DISYEMBRE 8, 2022 | UPDATED: PEBRERO 15, 2023
RUSSIA

UPDATE—BINAWASAN ANG MULTA | Kumbinsido sa Suporta ni Jehova

I-PLAY

Noong Pebrero 13, 2023, binawasan ng Supreme Court of the Chuvash Republic ang mga multa kina Sister Nina Martynova at Zoya Pavlova mula 350,000 rubles ($4,780 U.S.) at ginawang 80,000 rubles ($1,092 U.S.). Hindi binago ang mga suspended prison sentence kina Brother Andrey Martynov at Mikhail Yermakov.

Noong Disyembre 22, 2022, hinatulan ng Alatyrskiy District Court of the Chuvash Republic sina Andrey, Nina, Zoya, at Mikhail. Pinagmulta sina Nina at Zoya ng 350,000 rubles ($4,780 U.S.). Sinentensiyahan naman ng anim-na-taóng suspended prison sentence sina Andrey at Mikhail. Hindi nila kailangang makulong sa ngayon.

Profile

Andrey Martynov

Ipinanganak: 1964 (Barnaul, Altai Territory)

Maikling Impormasyon: Isang tsuper

Magkasamang nag-aral ng Bibliya sina Andrey at Nina bago sila nag-asawa. Nagpakasal sila at nabautismuhan noong 1992. May dalawa silang anak na babae

Personal na mga Komento

Ano ang nakatulong sa iyo na patuloy na magtiwala kay Jehova?

Kapag hindi ako sigurado sa isang sitwasyon, humihinto ako at inaalala na si Jehova ang ulo ng isang napakalaking pamilya. Mas marami siyang karanasan at karunungan kaysa sa akin. At gaya ng isang mabuting ama, ginagabayan niya ang buong pamilya niya, pati na ako. Nagpapasalamat ako sa gabay niya at gusto kong gawin ang buong makakaya ko para masunod ito. Dahil tinulungan niya ako na makayanan ang pisikal at emosyonal na mga problema noong panahon ng imbestigasyon, sigurado ako na kontrolado niya ang lahat ng bagay. At lalo akong napalapit sa kaniya.

Zoya Pavlova

Ipinanganak: 1965 (Ibresi, Chuvash Republic)

Maikling Impormasyon: Naulila noong two years old pa lang. Nagtrabaho sa mga housing at community service agency bago nagretiro

Nag-aral ng Bibliya noong 2016. Na-touch sa pag-ibig at empatiya ni Jehova sa mga tao. Nabautismuhan noong 2018

Personal na mga Komento

Paano mo nadama ang tulong ni Jehova noong panahong iyon?

Noong umpisa, napakahirap ng sitwasyon ko, lalo na noong unang mga interogasyon sa akin. Pero noon ko naranasan ang tulong ni Jehova. Araw-araw niya akong tinutulungan na manatiling kalmado at malapít sa kaniya, gaya ng ipinangako niya sa Isaias 41:10. Nagpapasalamat din ako sa mag-asawa na tumutulong sa akin hanggang ngayon. Gaya ko, iniimbestigahan din sila at may mga problema, pero isinasama nila ako linggo-linggo sa family worship nila. Talagang napapatibay nila ako. Kaya kahit marami pang dumating na problema, sigurado ako na makakayanan ko ’yon dahil alam kong kasama ko si Jehova.

Gaya ng tapat nating mga kapatid na naninindigan kahit pinag-uusig, kapag kumbinsido tayo sa pag-ibig at suporta ni Jehova, puwede rin tayong maging “di-natitinag gaya ng leon” kahit may mga pagsubok.—Kawikaan 28:1.

Time Line

Hunyo 23, 2021

Hinalughog ang ilang bahay sa Alatyr
Oktubre 28, 2021

Inimbestigahan si Andrey dahil sa kasong pag-oorganisa ng mga gawain ng isang ekstremistang organisasyon. Pinagbawalang magbiyahe
Abril 25, 2022

Opisyal na kinasuhan si Andrey. Isinama si Nina sa kaso at inakusahan ng pakikibahagi sa mga gawain ng isang ekstremistang organisasyon
Abril 26, 2022

Opisyal na kinasuhan si Zoya na nakikibahagi sa mga gawain ng isang ekstremistang organisasyon at isinama sa kaso
Abril 28, 2022

Opisyal na inakusahan si Mikhail ng pag-oorganisa sa mga gawain ng isang ekstremistang organisasyon at isinama sa kaso
Agosto 31, 2022

Nagsimula ang paglilitis

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.