PEBRERO 24, 2025
RUSSIA

Kaliwa pakanan: Sina Igor Alekseyev, Ilya Buryi, at Eduard Kapitonov (itaas na hanay); sina Ilya Kapitonov, Aleksey Kulikov, Sergey Kulikov, at Sergey Naymushin (gitnang hanay); sina Denis Petrov, Yevgeniy Plotnikov, at Vladimir Usenko (ibabang hanay)

Nasentensiyahan ang 10 Brother sa Russia

I-PLAY

Noong Pebrero 13, 2025, hinatulan at pinagmulta ng Yoshkar-Ola City Court of the Republic of Mari El ang 10 brother. Sina Brother Igor Alekseyev, Ilya Buryi, Eduard Kapitonov, Ilya Kapitonov, Aleksey Kulikov, Sergey Kulikov, Sergey Naymushin, Denis Petrov, at Vladimir Usenko ay pinagmumulta ng tig-600,000 ruble ($6,569 U.S.) bawat isa. Pinagmumulta naman si Brother Yevgeniy Plotnikov ng 500,000 ruble ($5,474 U.S.).

Profile

Igor Alekseyev

Ipinanganak: 1977 (Arzebelyak, Republic of Mari El)

Nabautismuhan: 2009

Maikling Impormasyon: Isang mason. Napangasawa niya si Nataliya noong 2006. Mayroon silang isang anak na lalaki at babae

Kaso: Pag-oorganisa ng relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Paano nakaapekto sa mga panalangin mo ang karanasang ito?

Nang biglang halughugin ng mga awtoridad ang bahay namin, hindi ko alam ang ipapanalangin ko. Nasabi ko na lang, “Jehova, tulungan n’yo po ako!” Sinagot niya ang panalangin ko; tinulungan niya akong maging kalmado. Pagkatapos ng paghalughog, paulit-ulit akong ipinatawag ng imbestigador para pagtatanungin. Tuwing ipapatawag ako, humahanap ako ng isang tahimik na lugar para masabi ko kay Jehova ang mga ikinababahala ko at hinihiling ko sa kaniya na pakalmahin niya ako. Lagi niyang sinasagot ang mga panalangin ko. Mas madalas akong manalangin ngayon. Sinasabi ko kay Jehova ang lahat ng nararamdaman ko. Para bang sinasabi sa akin ni Jehova ang mga salitang nasa Isaias 43:4, 5: “Dahil naging mahalaga ka sa paningin ko, . . . at inibig kita. . . . Huwag kang matakot, dahil kasama mo ako.”

Ilya Buryi

Ipinanganak: 1992 (Nizhny Novgorod, Nizhny Novgorod Region)

Nabautismuhan: 2004

Maikling Impormasyon: Isang electrician. Napangasawa niya si Anna noong 2018. Mayroon silang isang anak na babae

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Anong mga problema ang napaharap sa iyo, at paano ka tinulungan ni Jehova?

Sinampahan ako ng kasong kriminal sa isang lunsod na mahigit 350 kilometro ang layo sa amin. Pabalik-balik ako doon habang nililitis ako, na talagang nakakapagod. Naging mas mahirap pa ito nang mamatay ang nanay ko nang panahong iyon. Sa lahat ng pinagdaanan ko, nakita ko kung paano ako tinulungan ni Jehova at ang pamilya ko. Sinuportahan ako ng mga kapatid sa korte habang nililitis ako, nagbigay sila ng praktikal na tulong, at lagi nila akong ipinapanalangin. Lagi kong iniisip ang pangako ni Jehova sa Jeremias 1:19: “Tiyak na makikipaglaban sila sa iyo, pero hindi sila mananalo, dahil ‘kasama mo ako,’ ang sabi ni Jehova, ‘at ililigtas kita.’” Ipinapaalala sa akin ng mga salitang ito na laging magtiwala na susuportahan ako ni Jehova.

Eduard Kapitonov

Ipinanganak: 1965 (Vasilenki, Republic of Mari El)

Nabautismuhan: 2014

Maikling Impormasyon: Isang driver. Napangasawa niya si Alevtina noong 1991. Mayroon silang isang anak na lalaki at babae. Ang kanilang anak na lalaki, si Brother Ilya Kapitonov, ay kasama niyang sinampahan ng kasong kriminal

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Ano ang nakakatulong sa iyo na manatiling positibo?

