NOBYEMBRE 6, 2023 | UPDATED: DISYEMBRE 26, 2023
RUSSIA

UPDATE—IKINULONG ANG MGA KAPATID | Masaya Pa Rin ang mga Brother Kahit Idinitine

I-PLAY

Noong Disyembre 22, 2023, hinatulan ng Cheryomushkinskiy District Court sina Brother Sean Pike, Aleksandr Rumyantsev, at Eduard Sviridov. Sinentensiyahan si Sean ng pitong-taóng pagkabilanggo at pito’t kalahating taon naman para kay Aleksandr. Isa ito sa pinakamahahabang sentensiya mula nang ipagbawal ang gawain natin noong 2017. Sinentensiyahan si Eduard na mabilanggo nang anim na taon at anim na buwan. Silang tatlo ay nasa pretrial detention at mananatiling nakabilanggo.

Profile

Sean Pike

Ipinanganak: 1971 (Georgetown, Guyana)

Maikling Impormasyon: Lumipat siya sa Russia para mag-aral sa unibersidad. Naging civil engineer

Nakilala ang mga Saksi ni Jehova habang nag-aaral sa unibersidad. Humanga siya sa magagandang payo sa Bibliya. Nabautismuhan siya bilang isang Saksi ni Jehova noong 1997

Napangasawa si Tatyana noong 2001. Mayroon silang dalawang anak na babae

Personal na mga Komento Mula sa Asawa ni Sean na si Tatyana a

Ano ang nakatulong sa inyong mag-asawa nang dalawang taon kayong magkahiwalay dahil sa pagkabilanggo ni Sean?

Napakahirap sa simula. Natakot kami at nalungkot, pero natanggap din namin ang kalagayan namin. Nakatulong kay Sean ang suporta ng mga kapatid sa buong mundo. Madalas din namin siyang sinusulatan ng mga anak namin para lagi niyang maramdaman na mahal namin siya. At siyempre, laging nandiyan ang tulong at pangangalaga ni Jehova. Naaaliw ako kapag binubulay-bulay ko ang sinasabi sa Awit 18:16, 19: “Mula sa kaitaasan ay inabot niya ako; hinawakan niya ako at iniahon mula sa malalim na tubig. Inilabas niya ako papunta sa isang ligtas na lugar; iniligtas niya ako dahil nalulugod siya sa akin.” Ipinapaalala sa akin ng ekspresyong “malalim na tubig” ang bilangguan na naghihiwalay sa amin ni Sean. Hindi ko siya matulungan, pero maaabot siya ng mga kamay ni Jehova at maiingatan.

Aleksandr Rumyantsev

Ipinanganak: 1977 (Moscow, Moscow Region)

Maikling Impormasyon: Nagtrabaho bilang isang drayber. Inaalagaan niya ang nanay niya noong makulong siya

Nakipag-aral siya sa mga Saksi ni Jehova para malaman kung ano ang itinuturo ng Bibliya. Nabautismuhan siya noong 2006

Personal na mga Komento

Paano mo nadama ang tulong ni Jehova habang nakakulong ka?

Napapatibay ako kapag inaalala kong ipinapanalangin ako ng mga kapatid sa buong mundo. Alam kong tulong ito ni Jehova sa akin. Napansin ko rin na napakabilis sagutin ni Jehova ang mga panalangin ko, at ngayon ko lang ito naranasan. Kaya nakakaramdam ako ng kapanatagan at kapayapaan. Ipinaalala nito sa akin ang nakasulat sa 2 Corinto 1:5: “Dahil kung paanong marami tayong pagdurusa para sa Kristo, marami rin tayong tinatanggap na kaaliwan sa pamamagitan ng Kristo.” Nagpapasaya sa akin ang lahat ng ito.

Eduard Sviridov

Ipinanganak: 1964 (Dushanbe, Tajikistan)

Maikling Impormasyon: Nagtrabaho bilang isang tractor operator

Napangasawa si Yelena noong 1997

Nagpasiya siyang basahin nang personal ang buong Bibliya. Di-nagtagal, natagpuan silang mag-asawa ng mga Saksi ni Jehova at nagsimula silang mag-aral ng Bibliya. Nabautismuhan sila noong 1999

Personal na mga Komento

Ano ang nakatulong sa iyo na manatiling masaya kahit nakabilanggo?

Nananatili akong masaya dahil sa pagbabasa ko ng Bibliya, pananalangin, at suportang natatanggap ko mula sa mga kapatid natin sa buong mundo. Sa tingin ko rin, malaki ang naitutulong ng positibong pananaw. Parang litrato ang buhay. Mas maganda ito kapag nakangiti ka. Kapag iniisip ko ang sitwasyon ko, pinasasalamatan ko si Jehova dahil ginagamit niya ito para sanayin ako. Nagpapasalamat din ako sa pagkakataon na masagot ko ang tumutuya sa kaniya.—Kawikaan 27:11.

Ipinapaalala sa atin ng mga halimbawa nina Sean, Aleksandr, Eduard, at ng pamilya nila na “si Jehova ay mabuti, isang moog sa panahon ng pagdurusa. Iniisip niya ang mga nanganganlong sa kaniya.”—Nahum 1:7.

Time Line

Agosto 25, 2021

Hinalughog ang mga bahay. Idinitine ang tatlong brother
Agosto 27, 2021

Inilipat sa pretrial detention sina Sean, Aleksandr, at Eduard
Nobyembre 14, 2022

Nagsimula ang paglilitis

a Hindi posibleng makuha ang personal na mga komento ni Brother Pike.

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.