Ɔkɔkɔ ɔmɔtshi amboshishɔ. Ondo wonya wambowotalɛɛka adiyo w’ɔmɔngɛla yema yema, vɔ wamboyangana la ɛkɔkɔ ekina. Wony’ɔnɛ, ɔkɔkɔ akɔ hayokoka mɛna asekande ndo olami. Wonya wayanga mbidja. Ɔkɔkɔ wamboshishɔ l’okidi lɛnɛ ahangiya nyama ya ngala ndo vɔ waya bu l’ekokelo. L’ekomelo, nde amboka dui di’olami ande ayalawɔ oya le wɔ, ambookumbatɛ, ambowodja la tshina dia dihɔndɔ diande dia laadiko ndo otawɛmbɛ otsha la ngelo.

JEHOWA ndjaɛdikaka mbala efula la olami w’ɛkɔkɔ wa ngasɔ. Lo Bible, nde toshikikɛka ate: “Dimi dime layuyanga ekoko ami wulu, layuwêla.”—Ezekiyele 34:11, 12.

“Ekoko wa lu dihuli diami di’eleshelu”

Waa na wele ɛkɔkɔ wa Jehowa? Lo tshena pe, ɛkɔkɔ wa Jehowa wekɔ ekambi ande wawooka ngandji ndo wɔɔtɛmɔla. Bible mbutaka ɔnɛ: ‘Nyoye tɔɔtɛmɔlɛ ndo tookusame; nyɛsɔ toke adwe la ntondo ka Jehowa Osadi aso. Nɛ dia nde ekɔ Nzambi kaso, ndo tekɔ anto walongande, ɛkɔkɔ walamande.’ (Osambu 95:6, 7) L’ɛnyɛlɔ k’ɛkɔkɔ wa mɛtɛ mɛtɛ wayela olami awɔ, atɛmɔdi wa Jehowa ngɛnangɛnaka ndjela Olami awɔ. Onde vɔ hawosale kɔlɔ? Vɔ salaka. Lo tena dimɔtshi, ekambi waki Nzambi ndjongaka ɛkɔkɔ ‘wakadiangana,’ “ɛkɔkɔ wakashishɔ,” ndo “ɛkɔkɔ wakatanganɛka.” (Ezekiyele 34:12; Mateo 15:24; 1 Petero 2:25) Kaanga mbediɔ ngasɔ, etena kanganɛ  onto ɔmɔtshi, Jehowa tetemalaka monga l’elongamelo ɔnɛ nde ayokalola.

Onde wɛ mbɔsaka dia Jehowa ekekɔ Olami ayɛ? Ngande wɛnya Jehowa dia nde ekɔ Olami w’ɛkɔkɔ ɛlɔ kɛnɛ? Tɔsɛdingole toho tosato:

Nde toleshaka lo nyuma. Jehowa mbutaka ɔnɛ: “Dimi layuwalesha adiyu w’ololo. . . . Vo wayetamaka lu akutu w’ololo. Vo wayolekaka adiyu w’omongela lu [ahole w’amɛna].” (Ezekiyele 34:14) Jehowa hatshike dia tosha mbo ya ndɛ ya lo nyuma yotshikitanyi l’etena kahombama. Onde wɛ koka nkanyiya woho wakayakondja okadimwelo lo dɔmbɛlɔ diakayayangaka ekimanyielo oma lo sawo dia wekelo, sawo dia lo sɛkɛ kana vidɛo mɔtshi? Onde dui sɔ kokoshikikɛ ɔnɛ Jehowa ndjakiyanyaka lo dikambo diayɛ?

