Accessibility setting

Pumili ng wika

Pumunta sa pangalawahing menu

Pumunta sa talaan ng mga nilalaman

Pumunta sa nilalaman

Mga Saksi ni Jehova

Tagalog

Bibliya Online

BAGONG SANLIBUTANG SALIN NG BANAL NA KASULATAN

Awit 51:1-19

Sa tagapangasiwa. Awitin ni David. Nang pumaroon sa kaniya si Natan na propeta pagkatapos niyang sipingan si Bat-sheba.+ 51  Pagpakitaan mo ako ng lingap, O Diyos, ayon sa iyong maibiging-kabaitan.+ Ayon sa kasaganaan ng iyong kaawaan ay pawiin mo ang aking mga pagsalansang.+   Lubusan mo akong hugasan mula sa aking kamalian,+ At linisin mo ako mula sa aking kasalanan.+   Sapagkat alam ko ang aking mga pagsalansang,+ At ang aking kasalanan ay laging nasa harap ko.+   Laban sa iyo, sa iyo lamang, ako ay nagkasala,+ At ang masama sa iyong paningin ay nagawa ko,+ Upang mapatunayan kang matuwid kapag nagsasalita ka,+ Nang sa gayon ay mapatunayan kang malinis kapag humahatol ka.+   Narito! Sa kamalian ay iniluwal ako na may mga kirot ng panganganak,+ At sa kasalanan ay ipinaglihi ako ng aking ina.+   Narito! Ikaw ay nalulugod sa pagkamatapat sa mga panloob na bahagi;+ At sa lihim na pagkatao ay ipaalam mo nawa sa akin ang tunay na karunungan.+   Dalisayin mo nawa ako mula sa kasalanan sa pamamagitan ng isopo, upang ako ay maging malinis;+ Hugasan mo nawa ako, upang ako ay maging mas maputi pa sa niyebe.+   Iparinig mo nawa sa akin ang pagbubunyi at pagsasaya,+ Upang ang mga butong dinurog mo ay magalak.+   Ikubli mo ang iyong mukha mula sa aking mga kasalanan,+ At pawiin mo ang lahat ng aking kamalian.+ 10  Likhain mo sa akin ang isang dalisay na puso, O Diyos,+ At maglagay ka sa loob ko ng isang bagong espiritu, yaong matatag.+ 11  Huwag mo akong itaboy mula sa iyong harapan;+ At ang iyong banal na espiritu ay huwag mo sanang alisin sa akin.+ 12  Isauli mo sa akin ang pagbubunyi sa iyong pagliligtas,+ At alalayan mo nawa ako ng isang nagkukusang espiritu.+ 13  Ituturo ko sa mga mananalansang ang iyong mga daan,+ Upang ang mga makasalanan ay agad na manumbalik sa iyo.+ 14  Iligtas mo ako mula sa pagkakasala sa dugo,+ O Diyos na Diyos ng aking kaligtasan,+ Upang ang aking dila ay may kagalakang makapagpahayag ng tungkol sa iyong katuwiran.+ 15  O Jehova, ibuka mo nawa ang mga labi kong ito,+ Upang ang aking bibig ay makapagpahayag ng iyong kapurihan.+ 16  Sapagkat hindi ka nalulugod sa hain—kung gayon ay ibinigay ko sana;+ Hindi ka nasisiyahan sa buong handog na sinusunog.+ 17  Ang mga hain sa Diyos ay isang wasak na espiritu;+ Ang pusong wasak at durog, O Diyos, ay hindi mo hahamakin.+ 18  Sa iyong kabutihang-loob ay gawan mo ng mabuti ang Sion;+ Itayo mo nawa ang mga pader ng Jerusalem.+ 19  Kung magkagayon ay malulugod ka sa mga hain ng katuwiran,+ Sa haing sinusunog at sa buong handog;+ Kung magkagayon ay mga toro ang ihahandog sa iyong sariling altar.+

Talababa