Accessibility setting

Pumili ng wika

Pumunta sa pangalawahing menu

Pumunta sa talaan ng mga nilalaman

Pumunta sa nilalaman

Mga Saksi ni Jehova

Tagalog

ANG BANTAYAN (EDISYON PARA SA PAG-AARAL) NOBYEMBRE 2016

Isang Salita na Punô ng Kahulugan!

Isang Salita na Punô ng Kahulugan!

“BABAE.” Kung minsan, iyan ang itinatawag ni Jesus sa mga kausap niyang babae. Halimbawa, nang pagalingin niya ang isang babaeng may kapansanan, na hukot na hukot sa loob ng 18 taon, sinabi ni Jesus: “Babae, pinalalaya ka na mula sa iyong panghihina.” (Luc. 13:10-13) Tinawag din ni Jesus ang kaniyang ina na “babae,” na itinuturing na isang magalang na katawagan noong panahon ng Bibliya. (Juan 19:26; 20:13) Pero mayroon pang salita na mas magalang kaysa rito.

Ginagamit ng Bibliya ang isang napakabait at magiliw na salita kapag tinutukoy ang ilang babae. Ginamit ito ni Jesus nang kausapin niya ang isang babae na inaagasan ng dugo sa loob ng 12 taon. Ang paglapit ng babaeng ito kay Jesus ay maituturing na paglabag sa Kautusan ng Diyos, dahil ayon dito, ang taong may ganitong kondisyon ay marumi. Kaya puwedeng sabihin na hindi siya dapat lumapit kaninuman dahil sa kaniyang kondisyon. (Lev. 15:19-27) Pero desperado na siya. Sa katunayan, “siya ay pinaranas ng maraming pahirap ng maraming manggagamot at nagugol na niya ang lahat ng kaniyang pag-aari at hindi nakinabang kundi sa halip ay lalo pa ngang lumubha.”—Mar. 5:25, 26.

Pasimpleng nakipagsiksikan ang babae sa maraming tao, lumapit sa likuran ni Jesus, at hinipo ang kaniyang palawit ng panlabas na kasuotan. Agad na huminto ang pag-agas ng dugo niya! Umaasa ang babae na sana ay hindi siya napansin, pero nagtanong si Jesus: “Sino ang humipo sa akin?” (Luc. 8:45-47) Kaya ang natatakot at nanginginig na babaeng ito ay sumubsob sa harap ni Jesus “at sinabi sa kaniya ang buong katotohanan.”—Mar. 5:33.

Para mapanatag ang babae, may-kabaitang sinabi ni Jesus: “Lakasan mo ang iyong loob, anak.” (Mat. 9:22) Ayon sa mga iskolar ng Bibliya, ang mga salitang Hebreo at Griego para sa “anak” sa anyong pambabae ay ginagamit sa makasagisag na paraan bilang kapahayagan ng “kabaitan at pagkamagiliw.” At para mas mapanatag ang loob ng babae, sinabi ni Jesus: “Pinagaling ka ng iyong pananampalataya. Yumaon kang payapa, at magkaroon ka ng mabuting kalusugan mula sa iyong nakapipighating sakit.”—Mar. 5:34.

“Anak.” Iyan din ang itinawag ng mayamang Israelita na si Boaz kay Ruth na Moabita. Malamang na naiilang si Ruth na maghimalay dahil hindi niya kilala ang lalaking may-ari ng lupain. Tinawag siya ni Boaz na “anak ko” at hinimok niya si Ruth na patuloy na maghimalay sa kaniyang bukid. Isinubsob ni Ruth ang kaniyang mukha sa harap ni Boaz at nagtanong kung bakit napakabait nito sa isang banyagang tulad niya. Para mapanatag si Ruth, sumagot si Boaz: “Lubusang iniulat sa akin ang lahat ng ginawa mo sa iyong biyenan [ang biyudang si Noemi] . . . Gantihan nawa ni Jehova ang iyong paggawi.”—Ruth 2:8-12.

Napakagandang halimbawa nina Jesus at Boaz para sa mga Kristiyanong elder! Kung minsan, baka kailangang kausapin ng dalawang elder ang isang sister na nangangailangan ng makakasulatang tulong at pampatibay. Matapos manalangin para sa patnubay ni Jehova at mapakinggang mabuti ang sister, mas makapagbibigay ang mga elder ng pampatibay mula sa Salita ng Diyos para mapanatag ito.—Roma 15:4.

Higit Pang Impormasyon

May Malasakit ba ang Diyos sa mga Babae?

Minamaliit ba ng Bibliya ang mga babae? Alamin ang sinasabi ng Diyos.