Accessibility setting

Pumili ng wika

Pumunta sa pangalawahing menu

Pumunta sa nilalaman

Mga Saksi ni Jehova

Tagalog

Pagkuha ng mga Litrato na Nagpapaganda sa Publikasyon

Pagkuha ng mga Litrato na Nagpapaganda sa Publikasyon

Paano kumukuha ng litrato ang mga photographer namin na nagpapaganda sa aming mga publikasyon at bumabagay sa artikulo? Para ilarawan ang mga hakbang na sangkot dito, pansinin kung paano dinisenyo at kinunan ng litrato * ang pabalat ng Setyembre 2015 ng Gumising!

  • Disenyo. Pagkatapos basahin ang artikulong “Balanseng Pananaw sa Pera,” ang mga designer sa Art Department, na nasa Watchtower Educational Center sa Patterson, New York, ay nagdrowing para ilarawan ang artikulo. Pagkatapos, iniharap nila ito sa Writing Committee ng Lupong Tagapamahala, na pumipili sa konsepto na kukunan ng litrato.

  • Lokasyon. Sa halip na kunan ang litrato sa aktuwal na bangko, ginamit ng photography team ang isa sa mga lobby sa Watchtower Educational Center bilang bangko. *

  • Modelo. Pumili ng mga modelo, na lahat ay mga Saksi ni Jehova, para ilarawan ang karaniwang kliyente sa isang bangko sa lunsod. Iniingatan ang mga rekord ng litrato para hindi iyon at iyon ding modelo ang lalabas sa aming mga publikasyon.

  • Props. Ang Art Department ay gumamit ng pera mula sa ibang bansa para ipakitang hindi sa United States ang bangko. Gumamit ang photography team ng mga props para maging angkop at makatotohanan ang eksena hangga’t maaari. “Sinisiguro namin ang lahat,” ang sabi ng photographer na si Craig.

  • Damit at makeup. Para sa photo shoot sa bangko, nagdala ang mga modelo ng sarili nilang damit. Pero kapag sinauna ang tagpo o eksena na nangangailangan ng pantanging kasuotan, ang Art Department ay nagsasaliksik at gumagawa ng angkop na kasuotan. Nilalagyan ng makeup ng mga makeup artist ang mga modelo para tumugma sa panahon, konteksto, o lugar na ipinakikita sa litrato. “Dahil ang kalidad ng photography ngayon ay high-resolution na,” ang sabi ni Craig, “dapat maging mas maingat kami. Puwede kasing masira ang litrato kahit maliit na pagkakamali lang.”

  • Photo session. Tiniyak ng mga photographer na ang lighting sa bangko ay magmukhang umaga. Sa bawat photo session, dapat tiyakin ng mga photographer na tama ang lighting (liwanag ng araw, liwanag ng buwan, o artipisyal na liwanag), na babagay ito sa eksena, at angkop ito sa mood ng eksena. “Di-tulad ng video,” ang sabi ni Craig, “may isang litrato lang kami para ipakita ang mood sa eksena, kaya napakahalaga ng lighting.”

  • Editing. Pinalabo naman ng mga photo editor ang pera para nakapokus ang mga mambabasa sa mga tao hindi sa kung saan nagmula ang pera. Kahit pula talaga ang kulay ng mga frame ng pinto at bintana, ginawa itong berde ng mga editor—kaya naman bumagay ito sa kulay ng magasin.

Bukod sa pagkuha ng mga litrato na ginagawa sa Patterson, ang mga tanggapang pansangay sa buong mundo—gaya sa Australia, Brazil, Canada, Germany, Japan, Korea, Malawi, Mexico, at South Africa—ay may mga photographer na puwedeng hilingang magpadala ng mga litrato para sa aming mga publikasyon. Buwan-buwan, ang Art Department sa Patterson ay nagdaragdag ng mga 2,500 litrato sa database nito. Marami sa mga ito ay nailathala na sa magasing Bantayan at Gumising!, na may mahigit 115 milyong kopya bawat isyu ang naipamahagi noong 2015. Inaanyayahan ka naming mag-tour sa aming pasilidad sa Patterson, New York, o sa alinmang tanggapang pansangay namin sa buong daigdig para matuto pa nang higit.

Pag-aalok ng magasin sa ministeryo

^ par. 2 Mas maraming litrato ang kinukuha para sa isang pabalat kaysa sa gagamitin. Pero marami sa mga outtake, gaya ng tawag nila rito, ay idinaragdag sa image library na gagamitin sa ibang proyekto.

^ par. 4 Kapag sa isang lansangan sa lunsod kukunan ang mga litrato, kadalasang kailangang kumuha ang Art Department ng permit mula sa mga awtoridad, na binabanggit kung ilang tao ang kasama, ilang kagamitan ang kakailanganin, at anong uri ng lighting ang gagamitin.

Higit Pang Impormasyon

Ano ang Bethel?

Ang Bethel ay isang natatanging lugar para sa isang napakahalagang layunin. Kilalanin ang mga naglilingkod doon.

Paano Isinusulat at Isinasalin ang mga Literatura ng Mga Saksi ni Jehova?

Naglalathala kami ng mga literatura sa mahigit 750 wika. Bakit namin ito sinisikap na gawin?