Pumunta sa nilalaman

Pumunta sa pangalawahing menu

Mga Saksi ni Jehova

Tagalog

Warwick Photo Gallery 1 (Mayo Hanggang Agosto 2014)

Warwick Photo Gallery 1 (Mayo Hanggang Agosto 2014)

Itinatayo ng mga Saksi ni Jehova ang kanilang bagong pandaigdig na punong-tanggapan sa Warwick, New York. Mula Mayo hanggang Agosto 2014, malaki na ang pagsulong sa pagtatayo ng Vehicle Maintenance Building, Administration Offices/Services Building, at sa residence building C at D. Ipinakikita ng photo gallery na ito ang mga ginawa noong panahong iyon.

Drawing ng buong pasilidad sa Warwick. Paikot mula sa itaas sa kaliwa:

  1. Vehicle Maintenance Building

  2. Visitor Parking Building

  3. Maintenance Building/Resident Parking

  4. Residence B

  5. Residence D

  6. Residence C

  7. Residence A

  8. Administration Offices/Services Building

Mayo 1, 2014​—Warwick site

Tanawin mula sa timog-kanluran, nakaharap sa hilaga sa Sterling Forest Lake (Blue Lake). Sa harap, ginagawa ang basement ng residence D. Malapit sa lawa, inihahanda ang mga hulmahan ng kongkreto para sa residence C.

Mayo 14, 2014​—Off-site prefabrication center

Binubuo ng mga manggagawa ang prefabricated residential bathroom na tinatawag na pod. Kasama sa pod ang hamba, dingding, instalasyon ng mga tubo at kuryente, bentilasyon, at pinto ng bathtub. Tatapusin ang banyo kapag ikinabit na ang pod sa gusali.

Mayo 22, 2014​—Vehicle Maintenance Building

Mga tuberong gumagawa sa basement. Sa panahon ng proyekto, ang seksiyong ito ay gagamiting silid-kainan para sa mga 500 manggagawa, at 300 pa sa ibang mga lugar sa gusali. Sa pagtatapos ng proyekto, aalisin ang pansamantalang mga silid-kainan, at ang gusali ay gagamitin para sa pagmamantini ng mga sasakyan.

Hunyo 2, 2014​—Vehicle Maintenance Building

Isang crew ang naglalatag ng espesyal na klase ng lupa para sa green roof. Ang mga green roof, na tinatamnan ng halaman, ay nakatutulong sa kapaligiran dahil nababawasan ang kailangang enerhiya, napababagal ang pag-agos ng tubig-ulan, at nasasala ang mga pollutant mula sa ulan.

Hunyo 5, 2014​—Administration Offices/Services Building

Ang istrakturang ito ay bubuoin ng tatlong magkakarugtong na gusali na may pinagsamang lawak na 42,000 metro kuwadrado (450,000 sq ft). Dito, inilalagay ng mga kontratistang tagalabas ang steel reinforcing bar para sa mga haligi.

Hunyo 18, 2014​—Vehicle Maintenance Building

Mga manggagawang gumagamit ng propane torch para ikabit ang aspaltong bubong. May suot silang safety harness para hindi mahulog.

Hunyo 24, 2014​—Residence C

Pagkakabit ng prefabricated ductwork at HVAC equipment. Mga 35 porsiyento ng mga Saksing nagtatrabaho sa proyekto sa Warwick ay mga babae.

Hulyo 11, 2014​—Montgomery, New York

Ang pasilidad na ito, na ginagamit bilang bodega at prefabrication center, ay nakuha noong Pebrero 2014 para gamitin sa proyekto. Mayroon itong interior space na 20,000 metro kuwadrado (220,000 sq ft). Ang mga bagay na puti sa pinakaitaas sa kanan ng larawan ay mga pod ng banyo na handa nang ipadala.

Hulyo 24, 2014​—Residence C

Ang hilagang-silangang seksiyon ng gusali. Mga 200 miyembro ng staff ng punong-tanggapan ang titira dito. Karamihan sa indibiduwal na mga tirahan ay may sukat na nasa pagitan ng 30 at 55 metro kuwadrado (350 at 600 sq ft) at may kasamang kusina, banyo, at maliit na balkonahe.

Hulyo 25, 2014​—Maintenance Building/Resident Parking

Inihahanda ang site para sa konstruksiyon. Sa pinakaitaas sa kaliwa ng larawan, dinudurog ng rock crusher ang nahukay na materyal na gagamitin kalaunan sa proyekto. Sa pagtatapos ng buong proyekto, mga 260,000 metro kubiko (340,000 cu yd) ng lupa ang naalis na sa site sa Warwick. May average na 23 dump truck ang ginagamit araw-araw.

Hulyo 30, 2014​—Vehicle Maintenance Building

Nagtatanim ng mga halaman sa bubong.

Agosto 8, 2014​—Warwick site

Tanawin mula sa malaking crane, nakaharap sa timog-kanluran mula sa itaas ng office building. Sa pinakaibabang kaliwa ng larawan, ang tapos nang Visitor Parking Building, na punô ng mga sasakyan ng mga manggagawa bawat araw. Ang ilang Saksi ay nagbiyahe nang hanggang 12 oras papunta sa site para magboluntaryo sa loob lang ng tatlo o apat na araw.

Agosto 13, 2014​—Vehicle Maintenance Building

Malapit nang matapos ang isang pansamantalang silid-kainan. Mapapanood ng mga manggagawa ang pang-umagang pagsamba at iba pang espirituwal na programa sa tanggapang pansangay ng United States sa pamamagitan ng mga video monitor (hindi pa nakakabit) at mga speaker sa kisame.

Agosto 14, 2014​—Administration Offices/Services Building

Pagbubuhos ng semento sa unang palapag. Sa kanan, ginagamit ng manggagawa ang isang concrete vibrator para matiyak na walang hangin sa ilalim ng semento at masisiksik itong mabuti.

Agosto 14, 2014​—Administration Offices/Services Building

Mga tubo ng kuryente sa gitna ng gusali, na handa nang takpan ng basement slab.

Agosto 14, 2014​—Administration Offices/Services Building

Malapit nang matapos ang pagbubuhos ng semento sa unang palapag. Sa kasalukuyan, ito ang pinakamalaking buhos ng semento sa proyekto sa Warwick, mga 540 metro kubiko (700 cu yd). Ang semento ay inihanda sa planta sa site, dinala ng walong mixing truck at dalawang concrete pump, at ibinuhos sa loob ng mga 5 1/2 oras. Makikita sa gitna ng larawan ang isa sa mga hagdan ng gusali.

Agosto 14, 2014​—Residence C

Pagtatayo ng parapet sa bubong. Sa background, itinatayo ang basement ng residence A.

Agosto 15, 2014​—Residence C

Isang tapos nang pod ng banyo ang iniaangat ng crane sa ikatlong palapag. Maraming prefabricated na materyal ang ginamit sa proyekto sa Warwick, kaya naiwasan ang siksikan sa site at mas mabilis ang pagtatayo.

Agosto 20, 2014​—Residence C

Ikinakabit ng mga kontratista ang precast energy-efficient na mga panel ng kongkretong dingding. May kulay na ang semento, kaya hindi na kailangang pinturahan ang mga panel at madali itong mantinihin. Madali itong ikabit, na tutulong para matapos sa itinakdang panahon ang proyekto.

Agosto 31, 2014​—Warwick site

Tanawin mula sa timog-kanlurang seksiyon. Sa harap, itinatayo ang mga porma para sa susunod na palapag ng residence D; sa likuran nito, halos tapos na ang istraktura ng residence C.