Pumunta sa nilalaman

Pumunta sa pangalawahing menu

Pumunta sa talaan ng mga nilalaman

Mga Saksi ni Jehova

Tagalog

Ang Bantayan  |  Nobyembre 2015

 TAMPOK NA PAKSA

Ano ang Tingin ng Diyos sa mga Digmaan?

Ano ang Tingin ng Diyos sa mga Digmaan?

Ano ang sagot mo sa tanong na iyan? Iniisip ng marami na pabor ang Diyos sa digmaan. Ikinakatuwiran nila na inutusan niya ang ilan sa kaniyang mga mananamba noon na makipagdigma; pinatutunayan iyan ng ulat ng Bibliya. Gayunman, napansin ng iba na tinuruan ng Anak ng Diyos, si Jesus, ang kaniyang mga tagasunod na ibigin ang kanilang mga kaaway. (Mateo 5:43, 44) Kaya ikinakatuwiran nila na baka nagbago na ang tingin ng Diyos sa digmaan at hindi na niya ito sinasang-ayunan sa ngayon.

Ano sa palagay mo? Sang-ayon ba ang Diyos sa mga digmaan? Kung oo, kaninong panig siya kumakampi sa mga digmaan ngayon? Kapag nalaman mo ang sagot sa mga tanong na ito, tutulong ito sa iyo na suriin ang iyong sariling pananaw tungkol sa digmaan. Halimbawa, kung alam mong hindi lang pinapaboran ng Diyos ang mga digmaan kundi sinusuportahan din niya ang mismong panig na kinakampihan mo, malamang na ikatuwa mo ito dahil natitiyak mong panalo na kayo. Pero ano ang madarama mo kung malaman mong ang kabilang panig ang sinusuportahan ng Diyos? Malamang na pag-iisipan mong muli ang iyong kakampihan.

May mas mahalagang bagay pa na nakataya. Malamang na maapektuhan ang pananaw mo sa Diyos kapag nalaman mo kung ano ang tingin ng Diyos sa mga digmaan. Kung kabilang ka sa milyon-milyon na lubhang naaapektuhan ng mga digmaan ng tao, tiyak na kailangan mong malaman ang sagot sa tanong na, Ang Diyos ba, gaya ng paniniwala ng ilan, ay manunulsol ng digmaan, na nagpapahintulot o sumasang-ayon pa nga sa pagdurusang nauugnay sa digmaan, o siya ba ay walang pakialam at walang malasakit sa kapakanan ng mga nasisiil?

Baka magulat ka na ibang-iba ang sagot ng Bibliya sa alinman sa mga opinyong iyan. Bukod diyan, mula noon hanggang ngayon, hindi nagbabago ang tingin ng Diyos sa mga digmaan. Talakayin natin ang sinasabi ng Bibliya hinggil sa tingin ng Diyos sa mga digmaan noong sinaunang panahon at noong unang siglo, nang narito pa si Jesus sa lupa. Tutulong iyan sa atin na maunawaan kung ano ang tingin ng Diyos sa mga digmaan ngayon at kung makikipagdigma pa rin ba ang tao sa hinaharap.