Pumunta sa nilalaman

Pumunta sa pangalawahing menu

Pumunta sa talaan ng mga nilalaman

Mga Saksi ni Jehova

Tagalog

2017 Taunang Aklat ng mga Saksi ni Jehova

 TAMPOK NA MGA PANGYAYARI NOONG NAKARAANG TAON

“Kayo ang Pinakamabuting Kapitbahay”

“Kayo ang Pinakamabuting Kapitbahay”

NOONG Mayo 7 at 8, 2016, maingay sa lobby ng pandaigdig na punong-tanggapan sa 25 Columbia Heights, Brooklyn, New York. Bagaman karaniwan nang sarado ang lobby at mga tour display kapag Sabado’t Linggo, sa okasyong iyon ang mga kapitbahay na nakatira sa palibot ng Bethel ay inanyayahan sa isang open house para makita ang ating displey tungkol sa kasaysayan ng Bibliya.

Ang kampanya ng pag-iimbita ay magandang patotoo sa komunidad at nakapagpaginhawa sa espirituwal ng mga nakibahagi rito. Talagang nakapagpapatibay na marinig  ang magagandang komento mula sa ating matagal nang mga kapitbahay.

“Nanirahan ako sa iba’t ibang tahanan sa [palibot ng Bethel] mula noong dekada ’60,” ang sabi ng isang lalaki, “at kayo ang pinakamabuting kapitbahay. Talagang mami-miss namin kayo, at sana huwag na kayong lumipat.”

“Hindi magiging ganito ang ating pamayanan kung wala kayo,” ang sabi ng isang babae. “Labis kaming nagpapasalamat na naging kapitbahay namin kayo sa loob ng maraming taon.”

Maraming payunir na nangangaral sa teritoryong iyon ang natutuwa dahil palakaibigan at nakikinig ang mga tao roon. Isang ginoo na miyembro ng isang samahan ng magkakapitbahay ang labis na nagpapasalamat sa ating organisasyon at nagsabi na talagang nanghihinayang siya na wala siya sa panahon ng open house.

Ang mga resulta nito ay totoong nakapagpapatibay. Sa nakalipas na dalawang araw, 48 di-Saksi ang bumisita para makita ang displey ng mga Bibliya. Sa panahon ng open house, may mga Bethelite na nasa lobby para tanggapin at kausapin ang mga kapitbahay na bumisita.

Si Sally, isang dalaga, ay naglibot nang mga kalahating oras sa eksibit. Pagdating niya, nagkataong nasa lobby ang mga payunir na nag-imbita sa kaniya. Sinabi ni Sally na hindi niya akalaing may mga Bibliya na nakadispley. Sinabi sa kaniya ng mga payunir na natutuwa silang makilala ang isang propesyonal na gaya niya na nagpapahalaga sa Bibliya. Sumagot si Sally: “Napakahalaga nito. Ang Bibliya ang tanging paraan para malaman natin ang mensahe ng Diyos. Ito ay isang buháy na dokumento para sa ating buhay.”

 Sinabi ni Sally na ang pagpapahalaga niya sa Bibliya ang nag-udyok sa kaniya na mag-aral ng Latin at Griego at na talagang interesado siya sa pagsasalin. Para sa kaniya, mahalaga ang tamang pagsasalin upang ang mensahe ay hindi maging ayon sa ilang kagustuhan ng tao. Nang sabihin ng mga payunir kay Sally na ang ating website na jw.org ay may salig-Bibliyang mga materyal na isinalin sa mahigit 800 wika, hindi siya makapaniwala at tuwang-tuwa siya. Nang ipaliwanag ng mga sister ang ginawa ng mga tagapagsalin sa pangalang Jehova, nagulat siya at nagtanong, “Bakit inalis ang pangalang Jehova sa Bibliya?” Nang papaalis na si Sally, sinabi niya, “Dito lang ako nanirahan sa pamayanang ito, at kayo ang pinakamabuting kapitbahay.”

Noong Lunes pagkatapos ng open house, isang ministro ang lumapit kay John, isang Bethelite na nagka-cart witnessing malapit sa Bethel. Sinabi niya kay John na nagustuhan niya ang pagbisita noong open house at natutuwa siya na sinusunod natin ang Bibliya. Pero pagkatapos makipag-usap, bigla niyang sinabi, “Galít ako sa mga Saksi!” Nalito si John at nagtanong kung bakit. “Kasi lilipat na kayo! DITO LANG KAYO! Bumili kayo ng mas malalaking gusali, o magtayo kayo ng anumang gusto n’yo, basta dito lang kayo. Pinatibay n’yo ang pamayanang ito. Bakit kailangan pa ninyong lumipat?”

Sa kabuoan, ang kampanya sa pag-iimbita at ang open house para sa displey ng mga Bibliya ay mainam na patotoo sa komunidad, at nagtampok sa pangalan ng Diyos sa ating mga kapitbahay higit kailanman.