Madalas kong ipinapanalangin ang mga kapananampalataya ko na pinag-uusig. Pero hindi ko akalain na ako na ang ipapanalangin nila. Kapag naiisip ko na kakampi ko ang nagkakaisang pamilya ni Jehova, ang mga nasa langit at ang milyon-milyong kapatid ko dito sa lupa, napapanatag ako at napapatibay. Alam kong hindi ako nag-iisa!

Ilya Kapitonov

Ipinanganak: 2002 (Yoshkar-Ola)

Nabautismuhan: 2012

Maikling Impormasyon: Isang abogado. Ang kaniyang tatay, si Brother Eduard Kapitonov, ay kasama niyang sinampahan ng kasong kriminal

Kaso: Pag-oorganisa ng relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Paano ka napapatibay ng ibang brother na kasama mong sinampahan ng kasong kriminal?

Sampu kaming sinampahan ng kaso. Nagkakaisa kami. Napakagandang halimbawa nila sa akin. Mayroon silang sariling mga problema. Pero hindi sila nasisiraan ng loob, at nananatili pa rin silang masaya. Tinutulungan ni Jehova ang bawat isa sa amin, anuman ang pinagdaraanan namin. Baka hindi ito dumating agad o sa paraang inaasahan namin, pero alam ni Jehova kung paano kami tutulungan.

Aleksey Kulikov

Ipinanganak: 1979 (Rostov-on-Don, Rostov Region)

Nabautismuhan: 1994

Maikling Impormasyon: Isang electrician. Napangasawa niya si Lydia noong 2014. Mayroon silang dalawang batang anak na lalaki. Ang tatay ni Aleksey, si Brother Sergey Kulikov, ay kasama niyang sinampahan ng kasong kriminal

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Anong teksto sa Bibliya ang nakatulong sa iyo na manatiling kalmado?

Naaalala ko, paggising ko isang umaga, takot na takot ako bago ang pagdinig sa korte. Pagkatapos, binasa ko ang Apocalipsis 2:10, na nagsasabi: “Huwag kang matakot sa mga bagay na malapit mo nang pagdusahan.” Nakatulong sa akin iyon para kumalma ako, at nawala na ang takot ko. Ngayon, nagtataka nga ako na hindi na ako masyadong nag-aalala. Pero napag-isip-isip ko na hindi na ako dapat magtaka, kasi madalas kong hilingin kay Jehova na bigyan ako ng kapayapaan sa mga sitwasyong hindi ko kontrolado. Talagang nagpapasalamat ako kay Jehova dahil lagi niyang sinasagot ang mga panalangin ko.

Sergey Kulikov

Ipinanganak: 1953 (Gigant, Rostov Region)

Nabautismuhan: 1994

Maikling Impormasyon: Isang electrician. Napangasawa niya si Nadezhda noong 1978. Mayroon silang isang anak na lalaki at babae. Ang kanilang anak na lalaki, si Brother Aleksey Kulikov, ay kasama niyang sinampahan ng kasong kriminal

Kaso: Pag-oorganisa ng relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Ano ang nararamdaman mo kapag nakikita mo ang mga kapatid sa korte?

Kapag nakikita ko ang mga kapatid sa korte, napapanatag ako at nawawala ang takot ko. Minsan, isang brother ang nagbiyahe kasama ng isang grupo ng mga kapatid mula sa ibang lunsod para dumalo sa pagdinig. Sinabi niya sa akin: “Alam kong nandito ka at nahihirapan, kaya gusto kitang yakapin. Gusto ko ring sabihin, ‘Huwag kang matakot, kasama mo kami. Mahal ka namin, at ipinapanalangin ka namin.’’’ Dahil hindi na sila kasya sa korte, hindi na sila pinayagang pumasok. Nagbiyahe siya nang malayo para lang sabihin sa akin ang mga iyon at yakapin ako. Napatunayan kong hindi ako nag-iisa!

Sergey Naymushin

Ipinanganak: 1984 (Yoshkar-Ola)

Nabautismuhan: 1996

Maikling Impormasyon: Isang mekaniko ng kotse

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Ano ang natutuhan mo sa karanasang ito sa kung paano tinutulungan ni Jehova ang mga lingkod niya?

Ngayon ko lang naranasan ito, kaya nahirapan ako sa buong imbestigasyon at paglilitis. Naisip ko na hindi maiiwasan ng mga lingkod ni Jehova ang pag-uusig at puwede itong mangyari anumang oras. Pero nakita ko na laging nandiyan si Jehova para tulungan ako. Talagang sinasagot niya ang mga panalangin ng mga kapatid para sa akin, kaya nananatili akong positibo. Nagpapasalamat ako sa pagkakataong ito na luwalhatiin ang pangalan ni Jehova sa korte.

