Miliyɔ y’anto nɔmbaka Nzambi lo nkamba la titrɛ yɛnya dilɛmiɛlɔ yele oko Nkumadiɔndjɔ, Latoyalaka, Allah, kana tsho Nzambi. Koko, Nzambi ekɔ la lokombo l’oshika. Onde wɛ pombaka nkamba la lɔ?

Naa lokombo laki Nzambi?

KƐNƐ KATA ANTO AMƆTSHI

 

Anto efula wasɛma dia Akristo mbewɔ mbutaka dia lokombo laki Nzambi ekɔ Yeso. Akina mbutaka dia lam’ele ekɔ paka Nzambi ɔtɔi Kanga-Wolo-Tshɛ, nkamba la lokombo lande l’oshika bu ohomba. Ndo akina mbutaka dia nkamba la lokombo l’oshika laki Nzambi ekɔ dui diahasungana.

KƐNƐ KATA BIBLE

 

Lokombo l’oshika laki Nzambi Kanga-Wolo-Tshɛ bu Yeso, nɛ dia Yeso bu Nzambi Kanga-Wolo-Tshɛ. Lo mɛtɛ, Yeso aketsha asekande atɛmɔdi dia nɔmba Nzambi lo mbuta ɔnɛ: “Papa, lokombo layɛ lakidiame.” (Luka 11:2) Yeso ndamɛ akalɔmbɛ Nzambi ate: “Papa, otombole lokombo layɛ.”​Joani 12:28.

Lo Bible, Nzambi mbutaka ɔnɛ: “Dimi kele Jehowa. Ɔsɔ kele lokombo lami; dimi halasha ndooko onto lotombo lami.” (Isaya 42:8) “Jehowa” ekɔ okadimwelo wa l’Ɔtɛtɛla wa alɛta anɛi w’ekuku wa lo Hɛbɛru JHWH, walembetshiya lokombo laki Nzambi. Lokombo lɔsɔ tanemaka mbala oko 7 000 lo Afundelo wa lo Hɛbɛru. * Lɔ mbaleka kambema mbala efula oleki titrɛ yele oko “Nzambi,” “Kanga-Wolo-Tshɛ,” kana “Nkumadiɔndjɔ,” ndo lɔ mbaleka tanema ndeka nkombo nkina yele oko Abrahama, Mɔsɛ kana Davidɛ.

Lo Bible k’otondo ndooko dihole diashimba Jehowa di’onto nkamba la lokombo lande lo yoho yɛnya dilɛmiɛlɔ. Koko, Afundelo mɛnyaka dia ekambi waki Nzambi wakakambaka la lokombo laki Nzambi aha l’okakatanu. Vɔ wakalidjaka lo nkombo yakawɔlɛka ana awɔ, ɛnyɛlɔ oko Elidja lokombo lalembetshiya ɔnɛ “Jehowa kele Nzambi kami,” ndo lokombo Zɛkariya lokombo lalembetshiya ɔnɛ “Jehowa akohɔ.” Ndo vɔ komengengaka nkamba la lokombo laki Nzambi lo asawo awɔ wa lushi la lushi.​—Ruta 2:4.

Nzambi nangaka dia sho nkamba la lokombo lande. Sho keketshamaka dia ‘mbisha Jehowa losaka ndo mbelɛ lokombo lande.’ (Osambo 105:1) Nde mbidjaka ndo yimba dikambo dia wanɛ “wakana yimba lo lokombo lande.”​—Malaki 3:16.

“Anto weye dia wɛ, lele lokombo layɛ Jehowa, Wɛmɛ kele Ɔnɛ-Laheme-Tshɛ lo nkɛtɛ k’otondo.”​—Osambo 83:18.

 Kakɔna kalembetshiya lokombo laki Nzambi?

Waa nomb’ewo mɔtshi fɔnyaka dia lo Hɛbɛru Lokombo Jehowa nembetshiyaka “Nde salaka dia ndjaala.” Elembetshielo ɛsɔ mɛnyaka dia Nzambi koka nsala dia ndamɛ kana dia ditongami diande ndjaala kɛnɛ tshɛ kahombama dia nkotsha lolango lande. Paka Otungi lele Kanga-Wolo-Tshɛ mbakoka nsala akambo lo ndjela lokombo lɔsɔ.

KƐNƐ KALEMBETSHIYA LƆ LE YƐ

 

Mbeya lokombo laki Nzambi ayotshikitanya yoho yayɛ ya nkanyiya lo dikambo diande. Wɛ ayɛna dia ekɔ wɔdu ndjasukanya la nde. Ko ngande wakokayɛ ndjasukanya l’onto le yɛ wɛ heye lokombo lande? Diakɔ diele, woho wakakosholɛ Nzambi lokombo lande kɛnyaka dia nde nangaka dia wɛ ndjasukanya la nde.​—Jakɔba 4:8.

Wɛ koka monga l’eshikikelo dia Jehowa ayotetemala nsala akambo lo yoho yɔtɔnɛ la lokombo lande, nɛ dia nde ekɔ Nzambi katokotshaka alaka ande nshi tshɛ. Diakɔ diele Bible mbutaka ɔnɛ: “Wanɛ weya lokombo layɛ wayoyaɛkɛ le yɛ.” (Osambo 9:10) Wɛ ayoleka ndjaɛkɛ le Nzambi etena kayoyeya dia lokombo Jehowa kakatana la waonga ande wele oko, ngandji ka kɔlamelo, woho wokanande nkandji, kɛtshi ndo losembwe. (Etombelo 34:5-7) Ekɔ dui di’ekeketshelo dia mbeya dia Jehowa ayotetemalaka nkotsha alaka ande ndo nde hasalaki pondjo dui diahɔtɔnɛ la waonga ande.

Mbokɛmaka hwe dia mbeya lokombo laki Nzambi Kanga-Wolo-Tshɛ ekɔ tshondo ya diɛsɛ. Dui sɔ koka kodiholɛ lokuke dia wɛ nkondja ɛtshɔkɔ kakianɛ ndo lo nshi yayaye. Nzambi ndakaka ɔnɛ: “Dimi layowokokɛ, nɛ dia nde mbeyaka lokombo lami.”​—Osambo 91:14.

“Onto tshɛ lelɛ lokombo la Jehowa ayoshimbamɛ.”​—Jɔɛlɛ 2:32.

Lokombo laki Nzambi lambokadimɔma lo ɛtɛkɛta efula

^ od. 9 Dikadimwelo efula dia Bible minyaka lokombo laki Nzambi ko vɔ lihɛnya la titrɛ “NKUMADIƆNDJƆ” lo alɛta a weke ndo dikadimwelo dikina diekɔ la lokombo laki Nzambi paka lo avɛsa amɔtshi wakawasɔnɛ kana lo nɔtɛ ya l’ɛse ka dikatshi. Bible​—Ekadimwelo k’andja w’oyoyo kambaka la lokombo laki Nzambi mbala efula ka mamba lo Bible k’otondo.