OKTUBRE 13, 2025
RUSSIA

Mula kaliwa pakanan, harap na hanay: Sina Vasiliy Bondarev, Ivan Nikitin, Nikolay Kovadnev, at Radion Shitov. Gitnang hanay: Sina Sergey Sachnev, Svetlana Zharkova, Marina Voytko, at Mikhail Dorofeyev. Likurang hanay: Sina Ulita Sachneva at Irina Bondareva

Nananatiling Tapat at Masaya sa Tulong ni Jehova

I-PLAY

Noong Oktubre 1, 2025, hinatulan ng Komsomolskiy District Court of the Khabarovsk Territory sina Vasiliy Bondarev, Irina Bondareva, Mikhail Dorofeyev, Nikolay Kovadnev, Ivan Nikitin, Sergey Sachnev, Ulita Sachneva, Radion Shitov, Marina Voytko, at Svetlana Zharkova. Sina Mikhail, Nikolay, at Radion ay binigyan ng anim-na-taóng suspended prison sentence. Sina Vasiliy, Irina, Ivan, Sergey, Ulita, Marina, at Svetlana ay binigyan ng dalawang-taóng suspended prison sentence. Hindi sila makukulong sa ngayon.

Profile

Vasiliy Bondarev

Ipinanganak: 1996 (Komsomolsk-on-Amur)

Nabautismuhan: 2014

Maikling Impormasyon: Nagtatrabaho bilang isang paramedic. Ang kaniyang ina, si Irina, ay nahatulan sa kaparehong kaso

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Dalawang-taóng suspended prison sentence

Personal na mga Komento

Paano ka natulungan ng halimbawa ng iba?

Likas na mahiyain ako, kaya napakahirap para sa akin na magsalita sa korte. Pero talagang natulungan ako ng mga may-edad na kapatid. Kahit may mga problema sila sa kalusugan at iba pang alalahanin, buong tapang pa rin silang nanindigan sa korte. Dahil may mga pisikal na karamdaman sila, mas lalong nakikita ang suporta sa kanila ni Jehova. Napakilos ako ng halimbawa nila na magkaroon ng higit pang tiwala kay Jehova at magpokus sa pribilehiyong mayroon ako na ipagtanggol ang pangalan niya.

Irina Bondareva

Ipinanganak: 1961 (Komsomolsk-on-Amur)

Nabautismuhan: 1993

Maikling Impormasyon: Namatay ang kaniyang asawa noong 2020. Mayroon siyang isang anak na lalaki at isang anak na babae. Ang kaniyang anak na lalaki, si Vasiliy, ay nahatulan sa kaparehong kaso

Kaso: Pakikibahagi sa relihiyosong mga pulong ng mga Saksi ni Jehova

Sentensiya: Dalawang-taóng suspended prison sentence

Personal na mga Komento

Ano ang nakakatulong sa iyo para mapagtagumpayan ang pagkasira ng loob?

Bukod sa pagharap sa stress dahil sa pag-uusig, may mga problema rin ako sa kalusugan na nagpapahirap sa akin. Isa pa, nabibigatan pa rin ako sa pagkawala ng asawa ko. Kapag nasisiraan ako ng loob, ipinapaalala ko sa sarili ko na pansamantala lang ang mga paghihirap na nararanasan ko. Halimbawa, may notebook ako na may listahan ng mga gusto kong gawin sa bagong sanlibutan. Habang hindi pa dumarating iyon, nagsisikap akong maging kontento at pahalagahan ang pakikipagkaibigan ko kay Jehova.

Nikolay Kovadnev

Ipinanganak: 1960 (Razdolnoye, Primorye Territory)

Nabautismuhan: 1995

Maikling Impormasyon: Nagtrabaho bilang isang accountant. Nagretiro na. Napangasawa si Marina noong 2012. Namatay ang asawa niya noong 2023

Kaso: Nag-oorganisa ng relihiyosong mga pulong ng mga Saksi ni Jehova sa pamamagitan ng videoconference

Sentensiya: Anim-na-taóng suspended prison sentence

Personal na mga Komento

Paano mo naramdaman ang suporta ni Jehova sa mahirap na panahong ito?

Namatay ang asawa ko noong 2023, dalawang buwan matapos halughugin ang bahay namin. Ang mawala siya at ang maiwang mag-isa ay ang pinakamahirap na naranasan ko sa buong buhay ko. Magkasama naming ginawa ang lahat ng bagay. Pero nakita ko na hindi kailanman hinayaan ni Jehova na harapin ko ang mga hamon nang mag-isa. Sa halip, tinutulungan niya akong makayanan ang lahat ng ito. Binigyan niya rin ako ng pagkakataong malinang ang mga katangiang kakailanganin ko sa hinaharap. At ang pinakamahalaga, natutuhan kong lubusang umasa sa kaniya. Ngayon, hindi na ako nananalangin para maiwasan ang mga pagsubok. Kundi, hinihiling ko kay Jehova na tulungan akong magtiis, manatiling tapat, at magbigay ng kaluwalhatian sa pangalan niya. May tunay na kapayapaan ako, at alam kong si Jehova ang Pinagmumulan nito.

Radion Shitov

Ipinanganak: 1972 (Komsomolsk-on-Amur)

Nabautismuhan: 1998

Maikling Impormasyon: Nagtrabaho bilang isang educational psychologist sa isang kindergarten para sa mga batang may kapansanan. Napangasawa si Yana noong 1998. Mayroon silang isang anak na babae

Kaso: Nag-oorganisa ng relihiyosong mga pulong ng mga Saksi ni Jehova sa pamamagitan ng videoconference

Sentensiya: Anim-na-taóng suspended prison sentence

Personal na mga Komento

Ano ang nagpatibay ng iyong pagtitiwala kay Jehova?

Isa sa pinakamalaking hamon ko ay ang sobrang pag-aalala at pagkontrol sa emosyon ko. Ipinaparamdam ni Jehova ang pag-aalaga niya sa pamamagitan ng mga ulat tungkol sa mga tapat na lingkod niya na sinuportahan niya sa mahihirap na panahon. Kapag pinag-iisipan ko kung paano pinakitunguhan ni Jehova nang may pag-ibig at pagtitiis sina Elias, Jonas, Lot, at Pedro, natutulungan akong makita na nauunawaan niya ang mga kahinaan ko at hindi niya ako hinahatulan. Alam kong sinusuportahan ako ni Jehova dahil hindi ako sobrang nabibigatan sa kasalukuyan kong kalagayan. Nagtitiwala ako na sa tulong niya, makakapanatili akong tapat at masaya.

Habang nagtitiis tayo kasama ng ating mga kapatid na dumaranas ng pag-uusig, nagsasaya din tayo kasama nila habang patuloy nilang niluluwalhati si Jehova sa pamamagitan ng kanilang kahanga-hangang pananampalataya.—1 Corinto 12:25, 26.

Tingnan Din

BALITA SA BUONG DAIGDIG

Mga Saksi ni Jehova na Nakabilanggo Dahil sa Kanilang Pananampalataya—Ayon sa Lokasyon

Mga lokasyon kung saan may mga Saksi ni Jehova na nakabilanggo dahil sa pananampalataya nila at sa paggamit ng kanilang karapatang pantao.