MAYO 23, 2024 | UPDATED: ENERO 21, 2025
RUSSIA

UPDATE—NAHATULAN ANG KAPATID | “Hindi Ako Iiwan ni Jehova”

I-PLAY

Noong Enero 20, 2025, hinatulan ng Urupskiy District Court of the Karachayevo-Circassian Republic si Brother Aleksey Pasynkov ng anim-na-taóng suspended prison sentence. Hindi niya kailangang makulong sa ngayon.

Profile

Aleksey Pasynkov

Ipinanganak: 1988 (Moscow, Moscow Region)

Maikling Impormasyon: Pinalaki ng isang nagsosolong ina. Nagtatrabaho si Aleksey bilang isang tubero at interior finisher

Noong 10 taóng gulang siya, nakipag-aral ng Bibliya ang nanay niya sa mga Saksi ni Jehova. Humanga siya sa paggalang ng mga Saksi sa Bibliya at sa pag-ibig na ipinapakita nila. Nabautismuhan ang nanay ni Aleksey noong 2000, at si Aleksey naman noong 2002

Napangasawa niya si Yuliya noong 2013. May anak silang lalaki na may kapansanan

Personal na mga Komento

Anong teksto sa Bibliya ang nakatulong sa inyong mag-asawa na makapagtiis?

Madalas kong pag-isipan ang 1 Corinto 10:13: “Anumang tuksong dumating sa inyo ay nararanasan din ng ibang tao. Pero ang Diyos ay tapat, at hindi niya hahayaang tuksuhin kayo nang higit sa matitiis ninyo, kundi gagawa siya ng daang malalabasan para matiis ninyo ang tukso.” Marami kaming pinagdaanang problema ng asawa ko sa nakalipas na mga taon. May malalang sakit sa isip ang anak naming lalaki mula pa nang ipanganak siya. Walong taon na siya ngayon at dapat laging may nakatutok sa pag-aalaga sa kaniya. Noong 2021, naaksidente ang kotseng sinasakyan ng mga magulang ng asawa ko. Namatay ang tatay niya, at may kapansanan na ngayon ang nanay niya. Pagkatapos, nangyari naman ang pag-uusig na ito. Ipinapaalala sa akin ng tekstong ito na hangga’t nasa sanlibutan pa tayo ni Satanas, talagang makakaranas pa tayo ng ganitong mga problema. Pero sa maraming pagkakataon, napatunayan naming nandiyan lang si Jehova. Binibigyan niya kami ng lakas para makapagtiis. Siyempre, gusto ko nang matapos ang pagsubok na ito. Pero kung magtagal man ito, nagtitiwala ako na hindi ako iiwan ni Jehova.

Alam nating dumanas man tayo ng iba’t ibang pagsubok, puwede tayong laging manganlong kay Jehova at manatiling masaya.—Awit 5:11.

Time Line

Nobyembre 23, 2021

Inaresto ng mga awtoridad si Aleksey sa pinagtatrabahuhan niya at hinalughog ang bahay niya
Disyembre 8, 2022

Sinampahan ng kasong kriminal
Marso 3, 2023

Hinalughog ang bahay niya sa ikalawang pagkakataon. Pinagtatanong sina Aleksey at Yuliya
Marso 31, 2023

Hinalughog ang bahay ng nanay at mga kapatid ni Aleksey
Oktubre 4, 2023

Pinagbawalan siyang umalis ng kanilang lugar
Disyembre 14, 2023

Nagsimula ang paglilitis

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.