ABRIL 23, 2024 | UPDATED: PEBRERO 7, 2025
RUSSIA

UPDATE—IKINULONG ANG MGA KAPATID PAGKATAPOS NG APELA | Isang Karangalang Paglingkuran si Jehova

I-PLAY

Noong Pebrero 4, 2025, binago ng Korte Suprema ng Udmurtian Republic ang hatol na suspended prison sentence kina Brother Yevgeniy Stefanidin at Aleksandr Votyakov pagkatapos nilang umapela. Nasentensiyahan si Yevgeniy ng anim-na-taóng pagkabilanggo at anim na taon at anim na buwan naman kay Aleksandr. Ibinilanggo sila agad pagkagaling sa korte.

Noong Oktubre 25, 2024, hinatulan ng Pervomayskiy District Court of Izhevsk ng Udmurtian Republic sina Brother Yevgeniy Stefanidin at Aleksandr Votyakov. Binigyan ng anim-na-taóng suspended prison sentence si Yevgeniy, at anim na taon at anim na buwan naman si Aleksandr. Hindi nila kailangang makulong sa ngayon.

Profile

Yevgeniy Stefanidin

Ipinanganak: 1989 (Izhevsk)

Maikling Impormasyon: Nagbebenta ng bahay at lupa

Pinalaking isang Saksi ni Jehova si Yevgeniy. Noong 10 taóng gulang siya, namatay ang lola niya. Lalo siyang napalapít kay Jehova dahil sa pag-asa ng pagkabuhay-muli. Nabautismuhan siya noong 2006

Napangasawa niya si Marina noong 2011. May isa silang anak na babae

Natuklasang may cancer si Yevgeniy noong 2022

Personal na mga Komento

Ano ang nakatulong sa iyo na manatiling positibo kahit pinag-uusig ka?

Ang saya-saya ko kapag iniisip ko ang maraming pagpapalang natatanggap ko araw-araw. Ipinapaalala ko rin sa sarili ko na hindi si Jehova ang dapat sisihin sa pag-uusig na nararanasan ko; hinahayaan niya lang itong mangyari. Pero malapit na niyang itama ang lahat ng kawalang-katarungang nararanasan ng tapat na mga lingkod niya. Mahalaga ring manatiling malapít kay Jehova at sa mga kapatid. Minsan, sinabi sa akin ng isang sister: “Nakakapagpatibay ang ngiti mo. Kapag nakikita kitang positibo pa rin sa kabila ng sitwasyon mo, lumalakas din ang loob ko.” Talagang isang karangalang makasama sa pamilya ni Jehova.

Aleksandr Votyakov

Ipinanganak: 1973 (Izhevsk)

Maikling Impormasyon: Nagtatrabaho sa construction

Napangasawa si Liliya noong 1995

Humanga siya sa magagandang pagbabago sa asawa niya nang maging Saksi ni Jehova ito. Nabautismuhan si Aleksandr noong 2006

Personal na mga Komento

Anong mahalagang aral ang natutuhan mo sa karanasang ito?

Natutuhan ko na napakahalagang magtiwala kay Jehova at tutulungan niya ako. Halos anim na buwan akong naka-house arrest at hindi makapagtrabaho. Kasabay no’n, nagkasakit pa nang malubha ang asawa ko. Pero kitang-kita namin kung paano kami tinulungan ni Jehova. Nandiyan lagi ang mga kapatid kapag may kailangan kami. Hangang-hanga ang mga kamag-anak naming di-Saksi sa mga tulong na natatanggap namin. Damang-dama ko talaga ang pagmamahal ni Jehova, kaya mas ipinagpapasalamat ko ngayon na naging lingkod niya ako.

Gaya nina Aleksandr at Yevgeniy, itinuturing din nating isang malaking pribilehiyo na ‘gumawa ng sagradong paglilingkod kay Jehova nang walang takot.’—Lucas 1:74, 75.

Time Line

Abril 14, 2021

Hinalughog ng mga pulis ang bahay ni Yevgeniy
Disyembre 13, 2022

Sinampahan ng kasong kriminal sina Aleksandr at Yevgeniy
Disyembre 14, 2022

Hinalughog ng mga pulis ang bahay nina Aleksandr at Yevgeniy. Dinala si Aleksandr sa isang temporary detention facility. Pinagbawalan si Yevgeniy na umalis ng kanilang lugar
Disyembre 15, 2022

Pinalaya si Aleksandr mula sa temporary detention facility at inilagay sa house arrest
Hunyo 9, 2023

Pinalaya si Aleksandr mula sa house arrest at pinagbawalang umalis ng kanilang lugar
Agosto 17, 2023

Nagsimula ang paglilitis

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.