DISYEMBRE 11, 2024 | UPDATED: MAYO 27, 2025
RUSSIA

UPDATE—BINAWASAN ANG MGA SENTENSIYA AT PINALAYA ANG KAPATID MULA SA BILANGGUAN | “Manatiling Tapat sa Panig ni Jehova”

I-PLAY

Noong Mayo 26, 2025, binawasan ng Kursk Regional Court ang sentensiya kay Brother Dmitriy Chauso, sa asawa niyang si Sister Oksana Chausova, at kay Brother Nikolay Kupriyanskiy pagkatapos nilang umapela. Apat na taon at anim na buwan na lang ang sentensiya kay Nikolay; isang taon at 10 buwan naman kina Dmitriy at Oksana. Dahil ikinulong na si Dmitriy bago pa ang paglilitis, natapos na niya ang sentensiya, kaya pinalaya na siya mula sa bilangguan. Nakabilanggo pa rin sina Nikolay at Oksana.

Noong Disyembre 2, 2024, hinatulan ng Leninskiy District Court of Kursk si Brother Dmitriy Chausov, ang asawa niyang si Sister Oksana Chausova, at si Brother Nikolay Kupriyanskiy. Sina Dmitriy at Oksana ay nasentensiyahang makulong nang dalawang taon at anim na buwan. Si Nikolay naman ay nasentensiyahang makulong nang anim na taon. Mula sa korte, deretso sila sa bilangguan.

Profile

Dmitriy Chausov

Ipinanganak: 1988 (Kursk)

Nabautismuhan: 2014

Maikling Impormasyon: Isang welder

Napangasawa si Oksana noong 2012

Paratang: Ipinapakipag-usap niya ang Bibliya sa iba at nangangasiwa sa mga pulong ng mga Saksi ni Jehova

Nakulong na siya nang mahigit anim na buwan habang hinihintay ang kaniyang paglilitis. Mahigit siyam na buwang naka-house arrest si Dmitriy, pero hindi siya pinayagang tumira sa iisang bahay na kasama ng asawa niya

Sentensiya: Dalawang-taon-at-anim-na-buwang pagkabilanggo

Personal na mga Komento

Ano ang nakatulong sa iyo na makapagtiis sa bilangguan habang hinihintay mo ang paglilitis sa iyo?

Nakatulong sa akin ang sulat ng isang brother: “Mas makakapagtiis ka kung tatanggapin mo agad ang bagong kalagayan mo.” Nakatulong sa akin ang payong ito na maunawaan na kailangan kong humanap ng mga dahilan para maging masaya araw-araw. Kaya tinitingnan ko ang pagsikat ng araw sa bintana ng selda ko, pinapakinggan ko ang huni ng mga ibon sa labas, o kahit pa nga ang mga ngiti ng mga tao sa paligid ko. Natutuhan ko na nasaan man ako, laging may dahilan para maging masaya. Hindi madaling mapanatili ang kagalakan, pero mahalaga ito para makapagtiis nang may katapatan.

Oksana Chausova

Ipinanganak: 1986 (Kazakhstan)

Nabautismuhan: 2014

Maikling Impormasyon: Isang manikurista

Napangasawa si Dmitriy noong 2012

Paratang: Ipinapakipag-usap niya ang Bibliya sa iba at nakikibahagi sa relihiyosong mga pagpupulong ng mga Saksi ni Jehova

Mahigit anim na buwan siyang naka-house arrest

Sentensiya: Dalawang-taon-at-anim-na-buwang pagkabilanggo

Personal na mga Komento

Ano ang nakatulong sa iyo na huwag masiraan ng loob sa mahirap na sitwasyong ito?

Dahil pareho ang ipinaratang na kaso sa aming mag-asawa, hindi kami pinayagang tumira sa iisang bahay o mag-usap o magsulatan. Nakatulong sa akin ang pagbabasa ng mga kuwento ng buhay ng ating mga kapatid na nagtiis ng pag-uusig sa Nazi Germany at sa dating Soviet Union. Ipinaalala sa akin ng mga karanasang ito na hindi makahimalang aalisin ni Jehova ang lahat ng problema ko. Totoo, may mga problema pa rin at nalulungkot pa rin ako kung minsan, pero determinado akong tandaan na isang karangalang manatiling tapat sa panig ni Jehova at suportahan ang kaniyang soberanya. Iyan ang nagpapasaya sa akin.

Nikolay Kupriyanskiy

Ipinanganak: 1967 (Kursk)

Nabautismuhan: 1999

Maikling Impormasyon: Napangasawa si Tatyana noong 1986. Mayroon silang isang anak na lalaki at babae

Paratang: Nangangasiwa sa mga pulong ng mga Saksi ni Jehova

Naka-house arrest siya nang halos isang taon at apat na buwan

Sentensiya: Anim-na-taóng pagkabilanggo

Personal na mga Komento

Ano ang natutuhan mo sa halimbawa ng iba?

Lagi kong naiisip si Jose. Kahit nasa bilangguan siya, sinasabi ng Bibliya na “hindi iniwan ni Jehova si Jose; patuloy siyang nagpakita rito ng tapat na pag-ibig.” (Genesis 39:21) Nagtitiwala ako na hindi rin ako iiwan ni Jehova, kaya wala akong dapat ikatakot. Nakakapagpatibay ring makausap ang iba na dumanas din ng ganitong mga pagsubok. Ipinapaalala sa akin ng magandang resulta ng pananampalataya nila na patuloy na umasa kay Jehova sa halip na hanapin ang katarungan para sa aking sarili. Sana makapagpatibay at makatulong din sa iba ang karanasan ko.

Nagtitiwala tayo na patuloy na susuportahan ni Jehova sina Dmitriy, Oksana, at Nikolay, dahil si Jehova ay hindi “magkakait ng anumang mabuti sa mga lumalakad nang tapat.”—Awit 84:11.

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.