Womoto ɔmɔtshi lelɛwɔ Patricia akate ate: “ETENA KAKIMI DIKƐNDA, ASE NKUMBO KAMI WAKATƐNGAKA NDO WAKAPANGWƐKA EFULA. Dimi kombadimanyiyaka. Kaanga etena kakimi opalanga, lakatetemalaka nkanyiya lo dikambo di’awui wa kɔlɔ wakawasalɛka l’edja ka nshi ndo dimi kondalaka djɔ.” Eelo, lɔsɛnɔ lolodi la nkɛlɛ ndo tokumbɛkumbɛ hasha onto ɔngɛnɔngɛnɔ ndo demba dimɛna. Lo mɛtɛ, wekelo mɛnyaka dia onto laha dimanyiyana koka . . .

  • Ntshika nkɛlɛ ndanya diɔtɔnganelo diasande l’anto akina ndo dui sɔ koka mbokonya dia nde ndjanganya l’anto ndo ndjaoka ompoko

  • Momala esadi, monga l’ekiyanu ndo kaanga nkɔmɔ amboleka

  • Mbidjaka yimba paka lo munga ndo kɛsɔ mbokonyaka diaha nde ngɛnangɛna la lɔsɛnɔ

  • Mbokonya dia nde ndjaoka oko nde hadje yimba l’awui wa lo nyuma

  • Mbokonya dia nde monga l’ekiyanu efula ndo waale w’efula wa ntata hemɔ, mbidja ndo hemɔ ka mbidɛka dikila, hemɔ ka lo doyi ndo hemɔ kina yele oko, hemɔ ka l’asɔnga ndo l’ɔtɛ *

KAKƆNA KALEMBETSHIYA EDIMANYIELO? Edimanyielo nembetshiyaka nkimwɛ onto lambosala kɔlɔ ndo minya nkɛlɛ, tokumbɛkumbɛ kana tokanyi ta nsɔmbɔya. Kɛsɔ halembetshiya dia dinyadinya kɔlɔ, kietɛ tshitshɛ kana mbisha tɛkɛ nɛndɛ ɔnɛ tɔ hasalemi. Koko, edimanyielo ekɔ monga la kanyi ya dimɛna yoye oma le onto yɛnya dia nde tshutshuyama la ngandji k’anto akina dia mbidja wɔladi ndo dia nsɔnga kana nama diɔtɔnganelo dia dimɛna l’onto okina.

Edimanyielo nto kɛnɛmɔlaka eokelo k’oshika. Onto ladimanyiyana nshihodiaka dia sho tshɛ salaka kɔlɔ kana pɛkato l’ɛtɛkɛta ndo l’etsha. (Rɔmɔ 3:23) Lo kɛnɛ kendana la nkɛnɛmɔla shɛnɔdi ya ngasɔ, Bible mbutaka ɔnɛ: “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande.”​—Kɔlɔsayi 3:13.

Diakɔ diele ekɔ dimɛna mbuta dia edimanyielo ekɔ etenyi kɛmɔtshi k’ohomba ka ngandji, nɛ dia ngandji kekɔ “dimama dia kokele.” (Kɔlɔsayi 3:14) Lo mɛtɛ, lo  ndjela sitɛ k’Ɛtɛrnɛtɛ ka Clinique Mayo, edimanyielo konyaka lo . . .

  • Diɔtɔnganelo di’oshika, mbidja ndo nsaki ya ndjadja lo dihole di’onto okina, oshihodielo, ndo kɛtshi otsha le onto losadi kɔlɔ

  • Monga la ki ka lo yimba ndo la wɔladi la Nzambi

  • Kitshakitsha ekiyanu, lonyangu ndo lohetsho

  • Okitshekitshelo wa tolembetelo ta ɔkɔmwɛlɔ

YADIMANYIYA WƐMƐ. Lo ndjela jurnalɛ mɔtshi (Disability & Rehabilitation) ndjadimanyiya koka monga “dui dioleki wolo nsala,” koko ɔsɔ ekɔ “dui dioleki ohomba lo yoonge” oyadi ya lo yimba kana lo demba. Kakɔna kakoka kokimanyiya dia wɛmɛ ndjadimanyiya?

  • Tolongamɛke dia wɛ monga kokele, koko etawɔ dia sho tshɛ salaka munga.​—Ondaki 7:20

  • Kondja wetshelo oma lo munga yayɛ diaha wɛ ndjosalaka munga yakɔ yaamɛ nto

  • Onga la solo dia lotutsha otsha leyɛ wɛmɛ; awui ndo mbekelo mɔtshi ya kɔlɔ koka monga ko hayomwe mbala kakɔ ɔtɔi.​—Ɛfɛsɔ 4:23, 24

  • Ongaka la diɔtɔnganelo la angɛnyi wakeketshana, wele l’ekanelo k’ɔlɔlɔ ndo w’ɛlɔlɔ koko wakoka kotɛ mɛtɛ.​—Tokedi 13:20

  • Naka wɛ ambosalɛ onto ɔmɔtshi dui dia kɔlɔ, etawɔ munga kakɔ ndo onga suke dia nɔmba edimanyielo. Etena kayoyodja wɔladi, wɛ ayonga nto la wɔladi wa l’etei k’otema.​—Mateo 5:23, 24

ATƆNDƆ WA LO BIBLE KIMANYIYAKA MƐTƐ!

L’ɔkɔngɔ wa mbeka Bible, Patricia lakatatɛkɛtshi dia nde lo mbɔtwɛlɔ, akeke woho wa dimanyiya, nde mbutaka ate: “Lakayaoke dia lambotshungɔ oma lo nkɛlɛ kaki tshondo ya lɔlɛngɔ lo lɔsɛnɔ lami. Handjotata hemɔ nto ndo handjosala dia anto akina nsowa. Atɔndɔ wa lo Bible toshikikɛka dia Nzambi tokaka ngandji ndo nangaka dia sho monga la lɔsɛnɔ loleki dimɛna.”

Pami kɛmɔtshi kelɛwɔ Ron akate ate: “Dimi hakoke mbahemɛ tokanyi ndo etsha w’anto akina. Koko dimi koka mbahemɛ tokanyi ndo etsha ami. Naka dimi nangaka wɔladi, kete dimi pombaka minya tokumbɛkumbɛ. Nɛ dia dimi hakoke monga onto lalanga wɔladi ko l’etena kakɔ kaamɛ lekɔ la tokumbɛkumbɛ. Kakianɛ laya la nkum’otema ka dimɛna.”

^ od. 8 Oma lɛnɛ ɔsami awui anɛ: Clinique Mayo, sitɛ y’Ɛtɛrnɛtɛ yendana l’awui w’aseka enganga yaki Johns Hopkins ndo jurnalɛ yelɛwɔ ɔnɛ: Social Psychiatry and Psychiatric Epidemiology.