Onde wɛ amboosalaka dui dimɔ dia kɔlɔ ndo diaki l’etombelo wa kɔlɔ le yɛ kana le onto okina? Lo dihole dia wɛmɛ ndjaomalɛ kana mama anto akina onongo, lande na kahayasale la wolo ayɛ tshɛ dia nɔngɔsɔla akambo? Naka sho ntshininala lo mɛnya dia anto akina mbele la munga, kete kɛsɔ ayoleka mbidiya dui tshanana ndo ayoleka mbidiya dikambo. Lo dihole dia nsala ngasɔ, eka, lɔngɔsɔla ndo sala kɛnɛ kele ohomba.

Koko etena kasala onto okina munga, mongaka dui dia wɔdu le so dia mɛnya dia hatetawɔ kɛnɛ kosadinde. Ekɔ dimɛna efula ndjela dako dia Yeso Kristo diata ɔnɛ: “Ɔnkɔnɛ, nyosale anto kɛnɛ tshɛ kalanganyu vɔ nyosalɛ.” (Mateo 7:12) Etena kasalayɛ munga, oyadi kekɔ tshitshɛ, aha la taamu wɛ ayolanga di’anto akina kosalɛ akambo la kɛtshi kana kodimanyiyɛ munga kayɛ tshɛ lo tshɛ. Ko laasɔ, lande na kahayasale la wolo dia mɛnya kɛtshi kakɔ kaamɛ otsha le anto akina?​—Ɛfɛsɔ 4:32.

ATƆNDƆ WAKOKA TOKIMANYIYA DIA NKITSHAKITSHA MUNGA

Diksiɔnɛrɛ dimɔ mbutaka dia munga salemaka oma lo “ekanelo ka kɔlɔ, ohombelo wa ewo k’oshika kana naka onto hadjisha yimba lo dui dimɔ.” Sho pombaka mbetawɔ dia l’etena kɛmɔ, onto tshɛ kɛnɛmɔlaka dui ɔtɔi kana awui efula l’atei w’awui asɔ. Koko, hatotoleka nsala munga naka sho ndjela atɔndɔ amɔtshi w’ohomba w’oma l’Afundelo.

Tɔndɔ dimɔ tanemaka lo Tokedi 18:13, diɔ mbutaka ɔnɛ: “Onto lakadimola esadi esadi la ntondo ka nde mpokamɛ dikambo dimɛna, dui sɔ diekɔ enginya ndo nsɔnyi le nde.” Eelo, mbɔsa yema ya wonya dia mpokamɛ akambo tshɛ dimɛna ndo mbidja yimba lo okadimwelo ayɛ ayokokimanyiya diaha wɛ ntondja ɛtɛkɛta wahomuya kana mbisha okadimwelo aha la nkanyiya. Ewo kayotokondja lo mbidjaka yimba efula lo dikambo ayotokimanyiya efula dia tɔhɛmɔla naka taya la ekanelo ka kɔlɔ ndo mbewɔ nsala munga.

Tɔndɔ dikina dia lo Bible mbutaka ɔnɛ: “Naka kokaka, lo edja tshɛ kaakadialemanɛ la nyu, nyodjasɛ l’anto tshɛ ki.” (Rɔmɔ 12:18) Sala la wolo ayɛ tshɛ dia monga la yimba ya mbidja wɔladi ndo nkamba kaamɛ. Etena kakambayɛ kaamɛ l’anto akina, ɔsawɔ la nɛmɔ, lɛmiyawɔ, sala la wolo dia mbawaandola ndo keketshawɔ. Lo nsala ngasɔ, ɛtɛkɛta ndo etsha waha la nkanyiya koka dimanyiyama esadi eto kana minyama yimba ndo munga ya weke koka kandɔma kana nɔngɔsɔma la ngandji tshɛ.

Enda kana wɛ koka nkondja wetshelo ɔmɔ w’ohomba oma lo munga kɛmɔtshi. Lo dihole dia nyanga dia mbisha tɛkɛ nɛndɛ lo kɛnɛ kakayatshi kana kakayasadi, kamba la diaaso sɔ dia wɛ mpamia waonga w’ɛlɔlɔ. Onde wɛ ekɔ l’ohomba wa nyomoleka mɛnya solo dia lotutsha, ɔlɔlɔ ndo ndjakimɛ? Ko kayotota dia memakana, wɔladi ndo ngandji? (Ngalatiya 5:22, 23) Lo mɛtɛ, wɛ koka nkondja wetshelo lo kɛnɛ kahayahombe nsala mbala kayaye. Sala la wolo diaha ndeka mbidja yimba lo woho wayaokayɛ kana shɛngiya yele la dui sɔ le yɛ. Salaka shɛkɛsɛkɛ koka nkimanyiya dia nkitshakitsha dikambo.

SHO KOKA NKONDJA WAHƆ LO MONGA LA EKANELO KA DIMƐNA

Monga la kanyi y’ɔlɔlɔ lo dikambo dia munga ayotokimanyiya dia sho ntondoya etena kayisalaso. Tayoleka monga la wɔladi la so shoamɛ ndo l’anto akina. Naka sho nsala la wolo dia nkondja wetshelo oma lo munga yaso, kete tayoleka monga akanga wa tomba ndo ɛlɔlɔ. Hatotoleka nkɔmɔ etema lo yɛdikɔ yambotamba elelo ndo hatotonga la kanyi ya kɔlɔ lo dikambo diaso. Mbeya ɔnɛ ndo anto akina wekɔ lo ndɔshana la munga yawɔ ayoleka tosukanya la wɔ. Kɛnɛ koleki ohomba ele, sho koka nkondja wahɔ oma lo mbeka dia mbokoya ngandji ka Nzambi ndo woho wende suke dia dimanyiya l’otema ɔtɔi.​—Kɔlɔsayi 3:13.

Onde munga ka Margaret kakatatɛkɛtshi lo etatelo akalanya diaaso dia lo nkumbo kande? Ndooko. Onto tshɛ akɛnyi dia ɔsɔ aki dui dia tɔɔla, djekoleko Margaret, ndo wakangɛnangɛna diangɔ dia ndɛ sɔ, kaanga mbaki makarɔni komonga. L’ɔkɔngɔ w’ɛnɔnyi efula, ekana ande ehende wakayɔkɔndɔlaka ɔkɔndɔ wahohamamɛki wa lo nkumbo wendana la diangɔ dia ndɛ le anawɔ ndo wakohɔ tena di’amɛna diakawetsha kaamɛ la watshɛwɔ. Kaanga mbakidiɔ ngasɔ, ɔsɔ aki tsho munga!

^ od. 2 Nkombo yakatshikitanyema.

^ od. 3 Makarɔni ndo abɛlɛ w’ekama ekɔ diangɔ dia ndɛ dialekawɔ nkatɛ lo nsanganya paatɛ ka makarɔni la oshi w’abɛlɛ w’ekama.