Denis Petrov

Ipinanganak: 2001 (Yoshkar-Ola)

Nabautismuhan: 2011

Maikling Impormasyon: Isang computer programmer

Kaso: Pag-oorganisa ng relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Mga Komento sa Huling Pahayag ni Denis sa Korte a

Ipinagmamalaki kong lilitisin ako hindi bilang isang drug addict, mamamatay-tao, o magnanakaw, kundi bilang isang Kristiyano na naniniwala sa Diyos. Ito ang isa sa mga nagpapasaya sa akin. Mahirap ito para sa akin at sa pamilya ko, pero napakalaking tulong ng mga kaibigan namin. Nagbiyahe pa nang malayo ang ilan sa kanila mula sa ibang bahagi ng bansa para masamahan ako sa mga pagdinig sa korte. Sa kabila ng mga pagsubok na ito, malakas pa rin kami, at nakapagpakita kami ng magagandang katangian na nagpatibay sa pagkakaibigan namin.

Yevgeniy Plotnikov

Ipinanganak: 1982 (Dalniy, Altai Territory)

Nabautismuhan: 2000

Maikling Impormasyon: Nagtrabaho sa construction

Kaso: Pag-oorganisa at pakikibahagi sa relihiyosong mga pulong ng mga Saksi ni Jehova

Halos apat na buwan sa pretrial detention center at halos dalawang buwang naka-house arrest

Sentensiya: Magmumulta ng 500,000 ruble ($5,474 U.S.)

Mga Komento sa Huling Pahayag ni Yevgeniy sa Korte b

Lagi kong iniisip ang halimbawa ni Jesus. Walang magsasabing naging patas ang paglilitis sa kaniya mahigit 2,000 taon na ang nakakalipas. Sa ngayon, nakikita ng mga tagasunod ni Jesus ang katuparan ng mismong sinabi niya sa Mateo 10:17, 18: “Dadalhin nila kayo sa mga hukuman . . . At dadalhin kayo sa harap ng mga gobernador at mga hari dahil sa akin, at makapagpapatotoo kayo sa kanila at sa mga bansa.” Kahit hindi ko alam ang mangyayari sa paglilitis ko, sigurado akong patas ang hatol ng Diyos. Anuman ang maging desisyon sa korte, mananatili akong lingkod ng Diyos na Jehova bilang isa sa mga Saksi niya.

Vladimir Usenko

Ipinanganak: 1955 (Yoshkar-Ola)

Nabautismuhan: 1997

Maikling Impormasyon: Dating propesyonal na manlalaro ng soccer. Napangasawa niya si Nelly noong 1986. Mayroon silang isang anak na lalaki at babae. Nag-iisang Saksi si Vladimir sa kanilang pamilya

Kaso: Pag-oorganisa ng relihiyosong mga pulong ng mga Saksi ni Jehova

Sentensiya: Magmumulta ng 600,000 ruble ($6,569 U.S.)

Personal na mga Komento

Paano mo naramdaman ang suporta ni Jehova sa pinagdadaanan mo?

Pinapatibay ako ni Jehova sa pamamagitan ng Bibliya at ng mga sinasabi ng mga kapatid. Ipinaalala sa akin ng isang brother ang sinasabi sa Zefanias 3:17: “Si Jehova na iyong Diyos ay nasa gitna mo. Siya ay makapangyarihan at magliligtas siya. Magbubunyi siya sa iyo nang may malaking kagalakan.” Pagkatapos, sinabi ng brother: “Salamat sa halimbawa mo ng tapat na paglilingkod kay Jehova. Masaya akong maglingkod kasama mo. Siguradong kapag tinitingnan ka ni Jehova, natutuwa siya!” Pinatibay niyan ang pananampalataya ko at lalo pa akong naging determinadong manatiling malapít kay Jehova at sa mga kapatid.

Gaya ng 10 brother na ito, masaya tayong malaman na sa lahat ng mga pagsubok natin, makakaasa tayo sa tulong na inilalaan ni Jehova sa pamamagitan ng ating nagkakaisang kapatiran.—Kawikaan 17:17.

a Walang makuhang personal na mga komento mula kay Denis nang inihahanda ang artikulong ito.

b Walang makuhang personal na mga komento mula kay Yevgeniy nang inihahanda ang artikulong ito.

Magugustuhan Mo Rin

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.