Nde tokokɛka ndo tosukɛka. Jehowa ndakaka ɔnɛ: ‘Layoyanga ɔnɛ wakashishɔ. Dimi layosola mpota ka ɔnɛ wakahomɔ, ndo layokeketsha ɔnɛ wele wɔdu.’ (Ezekiyele 34:16) Jehowa keketshaka wanɛ wele wɔdu kana wanɛ wadiɛnɛ l’ekiyanu. Nde mɔmbaka mpota y’ɛkɔkɔ ande, mbakimanyiyaka dia mpota nkɔnɔ naka wambohomɔ, ondo lo tshimbo y’asekaso ambetawudi. Ndo nde kaloyaka wanɛ wambangana ndo wanɛ walɔshana la tokanyi ta kɔlɔ.

Nde ndjaokaka dia nde ekɔ l’ɔkɛndɛ aso. Jehowa mbutaka ate: “Dimi layêsanganya uma l’ahuli tshe wakawadiangana . . . Dikambu layuyanga one wakashisho.” (Ezekiyele 34:12, 16) Jehowa hɔshi ɔkɔkɔ wamboshishɔ oko wɔnɛ wahayotanema. Nde mbeyaka etena kashishɔ ɔkɔkɔ, nde mboyangaka ndo nde mongaka l’ɔngɛnɔngɛnɔ etena kawosholande. (Mateo 18:12-14) Laadiko di’akambo tshɛ, nde mbelɛka atɛmɔdi ande wa mɛtɛ ɔnɛ “ekoko ami, ekoko wa lu dihuli diami di’eleshelu.” (Ezekiyele 34:31) Wɛ ekɔ ɔmɔtshi wa l’atei w’ɛkɔkɔ ɛsɔ.

Jehowa hɔshi ɔkɔkɔ wamboshishɔ oko wɔnɛ wahayotanema. Nde mongaka l’ɔngɛnɔngɛnɔ etena kawosholande

“Ufudia nshi yasu uku nshi y’edjedja”

Lande na kakoyanga Jehowa ndo kakɔlɔmbande dia wɛ nkalola le nde? Nɛ dia nde nangaka dia wɛ monga l’ɔngɛnɔngɛnɔ. Nde ndakaka ɛkɔkɔ ande ɔnɛ: ‘Layowasha ɛtshɔkɔ oko mvula.’ (Ezekiyele 34:26) Ɔsɔ bu daka di’anyanya. Ondo wɛ ambɛnaka mɛtɛ ka dikambo sɔ.

Ohɔ woho wakayayaoke etena kakayeye Jehowa. Ɛnyɛlɔ, ngande wakayayaoke mbala ka ntondo kakayeke akambo wa mɛtɛ wendana la lokombo la Nzambi ndo sangwelo diande lo dikambo di’anto? Onde wɛ hayoohɔ ɔngɛnɔngɛnɔ waki la yɛ etena kakayonge kaamɛ l’asekayɛ Akristo lo losanganya lɔmɔtshi la woke? Etena kakayonge l’akoka wa mbewoya onto ɔmɔtshi lakɛnya nsaki lokumu l’ɔlɔlɔ, onde wɛ kokalola lakayɛ l’ɔngɛnɔngɛnɔ ndo l’ɔlɔ w’efula?

Wɛ kokaka nyomonga l’ɔngɛnɔngɛnɔ ɔsɔ. Ekambi waki Nzambi wa lo nshi y’edjedja wakalɔmbɛ ɔnɛ: “[Jehowa] li, utukaluya le ye, ku shu tayukalula mete. Ufudia nshi yasu uku nshi y’edjedja.” (Delu dia Jeremiya 5:21) Jehowa akakadimola dɔmbɛlɔ sɔ, ndo ekambi ande wakakalola dia ndjookambɛ l’ɔngɛnɔngɛnɔ nto. (Nehemiya 8:17) Jehowa ayosala woho akɔ waamɛ ndo lo dikambo diayɛ.

Koko, nkalola le Jehowa bu dui dia wɔdu. Sɛdingola ekakatanu ɛmɔtshi wadjɛ anto wekamu dia nkalola ndo woho wakokayɛ mbakandola.