IIKA-IKA SI LUZIA SA KANIYANG KALIWANG BINTI. Noong bata pa siya, nagkaroon siya ng polio, isang nakakahawang sakit na sumisira sa nervous system. Noong 16 anyos siya, sinabi ng babaeng pinagtatrabahuhan niya, “Pinarusahan ka ng Diyos dahil salbahe ka at masuwayin sa nanay mo.” Kahit lumipas na ang maraming taon, masama pa rin ang loob ni Luzia dahil doon.

NANG MALAMAN NI DAMARIS NA MAY BRAIN CANCER SIYA, tinanong siya ng tatay niya: “Ano’ng ginawa mo at nagkaganiyan ka? Tiyak na may ginawa kang masama kaya ka pinaparusahan ng Diyos.” Nadurog ang puso ni Damaris sa sinabi ng tatay niya.

Matagal nang inaakala na ang pagkakasakit ay parusa ng Diyos. Ayon sa aklat na Manners and Customs of Bible Lands, noong panahon ni Kristo, marami ang naniniwala na “ang karamdaman ay dahil sa kasalanan ng taong may sakit, o ng kaniyang mga kamag-anak, at na parusa ito dahil sa kasalanang iyon.” Sinabi ng Medieval Medicine and the Plague na maraming siglo pagkaraan ng panahon ni Kristo, “naniniwala ang ilan na ang mga salot ay parusa galing sa Diyos dahil sa kanilang mga kasalanan.” Kung totoo iyan, pinarusahan ba ng Diyos ang milyon-milyong namatay sa Europa dahil sa salot noong ika-14 na siglo? O hindi kaya resulta lang iyon ng isang bacterial infection, gaya ng napatunayan ng medisina nang maglaon? Baka maitanong ng ilan, talaga bang ginagamit ng Diyos ang sakit para parusahan ang mga tao dahil sa kanilang mga kasalanan? *

PAG-ISIPAN ITO: Kung ang sakit at pagdurusa ay nararapat na kaparusahan mula sa Diyos, bakit nagpagaling ng mga taong may sakit ang kaniyang Anak na si Jesus? Hindi ba parang sinasalungat niya ang katarungan at katuwiran ng Diyos? (Mateo 4:23, 24) Hinding-hindi kokontrahin ni Jesus ang Diyos. Sinabi niya: “Lagi kong ginagawa ang mga gusto niya” at, “ginagawa ko ang mismong iniutos sa akin ng Ama.”​—Juan 8:29; 14:31.

Maliwanag ang sinasabi ng Bibliya. Ang Diyos na Jehova ay “hindi kailanman magiging tiwali.” (Deuteronomio 32:4) Halimbawa, hinding-hindi niya pangyayarihin ang isang aksidente sa eroplano, na papatay ng daan-daang inosenteng tao, para lang parusahan ang isang taong nakasakay doon! Alam ni Abraham, isang tapat na lingkod, na matuwid ang Diyos at hindi Niya magagawang “[lipulin] ang mga matuwid kasama ng masasama.” “Malayong mangyari [iyan],” ang sabi niya. (Genesis 18:23, 25) Sinasabi rin ng Bibliya na “hindi gumagawa ng masama ang Diyos”; “hinding-hindi [siya] gagawa ng mali.”​—Job 34:10-12.

Ang pagdurusang nararanasan natin ay hindi parusa ng Diyos dahil sa ating kasalanan. Nilinaw ito ni Jesus nang makakita siya at ang mga alagad niya ng taong bulag mula pa nang ipanganak ito. “Tinanong siya ng mga alagad niya: ‘Rabbi, sino ang nagkasala at ipinanganak na bulag ang taong ito, siya ba o ang mga magulang niya?’ Sumagot si Jesus: ‘Hindi ang taong ito ang nagkasala o ang mga magulang niya, pero nagbukas ito ng pagkakataon para maipakita ang mga gawa ng Diyos.’”—Juan 9:1-3.

 Tiyak na nagulat ang mga alagad ni Jesus nang sabihin niya na hindi ang taong iyon o ang mga magulang nito ang nagkasala kung kaya nabulag ito. Hindi lang pinagaling ni Jesus ang pagkabulag ng taong iyon; ipinakita rin niya na mali ang paniniwalang ang pagdurusa ay parusa mula sa Diyos. (Juan 9:6, 7) Sa ngayon, isang kaaliwan para sa mga may malulubhang sakit na malamang hindi Diyos ang sanhi ng kanilang pagdurusa.

Tinitiyak sa atin ng Kasulatan

• “Ang Diyos ay hindi masusubok na gumawa ng masama, at hindi rin niya sinusubok ang sinuman na gumawa ng masama.” (SANTIAGO 1:13) Malapit nang alisin ng Diyos ang mga bagay na “masama” na matagal nang nagpapahirap sa mga tao, kasama na ang sakit, kirot, at kamatayan.

• “Pinagaling [ni Jesu-Kristo] ang lahat ng may sakit.” (MATEO 8:16) Nang pagalingin ng Anak ng Diyos ang lahat ng lumapit sa kaniya, ipinakita niya ang gagawin ng Kaharian ng Diyos para sa buong mundo.

• “Papahirin [ng Diyos] ang bawat luha sa mga mata nila, at mawawala na ang kamatayan, pati ang pagdadalamhati at ang pag-iyak at ang kirot. Ang dating mga bagay ay lumipas na.”​—APOCALIPSIS 21:3-5.

Kung gayon, bakit labis-labis ang kirot at pagdurusang nararanasan ng sangkatauhan? Matagal nang pinag-iisipan ng mga tao ang tanong na iyan. Kung hindi Diyos ang dapat sisihin, sino? Sasagutin ang mga tanong na iyan sa susunod na artikulo.