Pumunta sa nilalaman

Pumunta sa pangalawahing menu

Pumunta sa talaan ng mga nilalaman

Mga Saksi ni Jehova

Tagalog

2015 Taunang Aklat ng mga Saksi ni Jehova

 TAMPOK NA MGA PANGYAYARI NOONG NAKARAANG TAON

Mga Ulat Mula sa Iba’t Ibang Panig ng Daigdig

Mga Ulat Mula sa Iba’t Ibang Panig ng Daigdig

Ibinabahagi Nila ang Na-download Nila

Kahit hindi pa gaanong available ang Internet sa Cuba, posible nang makakonek ngayon dito dahil sa mga puwestong binuksan ng isang kompanya ng telepono. Pero napakamahal nito. Kaya para matulungan ang mga kapatid na makinabang sa jw.org, pinasigla ng sangay ang mga kongregasyon na mag-atas ng isang mamamahayag na magda-download ng mga publikasyon, rekording, at video mula sa website at saka ito ibabahagi sa iba pang mga Saksi sa kanilang kongregasyon. Maganda ang resulta ng kaayusang ito.

 Kingdom Hall Muna Bago Cellphone

Si Teona, edad 10, at ang 8-anyos niyang kapatid na si Tamuna, ay nakatira sa Republic of Georgia. Gusto nilang magkaroon ng cellphone. Para makabili sila, nangako ang lola nila na bibigyan niya sila ng kaunting halaga buwan-buwan mula sa kaniyang pensiyon. Kaya lang, namatay ang lola nila. Pero ibinigay ng pamilya sa mga bata ang huli at buong pensiyon ng lola nila para mabili ang gusto nilang cellphone. Matapos itong pag-isipan, sumulat ang mga bata sa kongregasyon nila: “Alam po naming dalawang linggo na lang at sisimulan na ang pagtatayo ng bago nating Kingdom Hall sa ating nayon ng T’erjola. Gustong-gusto pong tumulong dito ng lola namin, kaya naisip naming dalawa na ibigay sa kongregasyon ang huling pensiyon ni Lola sa halip na ibili ng cellphone. Sana po, igawa n’yo kami ng magandang Kingdom Hall!”

Griegong Kasulatan sa Wikang Tetum

Noong Enero 17, 2014, sa Dili, Timor-Leste, inilabas ni Geoffrey Jackson ng Lupong Tagapamahala ang Bagong Sanlibutang Salin ng Kristiyanong Griegong Kasulatan sa wikang Tetum, ang karaniwang wika sa bansa. Dati, ang Simbahang Katoliko lang ang nag-iimprenta at namamahagi ng mga kopya ng Griegong Kasulatan sa wikang Tetum, at ayaw nilang ipagbili ito sa mga Saksi ni Jehova o sa mga taong iniisip nilang nakikipag-aral sa mga Saksi. Kaya lang, ang Katolikong salin ay maraming mali, kulang, lumang salita, at maraming mali sa pag-iimprenta. Pero tungkol naman sa Bagong Sanlibutang Salin, sinabi ni Darren, misyonero sa Timor-Leste: “Maraming taga-Timor Leste na nagbabasa ng Bagong Sanlibutang Salin ang humanga sa katumpakan nito, at humiling sila agad  ng kopya. Sinabi nilang madali itong basahin, at nagustuhan nila ang malalaking titik nito, lalo na nga’t di-gaanong maliwanag ang maraming bahay dito. Nag-aaral na ngayon ng Bibliya ang marami sa mga nagkaroon ng kopya nito.”

‘Mahalaga Ako kay Jehova’

Macedonia: Nangangaral gamit ang mga publikasyon sa wikang Romany

Noong Enero 2014, sumulong ang gawaing pagsasalin sa wikang Romany, na ginagamit sa Macedonia. Bumuo roon ng isang permanenteng team, at naaprobahan itong gumawa ng mga publikasyon sa wikang iyan hindi lang sa alpabetong Romano kundi gayundin sa Cyrillic. Napakalaking tulong nito sa mga nagsasalita ng Romany, na mas sanáy sa Cyrillic, na opisyal na alpabeto sa Macedonia.

Marami sa mga nagsasalita ng Romany ang naantig dahil pinaglalaanan sila ng organisasyon ni Jehova ng mga literatura sa kanilang wika. Sinabi ng isang sister: “Dahil Romany ang wika ko, madalas akong makaranas ng panghahamak mula sa ibang lahi. Kaya laking pasasalamat ko  dahil nadama kong mahalaga ako kay Jehova nang makatanggap ako ng mga literatura sa aking wika. Dahil dito, lalo akong napalapít sa kaniya.”

“Laking pasasalamat ko dahil nadama kong mahalaga ako kay Jehova nang makatanggap ako ng mga literatura sa aking wika”

Pagbabago sa Pangangasiwa

Noong Pebrero 1, 2014, sinimulang pangasiwaan ng tanggapang pansangay sa Estados Unidos ang teritoryo at mga kongregasyon sa Jamaica at sa Cayman Islands. Talagang may pagkakaisa ang mahigit 1.2 milyong mamamahayag sa teritoryo ng sangay sa Estados Unidos! Kasama rito ang 50 estado ng E.U., Bahamas, Bermuda, British at U.S. Virgin Islands, Puerto Rico, at Turks and Caicos Islands.

Mga Payunir sa Japan

Napananatili ng mga kapatid sa Japan ang masiglang espiritu ng pagpapayunir, at ang bilang ng mga regular pioneer na naglilingkod sa bansang ito ay pang-apat sa pinakamarami sa mundo. Sa pasimula ng 2014 taon ng paglilingkod, 2,646 na baguhan ang nagpayunir din, kaya umabot sa 65,668 ang bilang nila. Noong Marso 2014, mahigit sa kalahati ng lahat ng mamamahayag ang nakibahagi sa iba’t ibang anyo ng pagpapayunir.